عەتا تەها
کەرکوک شارێکی کوردستانیی بووە و ئێستاش سەرەڕای کاریگەریی حکومەتە یەک لەدوایەکەکانی عیراق لەڕێگەی تەعریب و تەبعیس و تەرحیلکردنەوە، هەڵبژاردنەکان کوردستانیبوونی پشتڕاستتر دەکەنەوە
بەگوێرەی هەموو بەڵگەنامە مێژوویی و ئیدارییەکانی رابردووش بێت کەرکوک شارێکی کوردستانی بووە، ئەگەرچی لەژێر کاریگەریی حکومەتە یەک لەدوایەکەکانی عیراقدا لەڕێگەی پیادەکردنی سیاسەتەکانی تەعریب و تەبعیس و تەرحیلەوە هەوڵدراوە رێژەی کورد کەم بکرێتەوە لەو شارەدا، هاوکات چەندین شێوازی تریش تاقیکراوەتەوە کە تەنها ئامانج لێی گۆڕینی دیمۆگرافیای راستەقینەی شارەکە بووە، بەڵام سەرباری تاقیکردنەوەی هەموو ئەو شێوازە نادیموکراسی و نادەستوریی و نایاساییانە، کەچی هێشتا لە دواهەمین هەڵبژاردنی ئەنجومەنی پارێزگاکانی عیراقدا، جارێکی تر کورد بۆ جیهانی سەلماند کە لە ناوچەکەدا هێزی یەکەمە بەراورد بە پێکهاتەکانی تر بە تایبەتی لە کەرکوک.
ئەمەش ئەو راستییە دەردەخات کە دیمۆگرافیای ناوچەکە بەهیچ هێزێکی سیاسی و بەهیچ زەبر و زەنگێک ناگۆڕدرێت و ئەنجامی هەڵبژاردنەکان و بردنەوەی کوردیش سەنگی مەحەک بوو، کوردستانیبوونی کەرکوک و ناوچە دابڕێنراوەکانیش کە ناونراون ناوچە جێناکۆکەکان، ئەو راستییەی بۆ هەموو جیهان دەرخست،
لەگەڵ ئەوەشدا نابێت ئەوەمان لەبیربچێت کە ئەگەرچی کورد هێزی یەکەمی ناوچەکەشە، بەڵام نایەوێت حکومڕانیەکی تاکڕەوانە بکات، بەڵکو بە پێچەوانەوە دەیەوێت حکومڕانییەکی تەندروست بکات لەو ناوچانە بە لەبەرچاوگرتنی تەواوی پێکهاتە و ئایین و ئاینزاکان، چونکە کورد بۆخۆی بەو قۆناغەدا تێپەڕیوەو تەنها میللەتە لە زوڵم و ستەم تێدەگات، بۆیە چیتر نایەوێت هیچ پێکهاتەیەک هاوشێوەی رابردووی خۆی بچەوسێنرێتەوە.
هەڵبەت تێڕوانینی یەکێتیی نیشتمانیی کوردستانیش، تێڕوانینی دۆستانە و پێکەوەهەڵکردن و پێکەوەژیانە لەگەڵ تەواوی پێکهاتە جیاوازەکانی کەرکوک، بەمەبەستی هێنانەئارای سەقامگیریی سیاسیی و بەرقەرارکردنی ئاشتیی کۆمەڵایەتی لەو شارەدا.
