سەیری پرۆشەری یادەکەی تێکۆشەری دێرین سەرکەوت مامە قالەم کرد، پۆلێک شەمعم بە دەوری پەروانەی (مام قادر مەجید) مامە قالە بینی. هاتبووم بۆ یادی خۆشناوی خۆشیادی تێکۆشەرێکی دێرین کە جگە لە خەبات و رەنجی پێشمەرگایەتی، بیستبووم کۆمەڵایەتی و هونەرمەندەکان لێی مەمنوون بوون، ساڵی پار چەند هونەرمەندی رۆژهەڵات و تارانی هاتنە راگەیاندن و باسی فێستێڤاڵێکی هونەریان کرد لە چەمچەماڵ کە باشیان هەڵسوڕاندبوو.
لە شاری ئەنفال رێوشوێنی تەداروکی گەورە نییە مەگەر ئەوە نەبێت لۆجستی ئیدارە و جوامێری لێک بدرێن. ناوی کاک سەرکەوتیان لەم نێوەندە هێنا.
برای چوار شەهید و کوڕی باوکێک، مام قادر، کە هەر لە سەرەتاوە رێگە پێشکەوتوو و ئاوەدانەکەی کوردایەتی هەڵبژارد و تێکۆشەری باڵی مەکتەبی سیاسیی بوو.
ماڵێکی شەهیدپەروەر کە بە دوو وەجبە چوار کوڕیان بە خاکی کوردستان بەخشی. دوانیان ساڵی ١٩٨٦ و دوانی تریان ساڵی ١٩٨٨.
دیاردەی باخی شەهادەت هەر لە حزبی شەهیداندا شەوق و رەونەقی هەیە.
ئەم باخچە خوێنینەی پڕ لە گوڵ و لالەی سوور باخەوانێکی دێرین و کابانێکی بەسەبری هەبوو.. باوکێک مەشهوری گشت ناو شوان و نیشتەنی وەفا و قوربانیدان، دایکێکیان هەبوو گوایە گوتویەتی چۆن خەڵک بە پێڵاوەوە بەسەر ئەم خاک و خۆڵەدا دێن و دەچن کە ئەم هەموو خوێنە و ئەم هەموو قوربانییەی بۆ دراوە؟
بەڵام لە چلەی سەرکەوتی خۆشناو و خۆشڕوودا هەر کەسوکاری شەهید و ئەنفال و هەر گیانبازانی هاوڕێی پێشمەرگایەتی ئەم عەگیدە لەوێ نەبوون. بەڵکو بیرەوەری چل رۆژ ئەدگاری کۆمەڵایەتی چین و توێژەکانی شاریشی کەمەندکێش کردبوو. یاد قەرەباڵغ و چڕ و پڕ بوو.
جەماوەرێکی شەهید دۆست و شەهیدپەروەر دەوری یادگاری حزبی شەهیدانی دابوو کە هەر ئەوە لە راسان و لە لێقەومانی میللیدا بە کەڵکی یەکێتییەکەمان دێن.
ئەمە نهێنی نە شکانی ئەم کریستاڵە جوانەی خەبات و کوردایەتییە، نهێنی گەشانەوەی ژیلەمۆی یەکێتی و شۆڕشی نوێیە کە دوای پێکوتەیەکی کاتی و پاشەکشێیەکی کورتخایەن وا بە بۆنەی دیموکراسی و هەڵبژاردنەوە تێهەڵدەچێتەوە وەک چۆن دوای نسکۆ دەربڕینی شۆرشگێڕی گوتی؛
ئەی هەڤاڵی بێسەر و شوێن
رەنگی ئاسۆ نیشتۆتە خوێن
دوای نووچدان و هەڵەنگوتن
وا خەڵكی دیسان دەبزوێن
وا بوژاوەتەوە کە نەبەردی تازەی گەرەکە، دوای نەبەردی بردنەوەی دیموکراسییەکەی کەرکوک.
چەمچەماڵ لەڕووی جوگرافیشەوە ناوەڕاستە لە نێوان کەرکوکێکی سەرکەوتوو و براوە و هەرێمێکی روو لە بردنەوە و روو لە گەشانەوەی دوای دەیەیەک لە پێکوتە. هونەری گەورە لە بردنەوەی ئەمجارەدایە. بۆچی بەرەی نیشتمانپەروەری لە نیکاراگوا دوای پاشەکشێی کاتی توانی ڕرا بێتەوە و لە شوێنی تر ئەم ئەزموونە دووبارە نەبێتەوە؟
یەکێتی بەم خەزینە گەورەی شەهادەت و شەهامەت و شەهیدپەروەری، بەم سەرمایە مەعنەویەی رابردوو کە وزەن بۆ داهاتووش، دێتەوە مەیدانی نەبەردی. هەر کەسە و هەر لایەنە بە مایە و خەرجی خۆیەوە دێتە ناو گەمەکەوە. یەکێتی ئەم مایە و خەزینە مەزنەی هەیە و ئیتر بۆ دواڕۆژیش بێ سەرمایە و دەستوپێ سپی نییە. زۆر هاتن و هاشوهوشیان کرد و هیچیان بە هیچ نەکرد تەنها کات و توانا و وزە و سەرمایەی میللەتیان بە فیرۆ دا، ئیتر بۆ گۆڕانکاری گەورە یەکێتی خۆی هاتۆتەوە کایە و فێڵ و فەرەجی دەورانی هەڵبژاردن نایخوات.
یەکێتی هەر باسی رابردووتان بۆ ناکات، ئەگەرچی کەمن ئەم رابردووە دەوڵەمەندەی یەکێتی هەیە، بەڵکو یەکێتیی بەڵێنی دواڕۆژیش دەدات کە لەسەر خاکی کوردستان، نەک لە هەسارەکانی تر، گرەو دەباتەوە.
سەرکەوتن و رزگارییەک بە خوێنی گەشی دەیان بنەماڵەی وەک بنەماڵەی کاک قادر مەجید بەدیهاتبێت مەرکەب و کاغەزی دەنگدان زۆر بە ئاسانی دەیپارێزێت.
