بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە فایەق زێدان، سەرۆکی ئەنجومەنی باڵای دادوەریی عیراق کرد.
لە دیدارێکدا کە رەفعەت عەبدوڵڵا، بڕیاردەری دەستەی کارگێڕی و خالید شوانی، ئەندامی مەکتەبی سیاسی و نزار ئامێدی، وەزیری ژینگەی عیراق ئامادەبوون، دوایین ئەگەر و پێشهاتە سیاسییەکانی وڵات تاوتوێکران و جەخت لە پاراستنی سەقامگیری و چەسپاندنی یاسا کرایەوە.
هەر لە دیدارەکەدا سەرۆک بافڵ جەلال تاڵەبانی پشتیوانی تەواوی یەکێتی بۆ تێپەڕاندنی بەربەستەکان، گەشەپێدانی دامەزراوەکانی دەوڵەت و خزمەتکردنی زیاتر دووپاتکردەوە و رایگەیاند، پشتگیری تەواوی بڕیارە یاسایی و دەستوورییەکانی ئەنجومەنی باڵای دادوەری دەکەین لەپێناوی روبەڕوبونەوەی گەندەڵی و سەروەریی یاسا لە وڵاتدا.