گەنج توێژێکی سەرەکی کۆمەڵگەیە، لە وڵاتە پێشكەوتووەكاندا ئەو كاریزمایەیە كە توانای گۆڕینی سەرلەبەری کۆمەڵگەی هەیە بەشێوەی پۆزەتیڤ بێت یاخود نێگەتیڤ، بەڵام لە وڵاتی ئێمەدا گەنج پەراوێز خراوە و تەنانەت مافە سەرەتاییەکانی ژیانی بۆ جێبەجێ نەكراوە.
دەتوانین بە كەسێك بڵيين گەنج کە بیرکردنەوەیەکی گەنجانەی هەبێت و خزمەت بە مافەکانی گەنجان بكات ئەگەر بە تەمەنیش بێت، بەڵام هەندێک کەس هەيە تەنها بە رواڵەت گەنجە و لە ناخ و بیرکردنەوەیدا لە کەسێکی بە تەمەن دەچێت.
ئەگەر سەیری گەنجان لە هەرێمی کوردستان بکەین هەندێكيان توانا و لێهاتوویی لە رادەبەدەریان هەیە و بەهرەدارن لە بوارەکانی وەرزش، میوزیك، هونە ر و کۆمپیوتە‌ر و...هتد، بەڵام تواناكانیان کەبت بوون و ناتوانن هیچ برەوێکی پێ بدەن، لەبەرئەوەی بوارێك نيیە بۆ دەرخستنیان، هە‌ر ئەمەش وایكردووە ئینتیمای نەتەوایەتییان تاڕادەيەك لاوازبێت و دواجار کۆچكردنی پەیتاپەیتای گەنجانی بەدوادا دێت بەرە و تاراوگە، ئەو گەنجانەشی لە ناوخۆ ماونەتەوە خۆیان بە شتی لاوەکییەوە خەریک کردووە و کەسێکی غەمخۆر لە حکومەت یاخود سەرمایەداران نییە دەستیان بگرێت بۆ ئەوەی بتوانن پەرە بە تواناکانیان بدەن ئەوەش وایکردووە گەنجێکی زۆری بێکار و بێهیوامان هەبێت و توانای رووبەڕووبوونەوەی ئاستەنگەکانی نەبێت.
گەنجان لە هەرێمی کوردستان توانا و لێهاتوویی لە رادەبەدەریان هەیە و بەهرەدارن لەبواری جیاجیادا، بەڵام تواناكانیان کەبت بوون و ناتوانن برەوی پێ بدەن
كە‌واتە پرسیارە‌كە لێرە‌دا ئە‌وە‌یە، ئايا حكومەت بۆچی ئاوڕێك لە گەنج ناداتەوە؟ تاکەی گەنج بە بەردەوامی روو لە تاراوگە بكات و گەل و نەتەوە و وڵاتەکەی خۆی پەراوێز بخات؟ با واز لە حكومەت بهێنين، ئەی رێکخراوەکانی تایبەت بە گەنجان لە کوێن؟ بۆچی بە پراکتیکی کار لەسەر داواکارییەکان و لێهاتوویی گەنجان ناکەن؟ ئەگەر سەیری پەیڕەو و پرۆگرام و کارو چالاکییەکانی رێکخراوەکان بکەین ئامانجی گەورەی تێدا نابینرێت بۆ گەنجان، کەواتە ئەو رێکخراوانەشی بەناوی گەنجانەوە کاردەکەن، وەک حکومەت گەنجیان پشتگوێ خستووە و وەک پێویست دەنگ هەڵنابڕن بۆ داکۆکیکردن لەو توێژەی کە دروشمی خزمەتکردن بەوانیان هەڵبژاردووە.
بۆيە داوا لە گەنجان خۆیان دەکەم، یەک بگرن و هاودەنگ بن لەپێناو هاتنەدی خەونەکانیان، واز لە کۆچکردن بۆ دەرەوەی وڵات بهێنن و لەجیاتی ئەوەی هەوڵی بەدیهێنانی ئامانجەکانیان بدەن و برەو بە تواناکانیان بدەن لە ناوخۆی هەرێم رێگەچارەش هەوڵدانی ئێمەی گە نجە بۆ گۆڕینی حكومەت لە رێگەی هەڵبژاردنەوە و دەنگدان بەو حزبەی کە دەزانین خزمەت بە گەنج دەکات و بیانگەیەنینە دەسەڵات بۆئەوەی ئامانجەکانی گەنجان بەدیبێت.
