هەوڵدان و کارکردن بۆ دابینکردنی کارەبای (24) سەعاتی، هەنگاوێکی ئەرێنی و سوودبەخشە و لە مێژە خەڵکی کوردستان خوازیارن سیستمی کارەبای نیشتمانی هەمیشەیی و بەردەوامیان بۆ دابین بکرێت.
ئێستا توانراوە بەشێوەیەکی ئەزموونی لەچەند گەڕەکێکی شاری هەولێر و سلێمانی سیستمی کارەبای (24) سەعاتی پەیڕەو و دابین بکرێت، لەبەرنامە و پلانیشدایە لەداهاتوودا سیستمەکە سەرجەم هەرێمی کوردستان بگرێتەوە.
ئەوەی ئێستا بووەتە مایەی مشتومڕ و نیگەرانیی ئەو نرخەی دیاریکراوە بۆ بەکارهێنانی کارەبا، لە ئاست توانای داهات و دارایی مانگانەی هەموو خێزانێک نییە تا بتوانێت تێچووی بەکارهێنانی کارەبا دابین بکات.
هەرچەندە بڕینەوەی نرخی زۆر، هۆکارە بۆ ئەوەی خەڵک ناچار بێت کارەبا کەمتر بەکاربهێنێت و بەفیڕۆدان نەمێنێت، بەڵام لێکدانەوە و هەڵسانگاندن بۆ توانای دارایی خێزان پێویست و گرنگە، بۆ نموونە لەهەندێک وڵاتی ئەوروپا کرێکارێک مانگانە کاربکات لانیکەم (3000) یۆرۆ وەردەگرێت، ئەگەر کاریش نەکات و لەسەر سۆشیال بێت، مانگانە (1800) یۆرۆ وەردەگرێت، بەڵام مانگانە پارەی غاز و کارەبا ئەگەر لەڕووی ژمارەی خێزانەوە زۆر بن، ناگاتە (100) یۆرۆ، بەڵام لە کوردستان چی کرێکار و فەرمانبەرێک، یان بێکارێک ئەو مووچە و داهات و دەستکەوتەی هەیە تا پابەند بێت بەو نرخەی دیاریکراوە؟ مانگانە پارەی کارەبا بدات، یان بەدواداچوون و دیراسەی وڵاتێکی دراوسێی وەک ئێران بکرێت، خەڵک داهاتی ئێجگار کەمە و کارەبا و غازی بەردەوام بۆ ماڵان دابینکراوە، بزانرێت مانگانە چەند پارەی کارەبا وەردەگیرێت، بەجۆرێکە هیچ کەسێک نیگەران نییە لەنرخی بەکارهێنانی کارەبا.
لەگەڵ ئەونەشدا سەبارەت بە چۆنێتی بەکارهێنانی کارەبا، هۆشیاریی هاووڵاتیان پێویست و گرنگە، بۆ نموونە خەڵک ئەگەر لە ژوورێک نەبێت، پێویست ناکات گڵۆپی رووناکی ئەو ژوورە پێ بێت، یاخود پێویست ناکات لەبەر دەرگا و سەقفی خانوو ئەو هەموو گڵۆپە رەنگاو رەنگە بەکاربهێنرێت و قورسایی لەسەر کارەبای گشتی دروست بێت.
لەگەڵ ئەوەشدا لە کوردستان سیستمی گەرمکردنی ئاو و گەرمکردن و ساردکردنی ماڵان بە کارەبایە، وەک وڵاتان بە غاز و ئامڕازی دیکە نییە، ئەمەش بەکارهێنانی ئەمپێرێکی زۆری کارەبای دەوێت و دەرەنجام پارەیەکی زۆر دێتەوە بۆ هاووڵاتی ئەگەر بەو پێوانە و سیستمە بێت.
بۆیە ئەو بەرنامە و نرخەی دانراوە، بۆ نرخی پارەی رووناکی بەردەوام، پێویستی بە هەڵسەنگاندن و پێداوچوونەوەیە و بەو شێوەیە لەتوانای هەڵسوڕاندنی دارایی زۆرینەی هاووڵاتیاندا نییە و ناڕەزایەتی لێدەکەوێتەوە.
