عەزيز شەمو ئەلياس*
پشتی بۆرینا نێزیکی ده سالان ژ فەرمانا تیرۆرستێت (داعش) ب سەرێ ئێزدیان ئینای ل 3 تەباخا سالا 2014، ب تایبەت هاولاتیێت سڤیل خەلکێ شنگال و دەوروبەر نە ژبەر چوو تنێ، چونکە ناسنامە ئێزدی و بیر و باوەرێت ئێزدیاتی بوونێ، ب مخابنی هێ خەلکێ مە ل کەمپان ئاوارەنە، هێ بەهرا بتر ژ گوند و کۆمەلگەهێت شنگال ژ پاشماوێت مین و تەقەمەنیان نە هاتینە پاقژ کرن، هێ رەوشا ژیانەکە نۆرمەل و سورشتی بۆ خەلکێ نەهاتیە دەستەبەرکرن، دەڤەر ب گشتی ژ بێ خزمەتگوزاریێ دنالت، هاوولاتی ل شنگال و دەوروبەر د رەوشەکە هنجی بێژی خراب دانە، دگەل هندێ ژی راستییەک هەیە دڤێ ئەم ئاماژێ پێ بدەین و دان پێ بنێین ئەو ژی هەر خەلکێ شنگالە قوربانی نها و بەرێ و مخابن دبە ل پاشەڕۆژ، هەر ئەوە ئەرکێ ئاڤەدانی و پاراستنا شنگال ل ستۆیی دایە، هەر ئەوە دکارە گوند و کۆمەلگەهێت خۆ ئاڤەدان کەت و ب بت خوەیێ وان، راستە خەلکێ ور و دەڤەرا وان د رەوشەکە خراب دانە و پێتڤی دەستێ هاریکاریێ نە، پێتڤی پشتەڤانی و خزمەتگوزاریا نە، ب تایبەت خزمەتگوزاریێت فەر یێت ژیانێ مینا ئاڤ و کارەب وساخلەمیێ و رێگەوبان و خوێندگەهان وهتد..
رەوش خرابە راستە، بەلێ پا پرس ئیرۆ ئەوە گەلۆ ب مانا وان ل خیڤەتگەهان و ل ئاوارەیێ دێ رەوشا وان بێ چارەسەر کرن.?
نەخێر.. کورمانج دبێژن کەس هنجی خودانی هەست ب ئێش و ئازارا خۆ ناکەت و دەستێ خودانی دزانت کێدەرا خوەیی دخوریێت، فەرە قازانج بێ وەرگرتن ژ سەربۆرا هاوولاتیێت ئێزدی خەلکێ باشیک و بحزانێ، هەلبەت ئەو ژی ئاوارەبوون مینا خەلکێ شنگال بەلێ پا دگەل رۆژێت ئێکێ ژ رزگارکرنا دەڤەرێت وان، ل پێشیێ وان جهێت پیرۆز (مەزار و قوبێت) بابچاک و خاسێت خۆ ئاڤاکرن ب هاریکاریا خێرخوازێت ئێزدیان وب ئمکاناتێت خۆمالی یێت کێم و پاشی ژی هەموو ڤەگەران جهووارێت باڤ و کالا و سوپاس بۆ خودێ دەڤەرا وان بتر ژ سالانێت بەری ئاوارەبوونی نها ئاڤەدانە ورەوشا وان ب گەلەکێ باشترە، لەورا ل هێرە ئەزێ دووبارە بێژم ڤەگەرانا وە (خەلکێ شنگال) بۆ گوند و کۆمەلگەهێت وە ل شنگال و دەوروبەر ئەرکەک ئایینی پیرۆزە هەر دڤێ بێ ئەنجامدان و چەند رۆژ زووتر بە باشترە بۆ وە و ئێزدیاتیا وە، هەلبەت ئوون قەهرەمان و خۆ ڕاگرن، وە ب باوەرا خۆ یا پۆلایین هێز و تانک و زریپۆشێت چەتە و چەکدارێت تیرۆریستێت (داعش) تێکشکاندن و خەونا دەولەتا وان ژ ناڤبر، وە ب قوربانی دانا خۆ پیلانێت دوژمن و نەیاران بن گۆرکرن، ئوون هەژی ژیانەک ئازاد و سەرفەرازن.
* بەڕێوەبەری نوسینگەی کاروباری ئێزدیان