كـه‌ژاڵ ئه‌حمه‌د
پاش ئەوەی سەرۆکی ئێران بە رووداوی کەوتنەخوارەوەی هێلیکۆپتەر لەگەڵ چەند گەورە بەرپرسێک، گیانی لەدەستدا، پرۆسەیەکی پێویست و لەناکاو ژیانی سیاسیی ئەو وڵاتەی هەژاند، ئەویش هەڵبژاردنی سەرۆکێکی نوێ بوو بۆ وڵاتێک کە تا بینەقاقای غەرقە لە ناکۆکی و ململانێدا و بەدەست کۆمەڵێک قەیرانی گەورەوە دەناڵێنێت، لەگەڵ هەموو ئەوانەشدا خۆی لەو پرۆسە دیموکراسییە نەدزییەوە کە ناوی هەڵبژاردنە. سەرسامیی خۆم ناشارمەوە بۆ گەلانی ئێران کە بە سەدان کەسیان لە شۆڕشی(ژن ژیان ئازادی)ی ژینا ئەمینیدا شەهیدبوون و بە هەزارانیشیان راپێچی زیندان کران و چەند کەس لەو وڵاتە دەژین نیوەی ئەوەش وەک پەناهەندە و موعارەزە لەدەرەوەیدا چاوەڕوانی کەرەمی خوا و گۆڕانکارین، کەچی لە ماوەیەکی قیاسیی کورتدا بڕیاری هەڵبژاردنی سەرۆکی نوێ دەدرێت و لەم رۆژانەی پێشوودا هەڵبژاردن ئەنجامدراوە و راگەیاندنی ناوی سەرۆکە نوێیەکەیشیان زۆر نزیکە!.
دەوڵەت ئاوا دروست دەبێت گەلی برادەرینە، بەوجۆرەش بەردەوامیی پێ دەدرێت، نەتەوەیش بەوجۆرە دەمێنێتەوە و لەناو ناچێت، نەک بەو گەمەی دەیکەم نایکەمەی هەڵبژاردن لە لای خۆمان کە ماوەیەکی زۆرە کاتی پێ دەکوژرێت و بەهۆی دوودڵی و رارایی پارتییەوە ئێستاش روون نییە هەڵبژاردنی پەرلەمانی کوردستان لە دووەم وادەی دانرا و بۆ پرۆسەکەدا، دەکرێت یان ناکرێت؟!.
خوێندنەوەی جیهانی دەرەوە بۆ دیموکراسیبوونی گەلان، لە روانگەی ئەو هەنگاوانەوەیە کە بە کردار لێمانی دەبینن، نەک بەو پەخشان و راو وڕێوییانەی دەیانهێنینەوە، حەقیقەت ئەوەیانە کە ناتوانرێت خۆڵ بکرێتە چاویەوە و بەلاڕێدا ببرێت. نەک هەنجەت هێنانەوە. بەڕاستی مەراقێکی گەورەیە کوردبوون ئومێدی بە هێزێک بێت، لە ئاستی بەرپرسیارێتی قۆناغە سەختەکاندا نەبێت. ئاخر مایەی نیگەرانیی نییە ئەوانەی پێیان دەڵێین سەردەست و دیکتاتۆر و داگیرکەر لە ئێمە دیموکراسی تر بنوێنن!!.
دڵم ژان دەکات بۆ رەنج و خوێنی قووربانیان و شەهیدانی رێگای رزگاری کوردستان، بۆ ئەو میللەتەی چاوی لەهیممەتی یاریزانێکە کەس نازانێ بۆ نایکات، تۆبڵێی کێشەکانی ئەو لە کێشەکانی وڵاتی ئێران سەخت تربێت؟ ئەی بۆ ئاوا بێباکە بەرانبەر بە پرۆسەیەک کە سوور دەزانێت شەرعییەتی یاسایی بۆ دامەزراوەکانی هەرێم دەگەڕێنێتەوە؟
هەڵبژاردن ئەو هێزە نەرمەیە کە بە شێوازێکی شارستانی و بێ توند و تیژی و زیان، خەڵکی خاوەن بیروڕای جیاواز دەهێنێتە سەر سندوقەکانی دەنگدان و گۆڕانکاریی بە رێگەیەکی یاسایی و ئازاد بەرپا دەکات، مافی دەنگدەر و رای تاکەکانی کۆمەڵگە دەکاتە تانوپۆی نەخشەیەکی ستراتیجی. جێگەی خۆشحاڵییە کە یەکێتیی و ژمارەیەک حزبی کوردیی پێداگرییەکی سەرسەختانە لە ئەنجامدانی دەکەن، ئەمە تیشکی ئومێدێکە چاوەڕوانی دەروی خێری لێ دەکرێت.
