عەتا تەها
زیاتر لە سێ دەیەیە، لە هەرێمی کوردستان، حکومڕانییەکی خۆیی هەیە و لەم ماوەی خۆبەڕێوەبەرییەدا رووداوی گرنگ و گەورە هاتوونە پێش، چ لە ناوخۆی هەرێم و چ لە دەرەوە و ناوچەكە، بەتایبەتی گۆڕانكارییە دەرەكییەكان كە روخاندنی رژێمی دیكتاتۆری عیراق و سەرلەنوێ بنیاتنانەوەی وڵاتی لێكەوتەوە.
چەندین رووداوی گرنگی تر لەنێویاندا رووخانی بەشێك لە دەوڵەتە عەرەبییەكان لە رێگەی شەپۆلی بەهاری عەرەبییەوە.
ئەوەی تری كە پەیوەندیی بەناوخۆوە هەبووە، بەداخەوە رووداوی ناخۆش و تاڵە کە مێژوو تۆماری كردووە و پەڵەیەكی رەشە بەنێو چاوی ئەو هێزانەی كە هۆكاری سەرەكی دروستبوونی شەڕی ناوخۆ و لێكترازانی كۆمەڵگە و لایەنە سیاسییەكان بوون.
دەبێت وەبیرهێنانەوەی رابردووی تاڵ بۆ پەند وەرگرتن و ئەزموونكردن و بەخۆداچوونەوە بێت، ئەگەرنا لە ئازار زیاتر هیچ سوودێكی نییە، بەڵام بۆ وەبیرهێناوە و راچەڵەكینی دەسەڵاتی كوردی، زۆر گرنگە ئێستا هەڵوەستەی لەسەر بكرێت، تا بۆ تێپەڕاندنی قەیرانی سیاسی تەنها شتێك كاری لەسەر بكات هەستكردن بێت بە مەترسیی ترسناكی بار و دۆخی ئاڵۆزی سیاسی ناوچەكە، بۆ چارەسەری ئەو پرسە ناهەموارە کە هەرێمی پێدا تێپەڕ دەبێت، بارودۆخەكە بەهەند وەربگیرێت ئەوەش بە سیاسەتی بەخۆداچوونەوە و یەك گوتاریی سیاسی و رێكخستنی نێوماڵی كورد دەکرێت.
بەپێچەوانەوە پیلانی ئیقلیمی و تەنانەت نێودەوڵەتیش، قەوارەی هەرێم دەخاتە بەردەم مەترسی گەورە و نزیك لە لێواری كەوتن، چونكە لە جیهانی سیاسەت و دیپلۆماسی و حكومڕانیدا، پێش هەرشتێك یەك هەڵوێستیی ناوخۆ و یەك گوتاری سەرنجی دەرەوە رادەكێشت و مامەڵەی بەرامبەر لەسەر ئیرادە و توانا و هێزی بەرامبەر رادەوەستێت، دەرەنجام بە هەردوو دیوی ئەرێنی و نەرێنیدا رۆڵی دەبێت.
ئەگەر هەرێمی كوردستان هێزی سەربازی رێكنەخاتەوە و لەژێر چەتری حكومەتدا نەبێت، ئاخۆ دۆستە نێودەوڵەتییەكانی مامەڵە و سەودا لەگەڵ كێدا بكەن؟
هاوكات حكومەتی فیدراڵی لە رووی ئابووری و سیاسی و كارگێڕییەوە، مامەڵە لەگەڵ كێ و كام هێز بكات؟
دەوڵەتە دۆستەكانی كورد، تەنانەت حكومەتی فیدراڵییش، بەم شێوازەی ئێستا لە حكومڕانی، نازانن چۆن مامەڵە لەگەڵ ئەو بارودۆخەدا بكەن؟ خۆ رەنگە بەغدا لە زۆر بابەتدا لەسەر حەق نەبێت، وەلێ نەبوونی یەك گوتاریی سیاسی و پەرتەوازەیی نێوماڵی كورد هۆكارە بۆ پێداگریی لایەنی بەرامبەر و دەرەنجامەكەش ئاوا دەبێت كە ئێستا كوردی تێكەوتووە ، هەربۆیە درێژەدان بەو بارودۆخەی ئێستا، لە ئایندەدا دەبێتە مەترسییەكی ترسناك بۆ سەر قەوارەی هەرێم، بۆیە هێشتا كات ماوە و كار لە كار نەترازەوە، پێویستە سەركردایەتی كورد سوود لەو دەرفەتە وەربگرێت كە لەپێشی ماوە، ئەگەرنا بە زیانی گەورە كۆتایی دێت و دۆخەكە لەدەست دەردەچێت كە دڵنیام هیچ كوردێكی نیشتمانپەروەر خوازیاری ئەمە نییە.