شوخت

تەبیبی دەردی كورد

08:01 - 2022-05-08
سه‌رتیپ جه‌وهه‌ر‌
105 خوێندراوەتەوە

كوردستان وەك سێبەڕۆی  گرتبێت رۆژ لەدوای رۆژ دەردەكەی گرانتر دەبێت، ئەگەر بەمشێوەیەی ئێستاش بەردەوام بێت لێمان موحەقەق بێت هیچ چارەسەرییەك نامێنێت و مەترسی ستراتیژیی دەكەوێتە سەر بوون و مانەوەی ئەم قەوارەیە كە تەنها خوادەزانێت چ قوربانییەك لەپێناویدا دراوە.
ئاخر دەرد لەوە گرانتر؛ لەگارەو مەتین لە قووڵایی خاكی هەرێمی كوردستان شەڕ لە نێوان سوپای توركیا و پەكەكەیە، لە شنگال كە هێشتا برینی كۆمەڵكوژیی داعش خوێنی لێ‌ دەچۆڕێت شەڕ و پێكدادان و گرژیی لە نێوان سوپای عیراق و هێزەكانی یەبەشە هەیە، بەشێك لە حكومڕانانی هەرێم هەموو هەوڵێك دەدەن سوپای عیراق لەو ناوچەیە جێگیر بكرێت.
پەرلەمانی كوردستان لەكاركەوتووە و توانای بڕیاردان، یاسا دەركردنی نەماوە، حكومەتی هەرێم وەك (پیاوە نەخۆشەكە)ی لێهاتووە، یەك دوو مانگ جارێك كۆبوونەوەیەكی ئەنجومەنی وەزیران دەكات و وەزیرەكانی دەبینرێن دەتوانین بڵێین گۆد بووە، ئەوە هەڵبژاردن لەوادەی خۆیدا ناكرێت كە بڕیاربوو مانگی 10ی ئەمساڵ بكرێت، ئیدی چەند مانگێكی دیكەیە دەبێ‌ خۆمان بۆ دەستەواژەی (حكومەت و پەرلەمانی) ماوە بەسەرچوو ئامادەبكەین، حكومەتەكەی نازانێت كەی مووچە دابەشدەكات و هی چ مانگێكە، نازانین كێ‌ حوكمڕانە و كێ‌ ئۆپۆزسیۆن، چونكە هەرهەمووی ناڕازییە.
لە بەغداش كورد بووە بە ئاردی ناو دڕك. لەپرسی پێكهێنانی كابینەی نوێی عیراق، نەك ئەجێندای هاوبەشی نییە، بەڵكو گوللە بەسێبەری یەكترییەوە دەنێن، هەریەكە لە دۆڵێكە و دەنگیشیان ناگاتە یەكتر، جاران یەك دەستە و یەك دەنووك بوون، ئێستا دووان و سێیان و زیاتر.
جاران لەگەڵ پێكهێنانی هەر كابینەیەكی نوێی بەغدا، باسی كەركوك دەهاتەوە گۆڕێ، لە نێو كارنامەی كورد جێی دەكرایەوە، مەخابن شەش ساڵە باسی كەركوك و ناوچە دابڕێنراوەكان ناكەن،  پارێزگارەكەی كورد بوو، ئەویشمان لەكیس چوو، شەست ساڵە ململانێی و ناكۆكی بزووتنەوەی كورد لەگەڵ بەغدا لەسەر كەركوك بووە، كەچی پێنج ساڵە بەهۆی ناكۆكییەكانەوە ناتوانرێت پارێزگارێكی كورد بۆ شارەكە هەڵبژێردرێت!
 ئەوەی سەرەوە، بەشێكە لە دیمەنەكانی ناو تابلۆی سیاسی كوردستان لەناوخۆی هەرێم  و بەغدا. لەسەرەتای رووخانی رژێمی سەدام، كورد لە عیراق كۆكەرەوەی شیعە و سوننە بوو، هەرێمیش عیراقە جیاوازەكە بوو، كەچی ئێستا پێچەوانە بۆتەوە، نە هۆكاری كۆكردنەوەی شیعە و سوننەیە و نە عیراقە جیاوازەكەیە! بەڵكو بەدەست سەد دەردەوە گیرۆدە بووە و تەبیبێكیش نییە چارەی بكا. 

وتارەکانی نوسەر