دیدێکی شیکارییە بۆ ڕووداوەکان
بەشێكی دیاری میدیاكانی جیهان و ناوچەكەو وڵاتانی عەرەبییش، لە گواستنەوەی رووداوەكانی ناوچەی رۆژهەڵاتی ناوەڕاستدا، بایەخێكی وردیان بە رووماڵكردنی ئۆپەراسیۆنە سەربازییەكانی(جنگ -قفڵ)ی سوپای توركیا داوە، كە نزیكەی مانگێكەو تائێستا لەناو خاكی هەرێم و عێراقدا روودەدەن و درێژەیان هەیە.
ئاماژەیەكی ئەم بایەخدانە، ئەوەیە كە ئەمجارەیان پرۆژەی هاتنە ناوەوە، بەو قوڵایی و فراوانخوازییە، پرۆژەیەكی ستراتیژیی سەربازی و ئەمنیی ئامانجدارە. ئەردۆگان، پێیوایە چەند ناوچەیەكی كەم ماون كە بەم نزیكانە كۆنترۆڵ دەكرێن، بەوەش ئامانجی ئۆپەراسیۆنەكان دەهێننەدی، كە لە روانینی ئەواندا، بڕینی پردی پەیوەندیی نێوان قەندیل و رۆژئاوای كوردستانەو رێگرتنە لە ئەگەری هەر چالاكییەكی پەكەكە لەناو خاكی وڵاتەكەیاندا.
ئەوەی لەم پەرەسەندنە سیاسییە -سەربازییە – ئەمنییەدا، كەم و زۆر، تیشكیان ناخرێتەسەرو بگرە بە پەردەپیادانێكی میدیایی و سیاسی و دیبلۆماسیی ترسناك بەڕێوەدەچێت، قەبارەی ئەو زیانە مادی و مەعنەوییانەیە كە لەهەرێمی كوردستان و تا رادەیەكیش لە عێراق دەكەون. ئەو ئۆپەراسیۆنانە، یەك لەسەر چواری پارێزگای دهۆكیان كردۆتە ناوچەیەكی سەربازی، واتە چۆڵكراو لە ئاوەدانی و شوێنی گونجاوی ژیان. میدیاكان، بە میدیای توركیی خۆیشییەوە، رێپێدراونین كە رووماڵی دۆخی مەیدانیی ئەو رووبەرە لە جوگرافیای سیاسیی هەرێم بكەن كە ئاوەدانییان تێدا نامێنێت و دەبنە رێڕەوی نوێی سەربازی و سەربازگەی نوێ. لەگەڵ ئەم پەرەسەندنانەدا، بە ئاشكرا ئەوە دادەپۆشرێت كە ژمارەی بنكە سەربازییەكانی توركیا لەناو خاكی هەرێم و لە چوارچێوەی ستراتیژی سەربازیی جنگ قفڵ -دا، بۆ سەرو(70) بنكە هەڵكشاوە: 17یان لە سیدەكان و مێرگەسور، 23یان لە ئامێدی، 31یان لە زاخۆ، تا تشرینی دووەمیش، كە بەپێی یەشار گولەر-ی وەزیری بەرگری توركیا، دوا وادەیە بۆ كۆتایی ئۆپەراسیۆنەكانیان، چەندین بنكەی تریش دەكرێنەوە، هەموو ئەمانەش لەسەر حسابی جوگرافیای ئاوەدانی و زێدی هاووڵاتیانی ئەو سنورانەی هەرێمی كوردستان و كەرتەكانی كشتوكاڵ و گەشتیاری و ئاژەڵدارین.
میدیاكان، بە میدیای توركیی خۆیشییەوە، رێپێدراونین كە رووماڵی دۆخی مەیدانیی ئەو رووبەرە لە جوگرافیای سیاسیی هەرێم بكەن كە ئاوەدانییان تێدا نامێنێت
نەبینراوی تری ئەم پەرەسەندنانە، ئەوەیە كە نە عێراق و نە بەرپرسانی هەرێم گرنگی بەوە نادەن كە سوپای جێگیركراوی توركیا لە سەربازگە كۆن و نوێكانی ناو هەرێمدا ناچنە دەرەوە، ئەو ناوچانە بەجێناهێڵن كە هێڵی پاسەوانیكردنی سنوری ستراتیژیی سەربازیی توركیایە. ئەنكەرە، بە ئەركێكی راگوزەرو كاتی بنكەی سەربازیی نوێ لە عێراق و هەرێمدا ناكاتەوە، لیژنەكانی بەدواداچوونی راستیی سەربە دەوڵەتی عێراقیش ناتوانن سنورێك بۆ ئەو ئەركە سەربازییانە دابنێن كە ستراتیژیی سەربازیی نوێی توركیا دایڕشتووە، تەنانەت توانای تێپەڕاندنی ئەو هێڵانەیان نییە كە لەگەڵ ئەم ئۆپەراسیۆنانەندا بوونەتە ناوچەی قەدەغەكراوی سەربازی.
بەمانایەكی تر، ئەنكەرە، رێكەوتنە ئەمنییەكانی نێوان خۆی و بەغدا و هەولێر، بە دەرفەتێك دەزانێت بۆ دەستگرتن بەسەر زۆرترین رووبەری جوگرافیدا، سوپاس و ستایشكردنی هاوكاریی هەردوو پایتەختیش، بەغداو هەولێر، هەر بۆ بێ ماناكردنی هەندێ رێكاری بەغدا نییە كە وا دەردەكەوێت لەگەڵ ئەو ئۆپەراسیۆنانەندا نەبێت ئەگەرچی وەزیری دەرەوەی عێراق هەر رەتیشی دەكاتەوە كە هەبن!، بەڵكو بۆ دروستكردنی فشاری زیاتریشە لەسەر(ی.ن.ك) كە تا ئێستا نایەوێت لەسەر بنەمای ئیبتیزازی سیاسی و سیخوڕیی میدیایی ناوخۆیی، بچێتە ناو گەمەیەكەوە كە شەرعییەت بە فراوانخوازیی زیاتری توركیا لەناو خاكی هەرێمدا بدات و، سوپای ئەو وڵاتە، لە زاخۆوە تا كفری، بە بیانووی راوەدوونانی بەرهەڵستكارانی دەوڵەتەوە، بڵاوببنەوە.
مەشقکردنی سەربازانی تورکیا لەناو یەکێک لە بنکە سەربازییەکانیاندا لە هەرێم
