دیارە هەر لەسەرەتای دروستبوونییەوە، یەكێتیی نیشتمانیی كوردستان، باوەڕی بە پرەنسیپە دیموكراسییەكانی بەشداریی فراوان لە بەرێوەبردنی حزبایەتیدا، هەبووە و ئێستاش لای هەمووان ئاشكرایە بە سەرۆكایەتی سەرۆك بافڵ تاڵەبانی، گرنگی تەواو بەو بنەمایانە دەدرێت، لەوانە بەشداریی كارا و گفتوگۆی راشكاوانە و دەرفەتی فراوان بۆ هەمووان. هەر بۆیەش لە دوا كۆنگرەدا، دیداری یەكێتی وەك یەكێك لە دەرفەتە هەرە فراوانەكانی بەخۆداچوونەوە و چاكسازی زیاتر بڕیاری لەسەر درا. لە دیداردا بەهێز و عەقڵی رەخنە لەخۆگرتن و یەكتر قبووڵكردن بیر لە ستراتیژی كار و پلانی داهاتوو دەكرێتەوە.
هەوڵدان بۆ بەهێزتركردنی حزب لەپێناوی نیشتمان و نەتەوە، حکومڕانی، بەرژەوەندییەكانی تاك، ئیدارە و ئابووری، بەگەڕخستنی زیاتری تواناكانی گەنجان و ژنان، دەبنە بەرنامەی كاری دیالۆگ و مشتومڕی جددیان لەسەر دەكرێت تا گەیشتن بەكۆتا بریاڕ.
كۆتا راسپاردە و بڕیارەكانی دیدار دەبن بە بەرنامەی كاری داهاتووی حزبەكەمان. جێگیر كردنی گرێدانی دیدار لەپەیڕەودا ئەو نوێگەرییەیە كە نیشانمان دەدات یەكێتی چەندە باوەڕی بە بەشداریی سیاسی و پراكتیكی كادرانی هەیە لە هەموو ئاستەكان.
بیرمان نەچێت ئەمە هەر لەخۆوە نەهاتووە، بەڵكو پاشخانێكی قووڵی فكری رێبەری گەل و مامی گەورە و هەمیشە لە یادمان، ئەو لە ناو كەلتورێكی چەقبەستووی پڕ لە رەتكردنەوەی ئەویتردا وتی «گەردنتان ئازاد بێت، لەمنەوە دەست پێبكەن و رەخنە بگرن» ئەم خۆ قوربانیكردنە بۆ چاندنی كەلتوری رەخنەگرتن لەپێناو خۆچاككردنەوە، وێنەی كەم و دەگمەنە، ئێستا دەبینین جێیگرتووە و رۆژ بەرۆژ وەك رەگەكانی دار بەڕوو رۆدەچێتە ناو دڵی حزب و كادرەكانی رێبازە پیرۆزەكەی مام، هەر بۆیە دەبینین بەهۆی ئەم بیرە ئازادە، ئازادیخواز و بوێران بۆ هەناسەیەكی ئازادانە لە هەر چوار پارچەی وڵاتەوە پەنا بۆ شارە حەیاتەكە دەبەن.
خۆشبەختانە دیداری ئەمجارە لەساتەوەختێكی مێژوویی و پڕ لەئاڵۆزی و چاوەڕوانی بەڕێوەدەچێت. چاوەڕوانییەك كە بەهەموو قوربانیدانەكانیشی ئەركی گەورەتری پڕ لە خۆڕاگری بەرامبەر بە ململانێ توندەكان دەخاتە سەر سەرکردەکانی ئەم حزبە.
ئێستا لەلایەك گەمارۆدانی شاری سلێمانی لەرووی ئابوورییەوە لە ئاسمان و زەمینەوە، لەلایەكیتر پرۆسەی چاوەڕوانكراوی ئاشتی لە توركیا و باكووری كوردستان، روخانی رژێمی ئەسەد و خۆڕاگریی كوردانی رۆژئاوا و ئەو گۆڕانكارییە گەوریەش كە بەسەرپەرشتی زلهێزانی دونیا لە تەواوی ناوچەكە بەڕێوەیە.
دیدار لەهەمانكاتدا لەسەروبەندی پێكهێنانی كابینەی نوێی حكومەتی هەرێمی كوردستانیش بەڕێوەدەچێت كە ئەمەش دیسان ئەركی یەكێتی، قورستر دەكات، بەتایبەت قوباد تاڵەبانی كە سەرپەریشتیی هەردوو پرۆسەكە دەكات. لەهەمانكاتدا دەرفەتی گەورەشی رەخساندووە كە راوبۆچوونی گرنگ و پڕ لە خەمخۆری پێدەگات.
بۆیە كادرانی یەكێتی وەك هەمیشە، رۆڵی كاریگەر دەبینن و ئەركە قورسەكەیان لەسەر شانە، با گەلیش دڵنیا بێت كە ئەركە قورسەكان لەلایەن یەكێتیی نیشتمانیی كوردستانەوە بە ئەمانەت و دڵسۆزی و قوربانیدانەوە جێبەجێدەكرێن.
