یەكێتی وەكو حزبیكی سۆشیال دیموكرات كە پێگەیەكی باشی هەبوو لەناو رێكخراوی سۆشیال ئینتەرناسیۆنال، لەگەڵ ئەوەشدا هێشتا نەیتوانیوە بەربەستەكان تێپەڕێنێت و هەموو پرەنسیپەکانی سۆشیال دیموكرات جێبەجێ بكات
ئایدۆلۆژیای یەكێتی، لەدوای رووخانی بلۆكی سۆشیالیستی، لە كۆنگرەی یەكەمدا رووی لە سۆشیال دیموكرات كرد، كە لە هەندێک وڵات گەیشتبووە دەسەڵات و لە هەندێکیشدا ئۆپۆزسیۆن بوون.
لەكوردستاندا یەكێتیی نیشتمانیی كوردستان وەکو ئەندامێک و دواتر وەک ئەندامی كارا وەرگیرا و لە دواتردا سەرۆک مام جەلال، بووە جێگری سکرتێری سۆشیال ئینتەرناسیۆنال.
ئەمە هەنکاوێکی گرنگ بوو بۆ كورد كە سۆزی ئەو حیزب و ریكخراوانەی سۆشیال دیموكراتی ئەوروپا بۆ پشتیوانی دۆزی كورد رابكێشێ.
سۆشیال دیموكرات بزووتنەوەیەكی ریفۆرمخوازییە دەیەوێت لە رێگەی بەشداریكردن لە پەرلەمان و ناوەندەكانی دەسەڵات، بەرنامەی سیاسی خۆیان جێبەجێبكەن.
ئامانجی سۆشیال دیموكرات، چەسپاندنی دادی كۆمەڵایەتی و خۆشگوزەرانییە بۆ خەڵک لە هەموو بوارەكاندا بە شێوازی ئاشتییانە و دیموكراسیانە، دوور لە توندوتیژیی و لۆژیکی شەڕ.
سۆشیال دیموكرات، دەریخست لە هەموو پارت و ریكخراوە چەپ و كۆمۆنیستەكان زۆرتر خزمەتی چینی كرێكاریان كردووە.
یەكێتی وەكو حزبیكی سۆشیال دیموكرات كە پێگەیەكی باشی هەبوو لەناو رێكخراوی سۆشیال ئینتەرناسیۆنال، لەگەڵ ئەوەشدا هێشتا نەیتوانیوە بەربەستەكان تێپەڕێنێت و هەموو پرەنسیپەکانی سۆشیال دیموكرات جێبەجێ بكات، بەتایبەتی لەناو كادران و ئەندامەكانیدا، لەوانەی خۆیان بەو چەمكانە پەروەردە ناكەن.
دەبێت یەکێتی، بە باشی كرێكاران رێكبخاتەوە و كارئاسانیی بۆ كار و گوزەرانیان بكات، هەوڵی بنبڕكردنی هەژاریی بدات و ژیانی پیر و پەككەوتە و نەخۆش و منداڵ دابین بكرێت.
بایەخ بە پرۆژەی پیشەسازیی بچووك و مامناوەندیی بدرێت و گرنگیی بە جووتیاران و كاروباری كشتوكاڵیی و بەروبوومەكانیان بدرێت، باشتر خزمەتكردنی ئامانجەكانی كرێكاران و زەحمەتكێشان.
دژایەتی گەندەڵی و خراپ بەكارهێنانی دەسەڵات بۆ بە فیڕۆدانی سامانی نەتەوەیی بکرێت.
بەرپەرچدانەوەی بیری كۆنەپەرستی و عەقڵیەتی توندڕەویی ئایینی كە بە زۆریی هەژموونی هەیە.
دەستبەرداری عەقڵیەتی پیاوسالاری و رێزگرتن لە پایەی ژن و داكۆكی لە مافەكانیان، هۆشیاری ئەندامان و كادران و ئاراستەكردنیان بە پرەنسیپەكانی ئازادی و دادی كۆمەڵایەتی و دیموكراسیی و یەكسانی.
سەرکردایەتییەکی تۆکمە
سەركردایەتیكردن ئەركێكی قورسە و نابێت زۆر و بۆر بێت، بەڵکو بە تۆكمەیی و پوختییە لە عەقڵ و ئیرادە و توانادا، سەركردە دەبێت خۆی دروستبكات و عەقڵی گەورە بێت و توانای تیگەیشتن و لێكدانەوە و شیكردنەوەی رووداوەكانی هەبێت و هەست بە ئەگەرەكان بكات. لە بەرنامە و سیاسەتی حزبەكەی بە باشی تێبگات.
پێویستە سەرکردە مرۆڤێكی ئازا و بوێر و خاوەن هەڵوێست بێت، دوور لە رارایی و كارتێكردنی بیری ئایینی و عەقڵییەتی خێڵەكیی و شتی كۆنەپەرستی، كاریگەریی لەسەر خەڵك دروستبكات و سەرنجیان رابكێشێت بۆ پشتیوانی لە سیاسەت و هەڵوێستەكانی حزب. دووربێت لە ماددە پەرستن و ئیغرابوون.
پێویستە، هەموو ئەندامێكی حزبی، هۆشیارانە و ژیرانە رەفتار بكات دوور لە تەنگەتاویی و خۆویستی، هەست بە بەرپرسیارێتی و خەمخۆریی و پەرۆشیی ئەركەكانی سەرشانی بکات و دووركەوێتەوە لە دەستەگەریی زیانبەخش كە گیانی حزبایەتیی دەكوژێت.
بوونی یەك گوتاریی
دەبێت یەکێتی، رۆڵی خۆی لە حكومەتی هەرێم و عیراقدا بەهێزتر بكات، پاشکۆی هیچ لایەنێک و رێگریی
پیاچوونەوە بە پەیوەندییەكان لەگەڵ لایەنە نیشتمانییەكان و هەموو بەشەكانی تریش بە شێوەیەك لەگەڵ بارودۆخی سیاسی و بەرژەوەندیی نەتەوایەتیدا بگونجێت. بایەخدان بە كاری رێكخراوەیی و خزمەتی گەنجان بە دابینكردنی هەلی كار و پرۆژەی خومەتگوزاری.
پێویستە یەكێتی خۆی نەكاتە قوربانیی دروشمی درۆزنانەی هەندێک لایەن کە بانگەشەی ناڕاستی بۆ دەکەن.
نەهێشتنی هەموو هێزیكی چەكداریی تایبەت بە لێپرسراوان و هەوڵدان بۆ یەكخستنی هیزی پێشمەرگە و پەروەردەكردنیان بە گیانی نیشتمانپەروەریی.
