پێش ئەوەی بانگەشەی هەڵبژاردن بۆ پەرلەمانی کوردستان دەستپێبکات، مەکتەبی هەڵبژاردنی یەکێتیی نیشتمانیی کوردستان، لە چوارچێوەی نامیلکەیەکدا بە ناونیشانی (بەرنامەی لیستی 129ی یەکێتی نیشتمانی کوردستان بۆ هەڵبژاردنی پەرلەمانی کوردستان 2024) خستەڕوو.
کە لە چەند تەوەر و بڕگەیەک پێکهاتبوو، بەووردی خوێندمەوە ئەوکات بڕیارمدا چیم پێبکرێت بۆ هەڵبژاردن بیکەم و ئەرکی لێپرسراوی بازنەیەکم لە ئەستۆ گرت.
لە دیباجەکەیدا باس لە قەیرانە یەک لەدوایەکەکانی هەرێم دەکات کە بەهۆی (ریفراندۆم و سەرکێشیکردن بە دەستکەوتەکان لە رێگەی پەیوەندیی تەسکی بەرژەوەندیخواز و تێوەگلان لە ئەجێندای ئیقلیمی کە پاشەکشەی زۆری بە دیبلۆماسی کوردستان کرد و سیاسەتی بە حزبیکردنی نوێنەرایەتییەکان و قۆستنەوەی کایەی دیپلۆماسی بۆ بەرژەوەندیی و بەکارهێنانی فەرمانگەی پەیوەندییەکانی دەرەوە وەک ئۆرگانی حزبی...هتد)
ئەم خاڵە جەوهەرییانە و رەنگدانەوەی لە کابینەی حکومەتدا، یەکێتی خستە بەردەم بەرپرسیاریەتییەک کە دەبوو لە بانگەشەدا لەسەر ئەم بنەمایە، بۆ راستکردنەوەی رێڕەوی حکومڕانی و ئەو خۆسەپاندنە، سیاسەتی خۆی دابڕێژێ بۆ هەڵبژاردن.
راستکردنەوەی ڕێڕەوی حکومڕانیی لە هەرێمی کوردستان و پێکهێنانی حکومەتێکی دادپەروەر و خزمەتگوزار و کۆتایهێنانبە دەستەڵاتی خۆسەپێنی حزبی
بۆیە هێشتا زووە بۆ بڕیاردان لەسەر یەکێتی و خودی سەرۆکەکەی کە لە بانگەشەدا کردی و وەڵامی وشەکانی (روخاندن و خۆسەپێن و زاب خودێ) بدرێتەوە و (مایکە شکاوەکان) بسەلمێنێ، یەکێتی دەیەوێت هەموو ئەو فکرانەی سەرەوە لاببات و دونیابینانەتر حکومەت بنیات بنرێتەوە کە ئەمەشی لە رێباز و نەهجی سەرۆک مام جەلال وەرگرتووە کە ئەندازیاری دروستکردنی پەیوەندیی سەنگین و پەیداکردنی رایەڵەی دیپلۆماسی و سازدانی دۆستی هەمیشەییە بۆ گەڕاندنەوەی سەنگی پەیوەندییەکان بۆیە:
لە تەوەری یەکەمی نامیلکەکەدا، بە ناونیشانی (سێکتەری سیاسی و دیبلۆماسی) و لە بڕگەی یەک نووسراوە.
راستکردنەوەی ڕێڕەوی حکومڕانیی لە هەرێمی کوردستان و پێکهێنانی حکومەتێکی دادپەروەر و خزمەتگوزار و کۆتایهێنان بە دەستەڵاتی خۆسەپێنی حزبی.
هەر لە خاڵی یەکەم و بڕگەی یەکەمی بەرنامەی لیستی 129 دەردەکەوێت کە دوای ئەنجامی هەڵبژاردن، یەکێتی دەبێ چەندین کۆبوونەوە لەگەڵ رکابەرەکەیدا بکات بۆ دروستکردنی کابینەیەک، جێگەی هەموو ئەوانەی سەرەوەی تیادا ببێتەوەو جەخت لە دروستکردنی کابینەیەک ئەکات، نەک نەمانی حکومەتی هەرێم. هەرگیز باس لە وەرگرتنی هیچ پۆستێک ناکات، ئەوەندەی باس لە فۆڕم و ناوەڕۆکی حکومەتەکە دەکات.
بۆیە ئێستا کاتی هێرشکردنە سەر یەکێتی نییە لەسەر ئەنجامدانی کۆبوونەوەکانی بۆ پێکهێنانی حکومەت، بەڵکو دەبێ ئەم راوبۆچوونانە دەربارەی ماوەی بانگەشەی یەکێتی بکەوێتە دوای 6 مانگ لە دوای پێکهێنانی کابینەی نوێی حکومەت، ئەوکات ( رووخاندن وخۆسەپێن و زاب خودێ) وەڵامەکانی روون دەبن و رازی مایکە شکاوەکانیش دەردەکەوێت.
