جوتیارێك له ئه‌وروپا كاتێك كێڵگه‌یه‌كی كشتوكاڵی داده‌مه‌زرێنێت و كاری چاندن و رواندن بۆ به‌رهه‌مێكی كشتوكاڵیی دیاریكراو ده‌كات، پێشتر لێكۆڵینه‌وه‌و هه‌ڵسه‌نگاندنی كردووه و تاقیكردنه‌وه‌ش له‌سه‌ر به‌رهه‌مه‌كه ده‌كات، ئه‌وكات ده‌ست به جێبه‌جێكردنی پڕۆژه‌كه‌ی ده‌كات، هه‌ڵبه‌ته لێكۆڵینه‌وه‌كان بۆ ده‌رخستنی له‌باریی و گونجاوی شوێنه‌كه و كوالێتی به‌رهه‌م و سه‌ره‌نجام سه‌ركه‌وتنی پڕۆژه‌كه‌یه، بۆ ئه‌وه‌ی له داهاتوودا قازانج بكات و خه‌ڵك له به‌رهه‌مه‌كانی رازی بێت و بازاڕ بۆ ساغكردنه‌وه‌ی به‌رهه‌مه‌كانی مسۆگه‌ر بكات، به‌ڵام دوای قۆناغی به‌رهه‌مهێنان، قۆناغێكی دیكه ده‌ست پێده‌كات، كه گرنگییه‌كه‌ی له گرنگی قۆناغه‌كانی دیكه كه‌متر نییه، ئه‌ویش قۆناغی به پاكێجكردنه.
ئه‌و به‌رهه‌مانه‌ی له بازاڕ و ماركێته‌كانی ئه‌وروپادا ده‌خرێنه روو و بۆ فرۆشرێن داده‌نرێن، جیاوازن له‌وانه‌ی لای خۆمان، بۆ نموونه به‌رهه‌می كاهو له ئه‌وروپا هاوشێوه‌ی كه‌له‌رم خڕه و گه‌ڵاكانی پەرش و بڵاو نییه و ئاسانتر ورد ده‌كرێت بۆ زه‌ڵاته، ئه‌م به‌رهه‌مه بۆ ئه‌وه‌ی تێك نه‌چێت له‌گه‌ڵ كه‌له‌رم و برۆكلی به نایلۆن داپۆشراون، جیاوازییه‌كه‌ی ده‌گه‌ڕێته‌وه بۆ جۆری تۆوه‌كه‌ی و په‌یوه‌ندی نییه به خاك و ئاو و هه‌واوه، لای خۆمان ئه‌م جۆره كاهوه ناڕوێنرێت، به‌و شێوه‌یه‌ش ئاماده ناكرێت بۆ فرۆشتن.
هه‌روه‌ها له‌ماركێته‌كانی ئه‌وروپادا زه‌ڵاته‌ی ئاماده‌كراو به‌شێوه‌یه‌كی نموونه‌یی و ته‌ندروست بۆ به‌كاربه‌ران دابینكراوه و له شوێنی سارددا دانراوه، ئه‌م شێوازی دروستكردنی زه‌ڵاته‌یه له كارگه‌دا ئاماده ده‌كرێت و ده‌رفه‌تی كاری بۆ چه‌ندین كه‌س ره‌خساندووه، بیبه‌ری شرینی ره‌نگاوڕه‌نگ یه‌كێكه له به‌رهه‌مه سوودبه‌خشه‌كان و بۆ پێست و شێداریی و مانه‌وه‌ی جوانی روخسار به‌سووده، بۆیه پێویسته ئه‌و جۆره بیبه‌رانه لای خۆشمان گرنگیی تایبه‌تی پێبدرێت.
به‌رهه‌می په‌تاته یه‌كێكه له به‌رهه‌مه سوودبه‌خشه‌كان بۆ ته‌ندروستی و وزه‌ی مرۆڤ كه خۆراكێكه به چه‌ندین جۆر ئاماده ده‌كرێت، كاتێك ده‌چیته ماركێته‌كانی ئه‌وروپا ده‌بینی به‌شێك بۆ فرۆشتنی په‌تاته ته‌رخانكراوه، خراوه‌ته زه‌رفێكی ئاماده‌كراوی پێنج كیلۆ گرامی و به نرخێكی گونجاو ده‌فرۆشرێت، هه‌ر كه‌سێك كه ده‌یكڕێت زه‌رفێك ده‌باته‌وه، واته فرۆشتنی به كیلۆ نییه، به‌رهه‌می پیازیش به هه‌مان شێوه ئاماده‌كراوه و ده‌فرۆشرێت، یان ده‌بینیت به‌رهه‌می ته‌ماته له ماركێته‌كان خراوه‌ته قاپی پلاستیكی و به نایلۆن داپۆشراوه هه‌ر قاپێك شه‌ش ته‌ماته له‌خۆ ده‌گرێت، یان به‌رهه‌می هێلكه له ماركێته‌كاندا خراوه‌ته شانه‌ی پلاستیكی و كارتۆنه‌وه و داپۆشراون، شانه‌ی چوار هێلكه‌یی و شه‌ش هێلكه‌یی و هه‌شت هێلكه‌ییش هه‌یه، وه‌ك لای خۆمان نییه شانه‌یه‌ك 30 هێلكه‌ی تێدا بێت و داشنه‌پۆشراوە.
مه‌به‌ست له خستنه‌ڕووی ئه‌م چه‌ند نموونه‌یه ئه‌وه‌یه، به‌رهه‌مه‌كان پێویسته به پاكێجكراوی ئاماده بكرێن و بخرێنه بازاڕه‌وه بۆ ئه‌وه‌ی ده‌ستی هێزی كار زیاتر بجوڵێت و ده‌رفه‌تی كار باشتر دابین بكرێت. پاشان به‌رهه‌مه‌كان دابپۆشرێن بۆ ئه‌وه‌ی پارێزگاری له تێك نه‌چوونیان بكرێت و له رووی ته‌ندروستی و پاكژییه‌وه سه‌لامه‌ت و پارێزراو بن، هه‌روه‌ها بۆ ئه‌وه‌ی جوتیاران به‌رهه‌مه‌كانیان نموونه‌یی بێت و تۆوی به‌رهه‌مه‌كانیان كوالێتی به‌رز و له جۆری زۆر باش بێت، تا متمانه‌ی خه‌ڵك به‌ده‌ست بهێنن.
