عەون نەک فیرعەون

بارودۆخەکەی ئەمڕۆ بۆ کورد جیاوازترە و لە بارترە، بەمەرجێک ناو ماڵی خۆمان رێکخەینەوە و بە کردار خەڵک ئاشتبکەینەوە و کێشەی مووچە و بودجە چارەسەر بکەین و بەرژەوەندیی گشتی بکەین بە ئامانج

شەوی یەڵدایە و لە تەنیشت پەنجەرەی ژووری هۆڵەکەمان دانیشتووم، گوێم لە نمەنمەی باران و مۆسیقای کەوتنەخوارەوەی گەڵای زەردی درەخت و پەڕەی گوڵی سوور و سپی و پەمەیی باخچەی حەوشەکەمانە، خەیاڵم فڕی و دایە شەقەی باڵ، جارێک لە خانەقی میرنشینی رۆحم دەنیشێتەوە و جارێکیش لە کۆبانێی سەروەری نیشتمانم!.
 دوو شاری دەستە خوشک و یەک چارەنووسن، لە بەردەم هەڕەشەی جوگرافیای سیاسی و غەدری مێژوون!.
 من لەگەڵ دانیشتوانی ئەم دوو شارە و سەرتاسەری کوردستان شەوی یەڵدا لە یەکتر پیرۆز و ئاڵای بەرزی کورستانیش شەکاوەتر دەکەین.
نازانم بۆ ئێمەی کورد و هەندێ میللەتی تری ناوچەکە بۆ درێژترین شەوی ساڵ، خۆشی و شادی دەکەین؟.
بەپێچەوانەوە بۆ لە درێژترین رۆژی ساڵدا شادی و شایی ناکەین؟
ئایا ئێمە شەیدای تاریکی شەو و خەو زڕاندنی عاشقان و خەفەتی هەژاران و بێوەژنانی وڵاتەکەمانین؟. یان ئەم حاڵەتە پەیوەستە بە شتێکی ترەوە؟.
 خەڵکی خوارووی عیراق، لەبەرئەوەی ئیمامی حوسیەن لایان سەربڕاوە، بەردەوام حەزیان لە میلۆدی خەم و خەفەتە و بەردەوام رەشپۆشن.
ئێمەش لە بەر ئەوەی وڵاتەکەمان لە دێرزەمانەوە داگیرکراوە و لەژێر ستەم و جەور و چەوسانەوەدا ژیاوین، زیاتڕ حەزمان لە تاریکی و خەم و خەفەتە.
شەوی یەڵدای ئەم ساڵ جیاوازە و پەیوەستە بە گۆڕانکاریی بنەڕەتیی لە سوریادا و گۆڕانکاریی گەورەتریش بەڕێوەیە، باڵی چەپی بەعسی سوریا شکاو و رژێمەکەشی روخێنرا، ئەمیش گۆڕبەگۆڕ کرا وەکو بەعسی عیراق، خەڵکی هەردوو وڵات نەجاتیان بوو لە دیکتاتۆری و شۆڤێنی و حوکمی شمولی. 
روخاندنی رژێمی بەعسی عیراق سەرەڕای بوونی ناسەقامگیری و ناعەدالەتی و بەرفراوانبوونی فەسادی ئیداری و مالی و سیاسی خۆی لە خۆیدا گۆڕانکارییەکی مەزن بوو لە نەخشەی سیاسیی ناوچەکە و فرسەتێکیش بوو بۆ چەسپاندنی ئازادی و ئاشتی لە عیراقدا.
 نزیکەی چارەکە سەدەیەکە گۆڕانکاریی گەورە و سەرەکی لە ناوچەکەی ئێمە روویداوە.
یەکەم، روخاندنی بزووتنەوەی تاڵیبان لە ئەفغانستان بە بەشداریی هێزی دەرەکی و هەمهاهەنگی ناوخۆیی.
دووەم، روخاندنی رژێمی دکتاتۆریی لە عیراقدا بە هەمان شێوە.
سێیەم، روخاندنی رژێمی بەعسی سوری بە هێزی ناوخۆ و هەماهەنگی دەرەوە.
ئەمەی سێیەم ئەگەر بە باشی و کۆنکرێتی پەیامەکەیان جێبەجێبکرێت، دەوروبەر سوودمەند دەبێت و گۆڕانکاریی بنچینەیی لەگەڵ خۆیدا دەهێنێ و پێچەوانەکەشی بەڵاو کارەسات بۆ خۆیان و ناوچەکەش دروست دەکات.
ئەرکی مێژوویی سەرکردایەتی سیاسی کوردە لە هەر چوارپارچەی کوردستان، ئەم هەلە زێڕینە بقۆزنەوە و لە دەستی نەدەن، بەتایبەتی سەرکردایەتیی سیاسیی کوردستانی رۆژئاوا، دەبێت لەئاست لێپرسراوێتی خۆیدا بێت، خوێن و قوربانی ساڵانی خەباتی کوردایەتی خۆیان بەفیرۆ نەدەن و ئێمەی بەشەکانی تری کوردستانی گەورەش، پێوستە پشتیوان و هاوکاریان بین لە جیاتی (عەون) نەبین بە (فیرعەون).
لای هەموان ئاشکرایە ئەم شۆڕشەی خەڵکی سوریا، لە سەرەتای رێگایە و لە زۆر لاوە پەلامار دەدرێت بە شێوەی راستەوخۆ یان ناراستەوخۆ. 
ئەگەری دووبارەبوونەوەی ئەزموونی تاڵیبانی ئەفعانستان یان عیراقی نوێ هەیە، ئەمەش خۆی لە خۆیدا کارەساتە بۆ خەڵکی سوریا بە هەموو پێکهاتەکانییەوە و بۆ ناوچەکەش.
ئاشکرایە لەم سەردەمەدا قورسە، ئەگەر نەڵێین مەحاڵە، بەدەستهێنانی مافی چارەی خۆنووسین بەبێ پشتیوانی و هاوکاریی دەرەوە و قایل بوونی نەتەوەی سەردەست و دەسەڵاتدارانی نوێ، رەنگە باشترین و نزیکترین نموونەش راپرسی 25-09-2017 ی هەرێمی کوردستانی خۆمان بێت، کە چۆن زیندە بە چاڵیان کرد و تائێستاش خەڵکی هەرێمی کوردستان باجی دەدات.  
ئەگەرچی بارودۆخەکەی ئەمڕۆ بۆ کورد جیاوازترە و لە بارترە، بەمەرجێک ناو ماڵی خۆمان رێکخەینەوە و بە کردار خەڵک ئاشتبکەینەوە و کێشەی مووچە و بودجە چارەسەر بکەین و بەرژەوەندیی گشتی بکەین بە ئامانج نەک بەرژەوەندیی حزبی و تاکڕەوی، لێرەدا باشترە هەڵوێستمان پابەند بێت بە لۆجێک و حیکمەتی سەردەم و تەرازووی هێز بەجوانی بخوێنینەوە، دوور لە بێباکی و مەغروری، چونکە دەبێت بزانین پێکەوە لە دووڕیانی هات و نەهاتداین!.

* ئەندامی مەکتەبی سیاسیی یەکێتیی نیشتمانیی کوردستان

روخانی رژێمی ئەسەد سەرکەوتنی مەزهەبێکی دیاریکراو نییە