ئەز ناخازم ئێكێ ئەیارێ وەكو جەژنەك ل كرێكاران پیرۆز بكەم، ژبەركو ب راستی ژی ئەڤە نە جەژنە، بەلكو پێتڤیە ئەو رۆژە كرێكاران ب هەموو شێوە و رێكارەكێ، فشارێ بكەن بۆ بدەستڤە ئینانا مافێن خۆ.
ل دوویف دیتنا من، ئەوا ل هەرێما كوردستانێ و ل عیراقێ ژی دەربارێ رەوشا كرێكاران دهێتە دیتن و تێبینیكرن، ب ڤان خالێن دیاركریی دهێتە پێناسەكرن.
*ل گورەی ئامارێن بەڵاڤۆكا دەنگێ كرێكار بەڵاڤكرین د 16 هەیڤێن دەربازبووییدا، (79) كرێكاران ل هەرێما كوردستانێ ل دەم و جهێن كاری گیانێ خۆ ژدەستدایە، وەكو ب كورتی و كوردی دبێژن (ژكیستێ خۆ چوون) هیچ كەس و لایەنەك پرسیارا مافێن وان ناكەت.
*دهەمان ماوەدا بسەدان كرێكار بریندار و كێم ئەندام بووینە و هیچ پشتەڤانی و مووچە و هاریكارییەک ژبو وان نە هاتینە دابینكرن.
*بیما بێكاریێ ل هەرێمێ و عیراقێ نینە و هەر كرێكارێ ما بێ كار دێ بەرهنگاری فشار و دەردەسەریێن ژیانێ بیت بێی كو هیچ لایەنەك خۆ لێ بكەتە خودان.
*یاسا و ستاندەردێن جیهانی یێن كاری ل هەرێمێ و عیراقێ هاتینە پەراوێزكرن و مافێن دارایی و مەعنەویێن كرێكاری دهێنە بەرزەكرن.
*كرێكاری هیچ گەرەنتی نینە و لژێر گەفێن دەرێخستن و ژدەستدانا كاری نەچارن گەلەك مەرجا لسەر خۆ قەبوول بكەن وەكو دەمژمێرێن زێدە یێن كاری و كریا كێم و نەبوونا رۆژێن بێهنڤەدان و نەبوونا مەرجێن سەلامەتی و ساخلەمیێ ل جهێن كاری.
كرێكار ژیانەكا ب روومەت دخوازن، بیما ساخلەمیێ ژێرا بهێتە مسوگەركرن، پاشەرۆژا وان و خێزان و زارۆكێن وان بهێتە پاراستن
*ژئەگەرێ رەوشا ئاڵۆزا ژیانێ بەردەوام هژمارا زارۆكێن كرێكار زێدە دبیت، كو ئەڤە بخۆ دیاردەكا ڤەدەرە ژ جاڕنامێن نێڤدەولەتیێن مافێن زارۆكان.
ل ڤی وەلاتی كرێكار ناخازن گوهداریا پەیڤ و رستە و دوریشمێن بریقەدار و دەم بسەرڤە چووی بكەن، بەلكو دخوازن ئەو یاسا بهێنە جێبەجێكرن یێن ژیانا خێزانێن وان دابین دكەن و ئاستێ ژیارا وان باشتر بكەن.
كرێكار ژیانەكا ب روومەت دخوازن، بیما ساخلەمیێ ژێرا بهێتە مسوگەركرن، پاشەرۆژا وان و خێزان و زارۆكێن وان بهێتە پاراستن.
كرێكاران دخوازن دادپەروەریا كۆمەڵایەتی هەبیت، دەلیڤێن كاری هەبن، خواندنا زارۆكێن وان ژی ل ئاستێ كوڕ و كچێن مەزنە بەرپرس و دەولەمەندان بیت.
لەوڕا دبێژین: جەژنا كرێكاران ب چ رووی ڤەگەڕیا و ب چ رووی پیرۆز بكەین و شەڤانە رۆندكێن حەسرەتێ هناڤێن بهزاران بابێن كرێكار دشەوتینن، ب هزاران زارۆك ب دلێن پڕی خوزی بەلێ ب چاڤێن زل بەرێ خۆ ددەنە دەستێن بابێن خۆ یێن پڕی برین و كول.
