خەڵک و کەسی تر ناوی لە خۆی نابوو خۆڕاگر، بەڵام بە راستی خۆڕاگری راستەقینە ئەم کاک قوبادەیە کە لەگەڵ کابرا هەڵیدەکرد و پێنج ساڵ بە دانایی و شێنەیی مام جەلالانە مامەڵەی دۆخەکەی دەکرد.
هەڤاڵ قوباد تاڵەبانی ،جێگری سەرۆکی ئەنجومەنی وەزیران، لەبەر کورد و یەکێتیی و لەبەر مانەوەی حکومەتی کوردستان بە یەکگرتوویی، بە خۆڕاگرییەوە وەرزشی یۆگای تەحەمول و خەباتی سەبری شۆڕشگێڕیی دەکرد.
لە بەغدا بە گیانی بەرزی دیپلۆماتێکی کارامە تیمی دانوستانی ئیدارە دەدا کەچی جەماعەت حەماوەی حەسودیان لێی دەرژا، کە سەریش دەکەوت پاشقولیان لە رێکەوتن و دەسکەوتەکانی، کە لە قازانجی کورد بوون، دەگرت.
دوایی خۆیان بە نرخێکی کەمتر دەچوون بۆ سێڵڤی هەراجکردنی نەوت و دەیانگوت سۆمای چاومانە سۆما.
پیرۆزبایت لێدەکەم کاک قوباد کە لە حکومەتدا هەمیشە بەشێک بووی لە چارەسەر، نەک ماکی گرفت، دایمە و دەرهەم بە هێزی نەرم و ژیریی لە ناوجەرگەی دیوانی حکومەتەوە بەرەنگاری تاکڕەوی و لووتبەری و بێباکی فراکسیۆنێکی زبرت دەکرد.
رۆژی ٢٠-١٠-٢٠٢٤ یەکێتی بە لیستی ١٢٩ ئەم نەبەردییە دەباتەوە و کۆدی ئەو مەتەڵەش هەڵدێنێت کە چەند رۆژە خۆیان پێوە مەشغوڵ کردووە کە لە جێی ئەوەی قسەیەکی خۆیان هەبێ بۆ وتن هەر وا بە شپرزەییەوە دەپرسن: کۆتایی بە چی دەهێنن؟
تەبعەن کۆتایی پێ دەهێنین. کۆتایی بە هەموو شتێک دێنین. تەنانەت کۆتاییش دێنین بە خوو و خدەی بەد و زبری تەعقیب و دیڤچوون بۆ راز و نیازی خەڵکی لە هەڵبژاردن و کێبرڕکێی دیموکراسیدا.
شەفافیەت لە ئیدارە و داهاتەوە دەپەڕێتەوە بۆ فەزای سیاسی داهاتووش.
