بافڵ جەلال تاڵەبانی، سەرۆکی یەکێتیی نیشتمانیی کوردستان لە چوارچێوەی بەشداریکردنی لە دووەمین کۆڕبەندی ساڵانەی هەولێر کە رۆژی چوارشەممەی رابردوو 28/2/2023 لە هەولێر بەڕێوەچوو، راشکاوانە رۆشنایی خستە سەر چەند بابەتێکی گەرمی هەنووکەیی و لەڕووی سیاسی و ئابووری و ئەمنییەوە و ئاماژەی بەو گرژیی و ئاڵۆزییانە کرد کە ئێستا نێوماڵی کوردی پێوە گیرۆدە بووە.
هەروەک گرنگیی بەهێزکردنی پەیوەندیی لایەنە کوردستانییەکان پێکەوە و هەرێم لەگەڵ بەغدای روونکردەوە و جەختیشی لە درێژەدان بە سیاسەتی سەرۆک مام جەلال لە پتەوکردنی پەیوەندییەکانی یەکێتی و هەرێم لەگەڵ بەغدا کردەوە.
لەبارەی کەرکوکیشەوە هەڵوێستی نەگۆڕی یەکێتی دووپاتکردەوە لە دانانی کێشەی کەرکوک لە ئەولەوییەتی کارەکانیدا.
لەو رووەشەوە وەڵامی راشکاوانەی مەحمود بابان پێشکەشکاری ئەو پانێلەی دیدارەکەی دایەوە، کوردستانی نوێ بە پێویستی زانی کە لەم دۆسێیەدا پوختەی گفتوگۆ و وەڵامەکانی سەرۆک بافڵ جەلال تاڵەبانی لەو پانێلەدا بڵاوبکاتەوە.
دۆسێ
*گرفتی پەیوەندییەکانی نێوان یەکێتی و پارتی و حزبە کوردستانییەکان بۆتە گرفتێکی گەورە و پەرتەوازەیی ناوماڵی کورد، ئەو گرفتانە چین و دیدی ئێوە بۆ چارەسەرکردنیان چییە؟
-گرفتی هەرێمی کوردستان، گرفتی حزبەکانە، تۆ سەیری كێشە و گرفتەکان بكە لەنێوان ئێمە و پارتی دیموكراتی كوردستاندا، شتی زۆر بچووكن و سادەن، ئێمە وەكو یەكێتیی نیشتمانیی كوردستان دەرگامان هەر كراوە بووە بۆ گفتوگۆ و ئێمەین کە دەستپێشخەریی دەكەین بۆ دانیشتن، ئێمە ئامادەین بە هەموو جۆرێك کە پێویست بێت و لەگەڵ كێ پێویست بێت دابنیشین، یان بچین بۆ كوێ، ئێمە ئامادەین و پێشتریش ئامادەبووین، تێڕوانینێک هەیە كە یەكێتی ئەم بارودۆخەی بەدڵە، نەخێر پێچەوانەكەی راستە، یەكێتی ئەم دۆخەی زۆر پێناخۆشە، چونکە میللەتەكەمان زەرەر دەكات، حزبەكان گرفتیان نییە، خەڵكی ئێمەیە مووچەی پێ نادرێـت و خەستەخانەی ئێمەیە دەرمانی بۆ ناچێت، هێزی ئێمەیە مووچەی بڕراوە، هەموو پڕۆژەیەك لە ناوچەكەی ئێمە وەستاوە، كێ ئەمەی بەدڵە؟ بێگومان كەس، هەقە ئێمە خۆمان بە شتی ترەوە سەرقاڵ بكەین، ئەم شتە بچووكانەی كردوومانە بە گرفت، بە پێنج دەقیقە چارەسەر دەبێت، جێی خۆیەتی ئێمە بە شتی گەورە و ستراتیژیترەوە خۆمان سەرقاڵ بكەین، پێم ناخۆشە كە بارودۆخەكە وایە، دەتوانم لە ئێستاوە تا ئێوارە گلەیی بكەم، وا لە یەكێتی و تیمەکەمان لە حکومەت و ناوچەکەمان و پیشمەرگە و هەڤاڵەکانمان كراوە.
بەڵام پرسیارەکەی من ئەوەیە ئایا یەكێتیی نیشتمانیی كوردستان چی كردووە بەرامبەر بەوە ناهەقییانە، هیچمان نەكردووە، هێز دروست دەكرێـت، هێز دەجووڵێنرێـت بەرامبەر بە جێگری سەرۆكی حكومەت، بابەت و رووداو دەوروژێنرێت لە ناوچەكەی ئێمە، دەست دەخرێتە ناو سیاسەتی حزبەكەمانەوە لەناو ماڵی خۆمەوە، وەڵامی ئێمە چییە و چی بووە؟ بێگومان هیچ، ئێمە یەك شتمان كردووە وتوومانە ئەم بارودۆخە وا باش نییە بەو جۆرە بەردەوام نابێـت، وتوومانە ئامادە نیین بێین بۆ كۆبوونەوەی كابینەی حكومەت تا لێكتێگەیشتنێکمان نەبێت، بەرامبەر بەم هەموو كێشانەی بەرامبەر ئێمە هەیە بۆ؟ ئێمە دەمانەوێـت لەوە گەورەتر بیر بكەینەوە، ئێمە خەمی میللەتەكەمانە، خەمی مامۆستایان و مامۆستایانی ئاینیی و پێشمەرگە و کەسوکاری شەهیدەكان و كەمئەندامانمانە، ئێمە قەرزاری ئەم میللەتەین، نابێت بهێڵین ئەم شتە بچووكانە دۆخەکەمان لێ تێكبدات، بەمە حزبەكان ئازار ناچێژن، خەڵكەکەمان ئازار و ناڕەحەتی دەچێژن، کەواتە غەدر دەكەین.
ئێمە ئامادەین هەر هەنگاوێك پێوێست بێت بۆ چاككردنەوەی ئەم بارودۆخە بینێین، بەڵام بە راستی و جدی وەرنە پێشەوە، تكایەكی برایانە دوای هەموو كۆبوونەوەەیەك كە باشە، بەزمێك دروست مەكەن تا بمانگەیەنێتەوە خاڵی سفر، دووبارەی دەكەمەوە ئێمە بۆ هەموو شتێك ئامادەین.
*ئایا كێشە ناوخۆییەكان گەیشتوون بە بنبەست تا یەكێـتی و پارتی لەبارەی هەڵبژاردنەوە گفتوگۆ بكەن، واتا ئێوە و پارتی گەیشتوون بە بنبەست لەسەر كێشەكان، تا وەفدی هەردوولا تەنها لەسەر هەڵبژاردن كۆببێتەوە؟
-ئەوە پێشنیازی ئێمە بوو، جەنابی كاك رەفعەت پەیوەندیی لەگەڵ پارتی كرد، ئێمە بۆ دەرفەتێك دەگەڕێین كە دەرگایەك بكاتەوە، پێمان وابوو ئەم مەسەلەی هەڵبژاردنە، لە هەموو شتەكانی تر ئاسانترە، بۆیە پێشنیازمان كرد، هیچ نەبێت وەرن با لەسەر ئەم مەسەلەیە رێبكەوین، گلەییەكمان هەیە، نەك هەر لە پارتی، لە زۆربەی حزبەكانی كوردستان، ئێستا ئەگەر گرفتێکمان لەگەڵ پارتی هەبێت، لەسەر بابەتێکی بچووک، ئیتر گفتوگۆکانمان لەسەر هەموو بابەتەکانی تر دەوەستێت، وەک حکومەت و مەسەلەی یەکخستنەوەی هێزی پێشمەرگە. بۆچی نەتوانین كێشەكان جیابكەینەوە؟ ئەگەر لێرە گرفتێکمان هەیە، با ئەوانیتر چارەسەر بكەین، كێشە گەورەكانمان بۆ چارەسەر ناكرێت با لە شتە بچووكەكانەوە دەستپێكەین، لەبەرئەوە پێشنیازمان وابوو كە لە مەسەلەی هەڵبژاردنەوە دەستپێبكەین، ئەمە شتێكی بچووكە، بەڵكو لە چارەسەركردنی ئەم گرفتەوە، گرفتەکانی تر چارەسەر بكەین کە کەمێک لەوە گەورەترن، دوای ئەوە مەسەلەیەكی گەورەتر، تا هیچ كێشەمان نامێنێت.
*پێتوایە ئەم هەڵبژاردنەی کە لەپێشماندایە بتوانێت ناكۆكییەكان یەكلایی بکاتەوە، یان كۆتایی پێ بهێنێت؟
-دوو مەسەلە هەیە کە دەمەوێت جیایان بكەینەوە، زۆر ئاساییە دوو حزب ململانێیان هەبێت، واتا زۆر ئاساییە حزبێک حەز دەكات لە یەکێتی زیاتر دەنگ بهێنێت و یەکێتی ۆەز دەکات لە ویتر زیاتر بهێنێت، ئەمە زۆر ئاساییە، بەڵام كە دامودەزگای وڵاتێك بەكاردەهێنرێت بۆ شكاندنی لایەك یان لاوازكردنی لایەنێكی تر، ئەمە ململانێکە دەباتە قۆناغێكی ترەوە، کە قۆناغێكی دروست نییە، رێگەمان لێدەگرێت ئەو شتە ستراتیژییانەی كە دەبێت پێکەوە بیكەین، نەتوانین، پێموانییە كە هەڵبژاردن كێشەكانمان چارەسەر بكات، بەتایبەتی كە هەندێك لەو شتانەی دەیبیستمەوە و هەندێك برادەران لەناو پارتی دەیانەوێت بیكەن لەم هەڵبژاردنەدا، ئەگەر ئەو شتانە بكەن، ئەوا هەر خۆی هەڵبژاردنەکە كێشە دەبێت و بگرە رەنگە هەڵبژاردن هەر نەكرێـت.
هێز دروست دەكرێـت، هێز دەجووڵێنرێـت بەرامبەر بە جێگری سەرۆكی حكومەت، دەست دەخرێتە ناو سیاسەتی حزبەكەمانەوە، بەڵام ئێمە وتوومانە ئەم بارودۆخە وا باش نییە و بەو جۆرە بەردەوام نابێـت و هیچمان نەکردووە لە بەرامبەردا
* واتا هەر نەكرێت لەم ساڵدا؟
-رەنگە ئەگەر وابێت هەر نەكرێت، بەڵام ئەگەر بەدڵێكی فراوان و بە رۆحێكی برایانە رێکبكەوین لەسەر یاساكان و گەمەی بچووكی منداڵانە لەگەڵ یەكتریدا نەكەین، زۆر حەز دەكەین هەڵبژاردن بكرێت و بە پێچەوانەوە زۆر گەشبینیشین بە ئەنجامی ئەم هەڵبژاردنە، زۆریش حەز دەكەین بكرێت و ئامادەشین و سەلماندوشمانە، چونكە ئێمە داوامان لە پارتی كرد، لانیكەم ئەم مەسەلەیە چارەسەربكەین.
*دوێنێ لیژنەی یەكێتی و پارتی لەسەر هەموو شتێك رێكەوتن، كە پارتی رازی بووە بە فرە بازنەیی، بەڵام لەسەر پرسی كۆتاكان لە سەرانسەری عیراقدا ئەم پرسە یەك بازنە بووە، واتا كریستیانێك لە هەولێر دەنگی دەدا بە كۆی كریستیانەكان لە عیراق، بەڵام بۆ هەرێمی كوردستان بۆ نموونە بەپێی ئەو داتایەی لەبەردەستی مندایە، كەنیسەكانی هەرێمی كوردستان كردوویانە، 81 ماڵ لە سلێمانیدا هەیە لە كریستیانەكان. واتا كێشەكە قۆناغی فرە بازنەییەكە پارتی رازییە پێی، ئێستا قۆناغی پرسی كۆتاكان و پێكهاتەكانە، كە لە هەرێمی كوردستاندا هەن، بۆ وەكو عیراق یەك بازنە نەبێت؟
_ مەسەلەی كۆتاكان بەهەڵە وەردەگێڕدرێت، ئێمە دژی كۆتا نیین، بە پێچەوانەوە، رەنگە پێویست بكات چەند كۆتایەک زیاد بكەین، بەڵام پارتی لە بەغدا داوای شتێك دەكات و لێرە داوای شتێكی تر دەكات، من پرسیار دەكەم بۆ؟، بۆچی بۆ بەغدا باش بێت و بۆ كوردستان خراپە؟ ئەگەر من پیاوێكی بە گومان بوومایە، دەموت: ئەم ماستە موویەكی تیایە، پێشنیازی من ئەوەیە، با گفتوگۆ بكەین، بەو واتایە نا كە یەكێتی هەر شتێكی بووێت جێبەجێ بكرێـت، ئەوە گفتوگۆ نییە ئەوە زاڵكردنی رای یەكێكە بەسەر رای یەكێكی تردا، با لەسەر پێنج خاڵ بۆچوونمان وەكو یەك بێت و لە دوو خاڵی تردا بۆچوونمان جیاواز بێت، ئەوە زۆر ئاساییە، بەڵام پڕۆسەكە نابێت لەسەر ئەم بابەتانە بوەستێت، بەرنامەی یەكێتی ئەوەیە، كەمینەكان نوێنەرایەتی خۆیان بكەن، با كریستیانەكان یەكگرتوو نەبن، با توركمانەكان یەكێتی نەبن، با هەموویان نوێنەرایەتی خۆیان بكەن، بۆ ئەم بڕیارەش پێشنیازێكم هەیە با گوێ لەخۆیان بگرین، بە چ مافێک من بە كریستیانێك بڵێم تۆ دەبێت وابكەیت و بە توركمانێك بڵێم تۆ دەبێت ئەمە بسەپێنم بەسەرتدا، ئێمە ئەگەر بمانەوێت بە ڕاستی خزمەتی كەمینەكان بكەین، کە بەڕاستی هەموومان دەمانەوێت خزمەتیان بكەین، با بۆچوونی ئەوانیش وەربگرین، پێیان بڵێین وەرە پێشەوە چیت دەوێت و چۆن باشە بۆ تۆ و چۆن گەرەنتی دەدەیت كە جەنابت بەڕاستی نوێنەری كەمینەكەت دەبیت، من حەز ناكەم كریستیانەكان یان توركمانەكان یەكێتی بن من حەز دەكەم توركمانەكان توركمان بن، كریستیانەكانیش كریستیان بن، ئەگەر بەم پرەنسیپە كاربكەین پێکەوە، باوەڕ ناكەم هیچ كێشەمان هەبێت.
* بەڵام ئەوە لەیەك بازنەیی هەموو هەرێمی كوردستان بەدەست دێت یان لە جیاكردنەوەی پارێزگاكاندا ؟
_بۆ موناقەشەی ئەوە بكەین؟ لە بەغدا چی داوا دەكەن هەڤاڵەكانمان و لە هەرێم چی داوا دەكەن؟ با بزانین بۆ لەبەغدا شتێكمان دەوێت و لە كوردستان شتێكی تر؟
*لەبارەی جێگری سەرۆك وەزیران و وەزیرەكانی یەكێتییەوە كە بەشداری كۆبوونەوەكان و وەفدەكانی حكومەتی هەرێمی كوردستان ناكەن، ئایا ئەوە كاری نەكردۆتەوە سەر خراپ بەڕێوەچوونی كاروباری حكومەت لە پارێزگاکانی سلێمانی و هەڵەبجە و هاووڵاتیانی ئەو دوو پارێزگایە؟
-بامن بەجۆرێکی تر وەڵامی ئەم پرسیارە بدەمەوە، لە شەڕی داعشدا کاک قوباد دژی حزبەكەی خۆی وەستا، دەچوویتە كۆبوونەوەی كابینەی حكومەتەوە نەتدەزانی كێ پارتییە و كێ یەكێتییە، كێ گۆڕانە، ئامادەبوو خۆی فڕێ بداتە ناو ئاگرەوە، شەڕی ئامۆزاكەی خۆی كرد بۆ ئەم حكومەتە، باجیشی داوە، لەڕووی سیاسییەوە لەناو حزبەكەی خۆشی باجەکەی داوە، بەڵام بۆ یەك دەقیقە پەشیمان نەبوو، دەیزانی ئەوەی كە دەیكات راستە، دەیزانی حكومەت دەبێت کەمێک لە حزبایەتی جیاواز بێت.
هۆکارێک هەیە كە من لەناو حزبدا ئیش دەكەم و كاك قوباد لە حكومەتدا، چونكە ئەو لەوە دەزانێ، من لە حزبایەتی و راكەڕاكە دەزانم و حەزم لەوەیە، بەڵام كاك قوباد پیاوێكی دیپلۆماتە، دەیەوێت حكومەتەكە بۆ پێشەوە ببات. بەڵام دەپرسین بۆ ئەمڕۆ كاك قوباد ئامادە نییە بڕوات بۆ كۆبوونەوەی كابینە؟ كاك مەسعود پاڵەوانی شەڕی داعش بوو!، كاك نێچیرڤان سەرۆكەكە بوو كە ئێمەی رزگار كرد لەوێ!، بەڵام کاک قوباد بوو بەو نەگبەتەی كە مووچەی بڕی و غەدری كرد و ...هتد!، جا تکایە من دەپرسم بۆ ئێستا کاک قوباد ئامادە نییە بڕوات بۆ كۆبوونەوەی كابینە؟ لەکاتێکدا ئامادەبوو خۆی فڕێ بداتە ناو ئاگر و كردیشی بۆ ئەم حكومەتە، ئێستا کە ناڕوات دیارە کێشە و گرفتمان هەیە، بۆ یەكێك تەلەفۆنی بۆ ناكات؟ بڵێ كاك قوباد تۆ بۆ نایەیت بۆ كۆبوونەوە؟
* واتە تەلەفۆن نەكراوە؟
_ نەخێر، با تەلەفۆنێکی بۆ بكەن، بچن چایەك بخۆنەوە لەلای، بڵێن کاکە تۆ کێشەت چییە؟ گرفتی یەكێتی چییە؟ خەڵك دەڵێن گرفت هەیە لە نێوان پارتی و یەكێتی، نەخێر وانییە، ئێمە یەك گرفتمان نییە لەگەڵ پارتی دیموكراتی كوردستان، رەنگە لەگەڵ بەشێكی حكومەت كێشەمان هەبێت، ئاخۆ ئەوە ئاساییە كۆمەڵ، یەکگرتوو و کەسایەتییەکانی تر لە پەرلەمان بچنە دەرەوە؟ كە زۆرێک لەو کەسایەتییانە قسەش بە ئێمە دەڵێن، رەنگە ئەگەر من لە رووی شەخسیی و حزبییەوە سەیری بكەم پێم خۆش بێت لە پەرلەمان دەچنە دەرەوە، تا كەمتر قسەمان پێ بڵێن، بەڵام ئایا ئەوە ئاساییە؟ ئەوەش منم؟ سیحری بافڵە؟ خۆزگە دەمتوانی بڵێم من ئەوەندە گرنگم و دیپلۆماتم، قەناعەتم بە هەموو پەرلەمانتارانی حزبەکانی كوردستان كرووە، لە پەرلەمان بچنە دەرەوە، بەڵام ئەوە من نیم، یەكێتی نییە، بەڵکو كێشەمان هەیە، دەبێت یەکەمجار دان بەوەدا بنێین لە كە كێشەمان هەیە، ناتوانیت بڵێی خەتای پارتییە، یان خەتای یەكێتییە، خەتای هەموومانە، جیاوازییەكە لەمەیە، ئێمە دەڵێین وەرن با پێکەوە چارەسەری کێشەکە بكەین، بەڵام لایەنێك هەیە دەڵێت: ئێمە هیچ كێشەمان نییە، تا چارەسەری بكەین، ئەی ئەگەر كێشەمان نییە، ئەی ئەم دۆخە چییە؟ هەموو پەرلەمان چۆڵ بووە، چۆن كێشەمان نییە؟
* واتە كێشەكان كێشەی سیاسین و هەم کێشەی حكومیش، بەڵام من سەبارەت بە حكومەت هەر دەمەوێ پرسیارێكت لێ بكەم؟
-خۆی كێشەی سیاسیمان كەمە، ئێمە كێشەی خزمەتی خەڵكمانە، من نامەوێت خەڵك لە كوردستان بە دوو جۆر سەیر بكرێت، من لە ساڵی 2002 لەگەڵ جەنابی كاك مەسعود و مام جەلال و كاك كۆسرەت دانیشتبووم، مام جەلال بە كاك مەسعودی وت: با شتێك بكەین هەولێر وەكو سلێمانی لێبێت، ئێ هەولێر خەریكە خەڵك دەنێرێت بۆ بۆشایی ئاسمان، (یاخوا بینێرن و دەستخۆشییان لێ دەكەم)، بەڵام سلێمانی هەروەك خۆی ماوە، ئەمە چ عەدالەتێكە؟ وەرە سەیری جادە و قوتابخانە و ناوچەی ئێمە بكە، پڕۆژەكانمان بژمێرە، سنوورەکانمان ببیینە! چۆن حكومەت وا دەبێت؟ چوار ساڵە حكومەت چەند جار هاتووە بۆ سلێمانی؟ وەرن بۆ سلێمانی پێمان بڵێن واتان بۆ دەكەین، سەرۆکی حکومەت هەرگیز نەهاتووە و نایەت بۆ ئەو ناوچەیە، گلەیی لە ئێمەش دەكەن، دەڵێن رەئی ئێمە لەولا ناخوات، رەئی ئێوە لەوێ دەخوات، یەك هەنگاو وەرنە پێشەوە، ئێمە 10 هەنگاو دێینە پێشەوە، بەس خۆت نایەیت، خۆت ناتەوێ، خۆت عەزێتی خەڵکەکە دەدەیت، ئێ كێ بەوجۆرە دانت پێدا دەنێت؟
ئێمە هەموو كەسێك بەڕێز سەیر دەكەین، دەمانەوێت لەگەڵ هەموو كەسێكدا رێكبەوین، ئامادەین وەكو هەموو جارێك تەنازول لە مافی خۆمان بكەین وەكو حزب بۆ میللەتەكەمان، ئێستاش ئامادەین، لێرەش بەڵێنتان پێ دەدەم، چۆن دوو ساڵ لەمەوپێش لێرەوە داوامكرد لە هەموو كورد، وەرن یەكبگرن، بەیەكەوە بچین بۆ بەغدا، ئێستاش نە چووە بچێت، دووبارەی دەكەمەوە، یەكێتی هیچی نەكردووە، دەستمان نەكردۆتەوە بە هیچ جۆرێک، کەواتە وەرنە پێشەوە لەگەڵمان، چاوەڕێی چی دەكەن؟ هەر چارەسەرئ دەكەین، ئەو گرفتە هەر چارەسەر دەبێت، بەڵام با ئەمڕۆ چارەسەری بكەین بۆ چاوەڕێی سبەینێ و دوو سبەی بكەین، یان چاوەڕێی بین بیانییەک بێت و بڵێت: وەرن دانیشن من ئاشتتان دەكەمەوە، ئەوە عەیبە.
*دەبیستین کە هەوڵی دەرەكی هەیە، بۆ بانگهێشتكردنی یەكێتی و پارتی بۆ رێکخستنەوەتان، ئایا ناكرێ ئەم هەوڵە لە رێگەی سەرۆكایەتی هەرێمی كوردستان و دەستپێشخەریی سەرۆكی هەرێمی كوردستانەوە بدرێت و بتوانن دانیشن و گفتوگۆ بكەن و كێشەكان چارەسەربكەن؟
-هەرچی شتێكیان دەوێت ئێمە ئامادەین، دەیانەوێت لەگەڵ پارتی دانیشین، بزانین جدیە دانیشتنەكان و ئەنجامی دەبێت، دادەنیشین، بیانی تێدابێت، دەیكەین، لە هەولێر بێت دەیكەین، بەڵام ئێمە گرفتمان دانیشتن نییە، گرفتمان ئەنجامی دانیشتنەكانمانە، ئەوەیە كە دانیشتنێك دەكەین، لایەنێكی تر كەتنێك دەكات و دانیشتنەكەی دووەم تێك دەچێت، خۆتان رێكبخەنەوە، بزانن بەرنامەكەتان چییە، پارتی دیموكراتی كوردستان، ئێمە بۆ هەموو شتێك ئامادەین، لە كوێ و كێ و چۆن دەیكات، ئێمە ئامادەین.
*راتان لەسەر دوایین پەیامی لاهور شێخ جەنگیی چییە كە وتی: من بە بڕیاری دادگا، (كە مەبەستی بڕیاری دادگای ئاسایشی هەولێر بوو) كە هاوسەرۆكی یەكێتیم؟
-من داوای لێبووردنت لێ دەكەم، زۆر خۆم حازر نەكردبوو بۆ ئەم دانیشتنە، ئاگام لە پەیامی كاك لاهور نییە، بەڵام كاك لاهور ئازادە چی دەكات بیكات، لەناو یەكێتی نییە، ئێمە باوەڕمان بە ئازادیی و دیموكراسییە، زۆر ئاساییە با بڕوات حزبێك بۆ خۆی دروست بكات و ئیشەڵڵا سەركەوتوو دەبێت و ئێمە هیچ كێشەمان نییە لەگەڵ ئەوە.
* پرسیارێكی تر لەسەر بەهای دینارە بەرامبەر دۆلار، ئەمریكییەكان دەڵێن پارەیەكی زۆر لە عیراقدا بەگشتی و لە هەرێمی كوردستانیشدا بەتایبەتی لە سلێمانی كە چەندین راپۆرتی رۆژنامەوانی هەبووە، یەكێكە لەو شوێنانەی دۆلاری تێدا سپی دەكرێتەوە؟
-من دواجار لەگەڵ لیژنەیەك دانیشتم لە بەغداوە هاتبوو، ئێمە ئێستا هاوكاریی ئەو لیژنەیەین، كە ئەو پارەیە رابگرین، دوا زانیاریی ئێمە و لیژنەکە، ئەوەیە كە پارەكە، لە رێی كەركوكەوە لە جادە خۆڵەكانەوە دێتە سلێمانی و لە سلێمانییەوە بە داخەوە دێتە هەولێر و لە هەولێرەوە دەچێتە توركیا و لە توركیاشەوە دابەش دەكرێت، ئەمە راستیەکەیەتی، بەڵام ئێمە و هەولێر ئەوەی كە من ئاگام لێ بێت، هەردووكمان لە هەوڵی جدیداین، ئێستا رێگەكان دەزانین، تا ئیشەڵڵا پێکەوە هەموو ناوچەکانی كوردستان بتوانین کارێک بكەین ئەم حاڵەتە رابگرین، واتە دەبینیت هەندێک کار هەیە دەوانین پێکەوە بیكەین!
من خەمی مامۆستایان و مامۆستایانی ئاینیی و پێشمەرگە و کەسوکاری شەهیدان و كەمئەندامانمە، ئێمە قەرزاری ئەم میللەتەین، بەم دۆخە حزبەكان ئازار ناچێژن، خەڵكەکەمان ئازار و ناڕەحەتی دەچێژن
* ئەچمە سەر تەوەری دووەم بە تایبەت پرسی غاز، بە تایبەتی كە ئێستا هەموو جیهان سەرقاڵە بە پرسی غازەوە، پرسیارەكەم ئەوەیە، بۆچی كاركردن لەسەر فراوانكردنی كێڵگەی غازی کۆرمۆر- چەمچەماڵ وەستا؟ ئایا ئێوە وەستانتان، بۆچی ئێوە ناڕازین لە شێوازی بەڕێوەبردنی ئەم دۆسێیە؟
_ ئێمە دەمانەوێت ئەم شتە ستراتیجییانە باس بكەین، ئەمڕۆ هەموو دنیا پێویستی بە غازە، ئێ وەرن با لەسەر ئەمە بەرنامەیەک دانێین پێکەوە، ئێستا پارتی دیموكراتی كوردستان باشترین پەیوەندیی هەیە لەگەڵ بەغدا، ئەمڕۆش یەكێتیی نیشتمانیی كوردستان لە زەمانی مام جەلال-ەوە پەیوەندیی وا باشی نەبووە، کەواتە با پێکەوە بچین بۆ بەغدا گرفتەکانی میللەتەكەمان چارەسەر بكەین، ئەم بابەتە ستراتیجییانە باس بكەین، با باسی ئەوە بكەین چۆن دەتوانین یارمەتیی براكانمان بدەین لە رۆژئاوا، كە هەموو رۆژێك لەژێر گوشاردان و بۆردومان دەکرێن، وەرن با چارەسەرێک بۆ ئەوە بدۆزینەوە، با ئاشتییەك دروست بكەین لەگەڵ هەڤاڵەكانی پەكەكە و توركیا، بۆ مام جەلال توانی بیكات، بۆ ئێمە ناتوانین بیكەین؟ وەرن با ناوچەکەی خۆمان ئارام بكەینەوە، لە جیاتی ئەوەی ئاڵای حزبەكان هەڵگرین، با ئاڵای كوردایەتی هەڵگرین، پێکەوە پێمان دەكرێت، نامانەوێ براگەورە بین، نامانەوێت لەپێش كەسەوە بین، وەرن با پێکەوە ئەم بابەتە ستراتیجیانە باس بكەین، باشترین خوشک و برامان هەیە لە بەغدا، ئامادەن رێكەون لەگەڵمان، داواكارییەكەیان زۆر زۆر سادەیە، دەڵێن: تۆ كوردستانت هەیە، ئەوەندە نەوتی تێدایە، هەر بەسرە یەك هەزار جار لە كوردستان دەوڵەمەندترە، لە مەسەلەی نەوتدا، دەڵێت وەرە تۆ لەمەدا شەریك بە، دەڵێین نایكەین، من پەرداخە ئاوەكەم دەوێت، مێزەكەم ناوێت، ئاخر هەر ئەمە گومان لای خەڵك دروست دەكات، بۆ ئەمەت دەوێت و ئەمەیان بۆ كوێ دەڕوات؟ دەبێت ئەم پرسیارانە بكەین بە راشکاوی، بەغدا ئامادەیە رێكبکەوێت لەگەڵمان، یەك داواكاری هەیە، دەڵێت: من ئەرکی خۆم جێبەجێ دەکەم، تۆش ئەرکی خۆت جێبەجێ بکە.
من نە بزنسمانم، نە زۆر لە حساباتدا بەقووەت بووم، بەڵام من کە سەیری دەکەم، هەر بەسرە هەزار جار لێرە دەوڵەمەندترە و ئەو دەڵێت وەرە لە هەمووی شەریک بە، من دەڵێم نا، ئیتر من عەقڵم نایبڕێت، پێویستم بە یەکێکە تێم بگەیەنێت و لە نەوت بزانێت، کە بۆچی ئەمە شتێکی خراپە؟
*ئەوە پەیوەندیی بە سەروەرییەوە هەیە، واتە هەرێمی کوردستان بە درێژایی ماوەی 100 ساڵی رابردوو کە هەموو بزووتنەوەکان لێرە بوون و گەیشتووین بەم قەوارەیە لە هەرچوار پارچەی کوردستان، خۆ ئەگەر مەسەلەی رادەستکردنەکە ژمارە بێت، ئەوا رێکەوتن زۆربووە، بەڵام پرسەکەی بەغدا کە داوای دەکات، رادەستکردنە، واتە ئەو چۆن بەڕێوەی بردووە، هەروا بەڕێوەی بەرێت، بەڵام ئەوەی هەرێمی کوردستانیش داوای کردووە، لە وەفدەکانی پێشوو و دوایین وەفدیش کە چوونەتە بەغدا و باسکراوە، پرسی ژمارە کێشە نییە، بەڵام ئیدارەدان و سەروەرییەکەی کێشەیە لە نێوانیاندا؟
-ئەگەر بتەوێت گرفتێک چارەسەر بکەیت، دەبێت بزانیت و دان بەوەدا بنێیت کە گرفتێک هەیە، تا بڵێت دادگا بڕیاری نەداوە، دادگا نییە، بەغدا نییە، بەوجۆرە هەرگیز ناگەیتە چارەسەر، با سەرەتا ئێمە رێز لە دادوەریی و قەزا بگرین، هەموو ئەم کێشانەی کە جەنابت باسی دەکەیت بابەتن، بەڵام ئامادەین چارەسەری بکەین، ئەوان ئامادەن چارەسەری بکەین، لەجیاتی ئەوەی من و جەنابت لێرە دانیشین موناقەشەی بکەین، وەرە با وەفدێک دروست بکەین، سبەینێ دەڕۆین بۆ بەغدا دەیکەین. من لەگەڵ ئەم جەماعەتە نێوانم باشە، کاک مەسرور تەلەفۆنێکم بۆ بکات بڵێت بافڵ بڕۆ لەگەڵ رەفیقەکانت قسە بکە، کاک سەعدی لەگەڵ ئەم جەماعەتە وەزعی باشە، با تەلەفۆن بکات بڵێت کاک سەعدی گیان تۆ ئەمە چارەسەر بکە، پێکەوە ئەمە چارەسەر دەکرێت، بەڵام ئێمە دانیشین و چاومان داخەین و بڵێین وەڵڵا بڕیار نییە و حکومەت نییە و قەزا نییە، بەمە ناگەینە هیچ ئەنجامێک.
ناڵێم باشە و خۆشە دۆخەکە، بەڵام بە دانیشتن و گفتوگۆ چارەسەر دەکرێت، بە داننەنان بە کیشەکاندا چارەسەر ناکرێت، ئەمانە شتی زۆر سادە و لۆجیکین.
لەناو ماڵی خۆتدا شەڕێکت دەبێت لەگەڵ خێزانەکەت، بەڵام بە قسە چارەسەر دەبێت، ناکرێت من بڵێم کێشە نییە، چۆن کێشە نییە، ئەمە سادەترین شتە.
*ئێستا پێشکەوتنێک هەیە لە دانوستانەکانی نێوان وەفدی هەرێمی کوردستان و وەفدی بەغدا، دیارە بە هاوکاریی ئەمریکییەکان، بەڵام پرسیارەکەی من بە دیاریکراوی ئەوەیە کە گوایە رێکەوتوون لەسەر یاسای غاز و نەوت و بودجەی 2023 ، تۆ زۆر دەچیت بۆ بەغدا، ئێستا خەڵک چاوەڕوانی جێبەجێکردنی ئەو خاڵانە دەکات کە لە رێکەوتنەکەدایە لەم کابینەیەی سودانیدا؟
_ منیش دەمەوێت زۆر بە راشکاوی وەڵام بدەمەوە، بەس تکایە کەس زویر نەبێت، من هاتوچۆ زۆر دەکەم بۆ بەغدا، کە ئەوەش چەند هۆکارێکی هەیە، یەکەم: ئێمە دەتوانین لە بەغداوە خزمەتی خەڵکی کوردستان بکەین، دووەم: بەڕاستی بەغدا دامەزراوە و موئەسەساتی هەیە، وەزیر لە بەغدا بەڕاستی دەسەڵاتی وەزیری هەیە، قەزا لە بەغدا قەزایە، هیچ حزبێک زاڵ نییە بەسەر قەزادا، بەغدا شتێکی ترە، من ئەو رۆژە پرسیارێکم لە کاک خالید و کاک نزار کرد، پێموتن: چەند جار جەنابی سودانی دەستی وەرداوەتە کارەکانتانەوە، وتیان هیچ. ئەوە حکومەتە، ئەوە موئەسەساتە، ناوێرم ئەو پرسیارە لە برادەرەکانی خۆمان بکەم، هەم بۆ کاک قوباد، هەم بۆ کاک مەسرور، ئێمە دەبێت متمانەمان بە خۆمان هەبێت بۆئەوەی کێشەکانی خۆمان چارەسەر بکەین، جەنابت باسی نزیکبوونەوە دەکەیت و باسی رێکەوتن دەکەیت، ناتوانم وەڵامی ئەو پرسیارە بدەمەوە، چونکە یەک کەس لە یەکێتی ئاگای لەوە نییە، هەر ئەوەندە دەتوانم نزا بکەم ئیشاڵڵا سەرکەوتوو دەبن و رێکەوتنێکی باش دەبێت و لە هەرکوێیەک بافڵ بتوانێت هاوکارتان بێت، بمنێرن دەچم هاوکارتان دەبم.
*تەوەری سێیەمم کە پرسی پێشمەرگە و دۆخی ئەمنییە، بەپێی هەموو یاساکان دەبێت هێزی پێشمەرگەی کوردستان یەکگرتووبیت، هێزەکانی هاوپەیمانانیش بە هەموو شێوەیەک هانتان دەدەن چ یەکێتیی نیشتمانیی کوردستان و چ پارتی دیموکراتی کوردستان بۆ یەکخستنەوەی هێزەکانی پێشمەرگە، بەو ناکۆکییانەوە کە لەنێوان یەکێتی و پارتیدا هەیە، دەتوانن هێزەکان یەکبخەن؟
_ ئەگەر سیاسەتەکەی من بەکاربهینن کە دەڵێم کە کێشەیەکمان هەیە لێرە، بەڵام با شتەکانی تر بڕۆنە پێشەوە، بەڵێ دەتوانین، بەڵام کەی ناتوانین، دژە تیرۆر لەم ساڵەدا 432 ئۆپەراسیۆنی سەربازیی کردووە دژی داعش، لەگەڵ (تی ئێفەکان)، لەگەڵ برادەرەکانمان لە بەغدا، لە بەرامبەر ئەوەدا هێزەکانی تری کوردستان وابزانم 30 - 40 ئۆپەراسیۆنی سەربازییان کردووە، بە چ مافێک یەکێک هەڵدەستێت مووچەیان دەبڕێت، بەوجۆرە یەک دەگرینەوە؟، ئێمە لە پێشترین بۆ یەکگرتنەوە، ئێمە لە خوامان دەوێت یەک هێزمان هەبێت، بەڵام یەک داواکاریمان هەیە، کە یەکگرتنەوەکە بە عەدالەت بکرێت، هیچ کێشەمان نییە، ئێمەین راکەراکە دەکەین، ئێمەین وەفدەکانمان هەموو هەفتەیەک دێن بۆ ئێرە، بەڵێ ئێمە حەزدەکەین، ئەوە بەرنامەی جەنابی مام جەلال بوو، من حەزناکەم لەوێ بوەستێت، من پێم سەیرە دوو حزب یەکێک پاراستنی هەیە و یەکێک زانیاری هەیە، ئەمە لە چ وڵاتێکدا هەیە؟ وەرە با ئەمەش رێکبخەینەوە، ئێمە ئامادەین، باسی ئاسایشی ئەملا و ئەولا دەکرێت، ئەمە عەیبە.
باسی بیانییەکانت کرد، بیانییەکان دەیانەوێت یارمەتیمان بدەن، بەڵام پێمان پێدەکەنن، ئەمریکییەکان تاقەتیان چووە؟ بە راشکاوی پێیان وتووم ئێمە 30 ساڵە خەریکین، تاقەتمان چووە.
ئێستا عیراق لە لیڤڵی ئەو وڵاتانە هاتۆتە خوارەوە کە گرنگییان پێدەدەن، ئێستا سەیری ئۆکرانیا، روسیا، چین و کۆریا دەکەن، دەرفەتێکی زێڕینمان هەیە وەکو کورد، ئێستا یەکبگرین، بەپەلە مەسەلەی غاز و نەوت بەرینە پێشەوە، رێکەوین لەگەڵ بەغدا و بیانییەکانیش ئاشتبکەینەوە.
ئێمە لە هەموو شتێکدا بەرەو دواوە دەڕۆین، لە مافی مرۆڤەوە کە قسەی یەکێکت بەدڵ نەبێت، وێنەگرتنی یەکێکت بەدڵ نەبێت، پەیامی یەکێکت بەدڵ نەبێت، دەیگریت و دەیخەیتە زیندانەوە و دەیکەیت بە تیرۆریست و بڕۆ بۆ مەسەلەکانی دیکە.
ئێمە بۆ دواوە دەڕۆین، ئەمە قسەی من نییە، رەنگە من رام وانەبێت، بیانییەکان ئەمریکییەکان و بەریتانییەکان و فەرەنسییەکان هەموو رۆژێک وامان پێدەڵێن.
باشە بۆ وا دەکەین؟ دەبێت رێز لە دامەزراوەکانمان بگرین، ئەو شتانە جدی بن، نابێت شکڵی بن، تا شکڵی بن، بەرەو پێشەوە ناڕۆین.
ئەوە د. رێواز سەرۆکی پەرلەمانە، من متمانەم پێیەتی، دەسەڵاتی هەیە، دەتوانێت هەرچی شتێک بکات دەیکات، وەفدی ئێمە لەگەڵ وەفدی تر دادەنیشێت، پێویست ناکات بگەڕێنەوە بۆلای من، هەموویان دەسەڵاتیان هەیە، لەوێ هەموو شتێک ئیمزا بکەن، دوێنێش سەلماندمان کە لەسەر بابەتی هەڵبژاردن کۆبوونەوە، یەک کەس تەلەفۆنی بۆ من نەکرد، بەڵام پێویست ناکات پرسم پێ بکەن، ئێمە دەمانەوێت وا ئیش بکەین و وا سیاسەت بکەین.
یەکێتی هەرگیز پەیوەندییەکانی وەک ئێستا باش نەبووە لەگەڵ وڵاتانی دەوروبەرمان، لەگەڵ حزبەکانی کوردستان، لەگەڵ بەغدا لەدوای جەنابی مام جەلال-ەوە خوالێیخۆشبیت، کەواتە با ئەوانە بدەینە ئێوەش، کێ دۆخی خراپە، وەرن با ئێمە یارمەتی بدەین، لە کوێش ئێمە دۆخمان خراپە، وەرن ئێوە یارمەتیمان بدەن.
ئێمە ئامادەین هەموو هەنگاوێک بنێین بۆ یەکڕیزیی حزبەکان، نەک لەبەر حزبەکان، بەڵام لانیکەم لەبەر میللەتەکەمان، ئێمە لە بەغداوە دەتوانین خزمەتی خەڵکی خۆمان بکەین، نازانم چی رێی لێگرتووین کۆببینەوە؟
*تەوەریکی تری پرسیارەکانم لەسەر دۆخی ئەمنییە و راپۆرتیکی رۆلیستۆن هەیە کە رۆژی 29 ی ئەم مانگە بڵاویکردۆتەوە کە کارگەی دروستکردنی چەک لە سلێمانی هەیە، کە گوایە ئەو وەک ئەندامێکی پێشووی هێزی دەریایی ئەمریکا، تۆمەتبارە بەوەی کارگەیەکی نهینی بۆ دروستکردنی دەمانچەی لە سلێمانی داناوە، ئەو کەسە براوەتە دادگا و تۆمەتەکانی سەر خۆی رەتکردۆتەوە و خستوێتیەسەر پۆڵاد تاڵەبانی، جا پرسیارەکە ئەوەیە کە ئایا ئەم کارگەیە هەیە، یان کارگەی هاوشێوەی ئەوە لە سلێمانیدا هەیە؟
- بەداخەوە ئەم رۆلستۆنەم نەبینیووە و من پێشبینی ئەوە ناکەم کە ئەگەر شتی وا کرابێت، کاک پۆڵاد بە تەنها ئەوەی کردبیت، دڵنیام ئەوە بۆ شوێنی تریش دەڕوات، پێشنیاز دەکەم بۆ ئەمریکا کێ داوا دەکەن بۆ دادگا، با داوایان بکەن، من ئامادەم خۆم بیانخەمە ناو فڕۆکەکەوە و بیاننێرم بۆ واشنتۆن.
*دوا پرسیاری من سەبارەت بە دۆخی ئاسایشی هەرێمی کوردستانە، کە ئیرە لە ناوچەکانی تری عیراق جیادەکاتەوە، بەڵام ئەگەر رووداوی وەک ئەوەی کوشتنی شەهید هاوکار جاف روودەدات، دۆخەکە تێکدەچێت، بەرپرسی دژە تیرۆر تۆمەتبارکراوە بە کوشتنی هاوکار جاف، ئایا یەکلاییکردنەوەی ئەم دۆسێیە لە شوێنی خۆیدا وەستاوە، یان هیچ بەرەوپێشچوونیک هەیە؟
- من ئاگام لەم دۆسێیە نییە، چونکە یەک زانیاریمان نەبینیووە، یەک بەڵگەمان نەبینیووە و یەک ئیعتیرافمان نەبینیووە، من بۆ خۆم لە بەغدا بووم، کە تەلەفزیۆنم کردەوە سەیردەکەم لەسەر تەلەفزیۆن قارەمانەکانی کوردستان دادگایی کران و حوکمدران، دووبارە تەئکید دەکەمەوە کە من زۆر رێز لە دادگا و دادوەریی دەگرم، من لە هیج شوێنێک نەمبینیووە خەڵک لە تەلەفزیۆنەوە دادگایی بکریت، خەڵک لە دادگادا دادگایی دەکریت، من یەک کادری خۆم تەسلیمی هیچ دادگایەک ناکەم تا قەناعەت نەکەم کە ئەو دادگایە راستەقینەیە.
بۆ مەسەلەی هاوکار جاف، شەهید هاوکار هی ئێمەیە، شەهیدی خۆمانە، پرسیارێک دەکەم تا ئێستا وەڵامەکەیم وەرنەگرتۆتەوە، ئەویش ئەوەیە یەکێتی چ قازانجێک دەکات لە شەهیدکردنی هاوکار جاف، هەموو تاوانێک مۆتیڤێکی هەیە، ئایا مۆتیڤی ئەو تاوانە چییە؟ خەڵک هەیە گرفتمان هەبووە لەگەڵیدا، بەڵام شەهید هاوکار وانەبوو، من پێمناخۆشە، لەگەڵ خزمەکانیدا قسەم کردووە، من دەزانم چی روویداوە و ئێوەش دەزانن چی روویداوە!
پێشنیازی ئێمە ئەوە نییە، ئێمە لە تەلەفزیۆن قسە بە ئێوە بڵێین و لە تەلەفزیۆنەوە خەڵک دادگایی بکەین، دیسان دووبارەی دەکەمەوە، ئێمە ئامادەین لێکۆڵینەوەیەک بکەین پێکەوە، با ئێمەش پێکەوە نەیکەین ئێم ئای فایف، سی ئای ئەی ، ئێف بی ئای دەهێنن، کێ دەهێنن یارمەتیمان بدات ئێمە ئامادەین، لەوە باشتر دەتوانم چی بڵێم؟ بەڵام بە من بوترێت ئەمە و ئەمە و ئەوە بنێرە بۆ هەولێر، هەرگیز ئەوە ناکەم، هەرگیز چاوەڕێی ئەوە مەکەن، لە خەونیشتاندا ئەوە نابینن.
ئێمە بۆ دەرفەتێك دەگەڕێین كە دەرگایەك بكاتەوە، پێمان وابوو مەسەلەی هەڵبژاردن، لە شتەكانی تر ئاسانترە، بۆیە پێشنیازمان كرد کۆبوونەوە لەسەر ئەو پرسە بکەین
*باستان لەوەکرد کە ئێستا پەیوەندییەکان لەگەڵ بەغدا بەهێزترە تەنانەت لە سەردەمی مام جەلال-یش، ئایا ئەو پەیوەندییەی ئێستا لەگەڵ بەغدا، پەرچە کردارێکە بۆ قەبارەی ئەو ناکۆکییانەی لەگەڵ پارتی دیموکراتی کوردستاندا هەتانە؟
- هۆکاری نزیکبوونەوەی ئێمە لەگەڵ بەغدا ئەوەیە کە دەبێت وابێت، ئەوە یەکێتیی نیشتمانیی کوردستانە، کە ئەمڕۆ گەیشتۆتە سەر رێگا راستەکەی خۆی، رێگای تێکۆشەرەکانمان، رێگای شەهیدەکانمان، ئەرکی ئێمەیە کە سەردانی هاوڕێکانمان بکەین، ئەو پەیوەندییانە زیندوو بکەینەوە، مام جەلال هی هەموو کەسێک بوو، هەرگیز ئێمە نابین بە مام جەلال، بەڵام حزبی مام جەلالە، ئێمەش دەبێت وەکو مام جەلال کاربکەین، ئێمە لەگەڵ جیاکردنەوەی کەس نین، لەگەڵ کردنەدەرەوەی کەس نین، ئەوەی کە ئێمە دەمانەوێت، عیراقێکی یەکڕیزی سەرکەوتووی دەوڵەمەندە، بۆ دوو ئامانج کار دەکەین، یەکەم دەمانەوێت دۆخی عیراق باش بێت، دووەمیش ئەگەر راشکاوبم لەگەڵتان کە دۆخی عیراق باش بێت، دۆخی ئێمەش باش دەبێت، بۆیە ئێمە پشتیوانی لە هەر پڕۆسەیەک دەکەین کە وڵاتەکەمان دەباتە پێشەوە، من ئەو جۆرە کوردە نیم و یەکێتی ئەو جۆرە حزبە نییە، کە پێی خۆش بێت هاوڕێکانمان، خوشک و براکانمان لە بەسرە دۆخیان خراپ بێت و ئێمە دانیشین لێرە دۆخمان باشبێت، نەخێر، ئەوانەش کەسی ئێمەن، ئەوانەش کەسی مام جەلال بوون، ئەوانەش کەسی یەکێتین، ئێمە حەزدەکەین هەموومان دۆخمان باش بێت و هاوشان بین.
دەربارەی عیراق، زۆرجار گریانم دێت بۆ ئەم وڵاتە، بگەڕێرەوە بۆ چەند هەزار ساڵ پێش ئێستا، تۆپ لێرە دروستبووە، زانستی ماتماتیک لێرەوە سەریهەڵداوە، یەکەم قانون لێرە نووسرایەوە، خوێندنەوەی ئەستێرەکان لێرەوە پەرەیسەند، داوای لێبووردن لە هاوڕێ بیانییەکانمان دەکەم، کە خەڵکی عیراق لە بەغدا دەگەڕان بە جلوبەرگی ئاوریشمەوە، هاوڕێ ئەوروپییەکانمان تازە لە ئەشکەوت هاتبوونە دەرەوە، ئێ باشە بۆ وامان لێهاتووە؟ ئێمە چۆن دەبێت یەکڕیزیی لەناو کورددا دروست بکەین، دەبێت هەوڵبدەین لە بەغدا و لە بەسرە و لە نەجەف و هەموو عیراق یەکڕیزیی دروست بکەین، هەموومان پێکەوە دەرەقەتی هەموو ئەم کێشانە دێین، هەموومان پێکەوە دەتوانین بۆ پێشەوە بڕۆین، بەڵام بەم جۆرەی ئێستا ئێمە پێمانوایە لەم قۆناغەدا چۆن یەکێتی پێویستی بە بەغدایە، ئیشاڵڵا بەغداش حەزدەکات یەکێتی هاوکار بێت، ئێمەش حەزدەکەین هاوکار بین، هیچ بەرنامەیەکی دیکەمان نییە، جگە لە پێشکەوتنی عیراق و پێشکەوتنی کوردستان بە هەر چوار پارچەکەی کوردستانەوە.
ئێمە دژی كۆتا نیین، بە پێچەوانەوە، رەنگە پێویست بكات چەند كۆتایەک زیاد بكەین، بەڵام پارتی لە بەغدا داوای شتێك دەكات و لێرە داوای شتێكی تر بۆچی بۆ بەغدا باشە و بۆ كوردستان خراپە؟
*پرسیارەکەم لەبارەی کەرکوکەوەیە، خۆتان دەزانن لە دوای رووداوەکانی 16ی ئۆکتۆبەرەوە پارێزگاری کەرکوک کورد نەماوە، ئایا تاچەند هەوڵتانداوە لەگەڵ پارتیدا بگەنە رێکەوتن بتوانن ئەم پۆستە بگەڕێننەوە کە لە عیراقدا بە مافی کورد نازانرێت؟
_دڵنیاتان دەکەمەوە کە دانیشتنێک یان کۆبوونەوەیەک یان سەردانێک نەبووە لە بەغدا کە ئێمە زۆر بەجدی باسی کەرکوک نەکەین، ئامادەش نین هیچ تەنازولێک بکەین لەسەر مەسەلەی کەرکوک و هەڤاڵەکانمان لە کەرکوک.
بەڵام دەربارەی ئەوەی کە لەگەڵ پارتی تاچەند کارمان کردووە بۆ کەرکوک، دەڵێم بەداخەوە هیچ.
* پرسیارەکەی منیش هەر لەسەر کەرکوکە، ئاخۆ قسەو باس لەسەر مەرجەکانی جێبەجێکردنی خاڵ و بڕگەکانی مادەی 140ی دەستوور هەیە یان نا؟ چونکە پارتە سیاسییەکان دەیانەوێت بەشێوەیەکی دەستووری خەبات بکەن بۆ گێڕانەوەی کەرکوک بۆسەر هەرێمی کوردستان؟
-ئێمە توانیومانە چەند بابەتێک بکەین لە بەغدا، بابەتی مادەی 140مان زیندووکردۆتەوە، لە هەموو دانیشتنەکانماندا هەوڵدەدەین بۆ مەسەلەی کەرکوک، پێشنیازی من ئەوەیە کە هەڤاڵانی پارتی پشتگیریی ئێمە بکەن، بەیەکەوە کار بۆ کەرکوک بکەین، پێموایە دۆخی ئێمە زۆر باشتر دەبێت لە بەغدا و ئەنجامێکی باشتریش بەدەستدەهێنین بۆ کەرکوک، نەک هەر بۆ کورد، بەڵکو بۆ هەموان لە کەرکوکدا، مام جەلال دەیوت: مەسەلەی کەرکوک نەشتەرگەریی مێشکە، وابزانم هەر لەبەرئەوەش د. نەجمەدینی لەوێ دانابوو خوا لێی خۆشبێت، چونکە خۆتان دەزانن دکتۆری مێشک بوو، ئینجا ئەگەر ئێمە بتوانین پێکەوە کار بکەین، دڵنیام کە ئەنجامی باشتر دەبێت، لەوەی کە پارتی بە تەنیا کار بۆ کەرکوک بکات و یەکێتی بە تەنیا.
* من پرسیارم نەماوە، ئەگەر ئێوە شتێکتان مابێت؟
- داوا لە هەموو حزبەکانی کوردستان دەکەم، با بێن پێکەوە زۆر بە جدی گفتوگۆ بکەین، میللەتەکەمان دۆخی زۆر خراپە، بەڵام هاوکات دەرفەتێکی زێڕینە ئێمە پێکەوە کاربکەین و گرفتەکانمان چارەسەر بکەین و میللەتی کورد بۆ پیشەوە ببەین ، ئێمە غازمان هەیە، خەڵکی زیرەکمان هەیە، پەیوەندیی باشمان هەیە، توانای باشمان هەیە، هەروەها پێکەوە هێزی باشیشمان هەیە، هەر لێکتێگەیشتنمان نییە، وەرن ئێمە وەکو یەکێتیی نیشتمانیی کوردستان ئامادەین تەنازول لە مافەکانی خۆمان بکەین وەکو هەموو جارێک، بەڵام وەرنە پێشەوە یەک هەنگاو، واز لەم سیاسەتە بێنن، ئێمە ئامادەین سێ هەنگاو بێینە پێشەوە، هەرکەسێک گوێ دەگرێت لە هەرچی حزبێک بێت، ئەمە رای یەکێتیی نیشتمانیی کوردستانە، رای شەخسیی بافڵ نییە، رای هەموو ئەندامێکی مەکتەبی سیاسیی و سەرکردایەتیی ئێمە و رای پیشمەرگەی ئێمەیە، ئامادەین دۆخی کوردستان چاکتر بکەین، دۆخی عیراق چاکتر بکەین.
