یاد و دیدار و چەندین ئومێد

06:59 - 2022-05-29
ئیمان ئامێدی*
355 خوێندراوەتەوە

ئێکەتیی نیشتمانیی کوردستان دسەردەمەکێ دژوار و قۆناغەکا سەختا تێکۆشانێدا ژدایکبوو، دوێ سەردەمێ بێ ئومێدیێدا، دامەزراندنا ئێکەتی ب رابەراتییا سەرۆک مام جەلال و هیممەتا هەڤالێن وی یێن دامەزرینەر، شکەستن ب شکەستنێ ئینا، ل وی سەردەمی ئێکەتی هاتە دمەیدانا بزاڤا رزگاریخوازیا کوردیدا، دا بەرسڤا بسەدان پرسیار و (بوچی) یا بدەت و بەرهنگاری داگیرکاری و هەموو جورێن ستەمێ ببیت کو بسەرێ گەلێ کوردستانێ دهاتن.
هەر ژ وی سەردەمی و هەتا ئەڤرۆ، کو ئێکەتی نیشتمانی کوردستان (47) ساڵ ژ تەمەنێ خۆیێ مشتی خەبات و قوربانیدان دەربازکرن، بهزاران ئەڤرازی و نشیڤی و ئاستەنگ بەزاندن، (47) ساڵێن تەمەنێ ئێکەتیێ دپڕبوون ژ هیڤی و ئومێد و بدەستڤەئینانا دەستکەفت و سەروەری و مسوگەرکرنا ماف و ئازادیان، دورشم و لۆگۆیێ ئێکەتیێ، کو دەستەکێ هەلگرێ گول و گەنم (ژیان و جوانی)یە گروڤە لسەر وێ راستیێ کو ئێکەتی هەمبێزا ئاراما سەرجەم تەخێن جڤاکی و مینبەرا ئازایا دیمۆکراسیخواز و ئازادیخوازا و داینەمۆیێ گوهرینکاری و خزمەت و خەباتێ یە.
ئەڤرۆ.. هەڤدەم دگەل یادا (47)مین ساڵڤەگەڕا دامەزراندنێ و (46)مین ساڵڕۆرا بەرپابوونا شۆڕەشا نو، دیدارا گشتییا ئێکەتییا نیشمانیا کوردستانێ هاتە سازکرن، ئەڤ دیدارە بسەدان هیڤی و ئومێدێن نوێی و هەمەجور بخۆڤە دگریت، دەلیڤەکە گشت هەڤالێن بەشدار و لسەر هەموو ئاستەکی راوبۆچوون و دید و پڕۆژێن خۆ بەرچاڤ بکەن و ببنە فاکتەرێن گوهڕینەکا نو و پێشڤەچوونەکا باشتر بۆ ئێکەتیا نیشتمانیا دقۆناغێن داهاتیدا.
گرنگە پشتی یاد و دیدارێ، پێداچوونێن جدی دهەڵویست و هەڵسوکەوتێن ئێکەتیێدا بهێنەکرن، سیاسەت و ستراتیژا ئێکەتی ل گورەی بەرژەوەندیێن نەتەوی و نیشتمانی و ماف و داخوازیێن خەلکی بهێنە دارشتن و ئاراستەکرن، پشتی دیدارێ گەرەکە ئێکەتیەکا جودا بهێتە دیتن، حزبەکا رژد و خودان نێرینێن جیاواز و جهێ باوەریا جەماوەری و خەلکێ ئێکەتی بخۆ ژی.
پشتی دیدارێ گرنگە ئێکەتی شێوێ کار و ئەدائا خۆ لسەر ئاستێن حکومی و پەڕلەمانی (هەرێم و بەغدا) بەرەڤ باشتر ببەت، ل ئاستەکێ ئەکتیڤتر شوڕببیتە دناڤ خەلکیدا و ب زانین و شارەزابوون کێشە و گرفت و قەیرانێن سیاسی، ئابووری، جڤاکی، ئیداری ...هتد چارەسەر بکەت، گرنگە ئێکەتی هەوڵ بدەت بێلایەنی و سەربخۆییا دەستهەڵاتێن یاسادانان و دادوەری و جێبەجێکار و دەستهەڵاتا چوارێ بپارێزیت و ژ ژێر رکێفا حزبایەتیێ دەربێخیت.
ئومێدەوارین ئەنجام و راسپاردێن ژ دیدارێ دەردکەڤن ل ئاستێ مەزنی و پیرۆزیا یادا دامەزراندنێ بن و نە بتنێ ببنە حبرێ سەر کاغەزێ، بەلکو ببنە بناغێ ڤەژاندن و پاراستن و ئاڤاکرنا هەمەلایەنا جڤاک و تاکە کەس و نیشتمان و دەستهەڵاتێ.

پیرۆزە (47)مین ساڵڤەگەڕا دامەزراندنا (ی.ن.ک)
پیرۆزە (46)مین ساڵڕۆژا بەرپابوونا شۆڕەشا نو
سەرکەفتی بیت دیدارا گشتی

*ئەندامێ ئەنجومەنا نوێنەرێن عیراق

گرنگە پێداچوونێن جدی دهەڵویست و هەڵسوکەوتێن ئێکەتیێدا بهێنەکرن، سیاسەت و ستراتیژیەتا ئێکەتی ل گوری بەڕژەوەندیێن نەتەوی و نیشتمانی و ماف و داخوازیێن خەلکی بهێنە دارشتن 

 

وتارەکانی نوسەر