خالد گڕاوی
تەمەنێكە لە شاری هەولێرم، ئەو شارەی كە بەقەد دوو تا سێ گەڕەكی ئێستا نەدەبوو، لە منداڵیمەوە تا راپەڕین كارەبا بڕانمان نەدەبینی، گڵۆپەكانیش لەگەڵ تەمەنی ئێمە بوون و هەرگیز نەدەسووتان، ئاویش رۆژانە بوونی هەبوو و كەم كەسیش تانكی ئاو و مزەخەی هەبوو، لافاو تەنها جارجار لە چەند شوێنك دروستدەبوو، ماست و پەنیر و كەرە و هەنگوین و هێلكە بۆ شارەكانی تری عیراق دەڕۆیشت و بازرگانیی پێوە دەكرا، میوە و سەوزەی خۆماڵی ئەوەندە زۆربوو حسابی لەسەر نەبوو، لە هەولێر چەندان پاسی لێبوو و كێشەی هاتوچۆی نەبوو، هەوا پاك بوو ژینگە خاوێن و نەخۆشیی كەم بوو.
دوای راپەڕین و گۆڕانكارییە سیاسییەكانیش وای لەهەرێمی كوردستان كرد، هەنگاوەكان گەورە و خێرا بن، هەولێریش پایتەختی هەرێمی كوردستانە و لەهەموو بوارەكان پێویستی دەكرد خزمەتگوزاریی بۆ زیاد بكرێ، بەڵام هەموو كارێك دەبێ بە نەخشە و پلان بێت، با دەسكەوت و قازانجەكانیش بۆ سەرمایەدارە كوردەكان بێت، بەڵام ناكرێ ئەوەندە بێ ویژدانانە، لەشار سەوزایی نەهێڵن و ئاوەڕۆ و دەرچەكان بگرن و گرد و دۆڵ و بەرزایی و پێدەشت و كەندەكانیش بەبێ نەخشە و بێ سوودی گشتی بكرێنە خانووی ئەڵمانی و ئیسپانی و پڕ بكرێت لە ستی و........... بەو ناوە سەیر و سەمەرانەی كە بەو شارە جوانە كوردپەروەر نامۆن.
لەهەموو وڵاتێكدا چەند ساڵ جارێك پێداچوونەوە دەكرێ، بۆ گۆڕانكاریی و پێشهاتەكان لە زۆربەی بوارەكاندا بەتایبەتی ئەوانەی پەیوەستن بۆ رێكخستن و چاكکردنی ژیانی هاووڵاتیان و تەئمینكردنیان لە بوارە ژیارییەكان، بەتایبەت لە بواری ئابووری، پیشەسازی، سیاسی... بۆ دانانی پلانی نوێ و دەركردنی بڕیاری تازە و جێبەجێكردنی پلانی كورتخایەن و نەخشەكێشان بۆ دانان و دەستكردن بە پڕۆژەی ستراتیژیی درێژخایەن.
سەرەڕای كەموكوڕییەكان، لێرە نەتوانراوە، سوود لە باڵەخانە و گوندەكان ببینرێت بۆ مەبەستی نیشتەجێكردنی خەڵكی كەمدەرامەت و كرێچی و پێویست.ئەو شارانە بوونەتە هۆكاری زیادكردنی گرفتی ئاو و نەمانی كارەبا لە گەرمای هاوین و لە ساردی زستان و زیادكردنی موەلیدە و قورسكردنی باروگوزەرانی خەڵك و بەردەوام كێشەی شكان و پیسبوونی بۆڕییە كۆنەكانی ئاو، كەمبوونی رێژەی بەرچاوی ئاو لە هەولێری ئەسڵی.
ئێستا شاری هەولێر بەرزترین رێژەی پیسبوونی هەوای هەیە لە عیراق، رێژەی پیسبوونەكەی لە شاری بەغدا زیاترە، كە زیاتر هۆكارەكەی دەگەڕێتەوە بۆ دەرهێنانی نەوت و گاز و بەنزین لە پاڵاوگە نایاساییەكان.
نەبوونی نەخشەی تەندروست و زانستیانە بۆ دروستكردنی ئەو هەموو باڵەخانە و گوندە زۆرانە لە هەولێر، هیچ حسابێك بۆ كەند و ئاوەڕۆ سەرەكییەكانی شار نەكراوە، هەموو ئەو كەناڵ و رووبار و رێڕەوە سروشتییانەی ئاو داخراون، ئەمەش وایكردووە لەكاتی بارانباریندا، ئاو، رێرەوی نوێ بۆ خۆی دروست بكات، بۆیە لە زستاندا هەمووان لەشەودا چاو نیوە كراوەین لە چاوەڕوانی ئەو میوانە خنكێنەرەكە، كات بەسەردەبەین. لە نەبوونی یاسای گشتگیر و بوێری دەسەڵاتی جێبەجێكردن، لەدۆخی ئێستادا كارەساتەكان بەرەو گەورەبوونتر دەچن.
راستە شار گەورە دەبێ و پڕۆژەی گەورەی پێویستە و داخوازییەكانی خەڵك زیاد دەبێت، بەڵام پەلە و منافەسەیەكی زیاد لە پێویست و گەورە لە بیناسازییدا دەبینرێ، بێ بەرنامە و پلان، پڕۆژەكان شار دەخنكنن، باڵەخانە بەرز دەبێتەوە، بەڵام هیچ هاووڵاتییەكی هەولێری دڵخۆش ناكات و شارە كۆنە ئەسڵیەكەش بۆتە وێرانەیەكی بێ پێداویستی و لە هەموو مافە سەرەتاییەكانی ژیان پەراوێز خراوە.
ئێستا شاری هەولێر بەرزترین رێژەی پیسبوونی هەوای هەیە لە عیراقدا
