رۆژی 18ی ئازار لە باشووری کوردستان «یەکێتیی نیشتمانیی کوردستان» و «پارتی دیموکراتی کوردستان»، رایانگەیاند «گەیشتوونەتە دواڕەشنووسی دیدگای هاوبەش»، هاوکات هەر هەمان رۆژ، لە رۆژئاڤای کوردستان هەردوو لایەنی پەیەدە و ئەنەکەسە کۆبوونەوەیەکی گرنگیان بۆ رێککەوتن کرد، مەزڵوم عەبدی لەو بارەیەوە رایگەیاندووە «پەیەدە و ئەنەکەسە، یەکەم هەنگاویان بۆ یەکڕیزیی کورد لە رۆژئاڤای کوردستان ناوە».
سەرنج و تێبینییەکان لەسەر یەکێتی و پارتی، حکومەت و دابەشکردنی پۆستەکان جێدەهێڵین بۆ کاتی تر، بەڵام گەیشتن بە دیدگای هاوبەش وێنەدانەوەیەکی جوانیشی هەیە، ئەوەیە کە «ئەگەر نێوانی یەکێتی و پارتی باش و ئاشت بن، ئەوا هیوا و ئومێدی کۆمەڵانی خەڵکی کوردستانی لێ دەخوێنرێتەوە و مایەی گەشبینییە، پێچەوانەکەشی راستە».
وێنەکەی رۆژئاڤاش، دابڕاو نییە لە دڵخۆشییەکی کوردانە لە بەشەکانی دیکەی کوردستاندا، تەنانەت دەکرێت بڵێین دیوە تەواوکراوەکەی رێککەوتنی دوو هێزە سەرەکییەکەی تری باشووری کوردستانە.
دڵخۆشی ئەم وێنەدانەوانە لەوەدایە، مەخابن کورد لەم وێنانەی کەمە و زۆرجار ماددەیەکی شکاو و فرەپارچە بووە، بەدەستلەپشتدانی زلهێزی جیهانی و هەرێمایەتی، ئاسان نەبووە بتوانێت خۆی کۆبکاتەوە و پەیامە نەتەوەییە کەرتبووەکەی رێکبخاتەوە.
لەمانایەکدا، ئەگەر هەمیشە نەیارەکانی کورد خاڵی بەهێز بووبن لە دروستکردنی ناکۆکیی ناوخۆیی کورد و رێکنەکەوتن، ئەوا لە مانایەکی تردا کورد خۆیشی زۆر بەوردی رووداو و پێشهاتەکانی ناوچەکەی لەپێشچاو نەگرتووە و دەرفەتەکانی نەقۆستووەتەوە بۆ یەکڕیزیی و «بازدانی مێژوویی» و رەنگڕێژکردنەوەی پێگەی کورد لە رێڕەوی گۆڕانکارییەکاندا، بۆیە ئێستا رێککەوتنەکەی رۆژئاڤا دڵخۆشکەرە، ئەگەر بتوانێت لە گۆڕانکارییەکانی سوریادا، ببێتە مایەی وەرگرتنی دەرفەت بۆ کورد.
رەهەندەکانی پشت هەردوو وێنەکە، بۆ کورد شتێکە و بۆ نەیارەکانی کوردیش شتێکی ترە، بۆ کورد پڕکردنەوەی کەلێنی نێوان هێزە سیاسییەکانە و هیوایەک بۆ تێپەڕاندنی ناکۆکیی ناوخۆیی دروست دەکات، بەڵام بۆ نەیارەکانی کورد، مەترسیدارە! و رەنگە سیناریۆی تێکدان و دەستی گێرەشێوێنی بخەنە نێوان لایەنەکانی ئەم دوو رێککەوتنەوە.
ئەو گۆشەیەی هەردوو رێککەوتنەکە کە پەیوەندیی بە (دیمەشق و بەغدا)وە هەیە، ئەوەیە لەلایەک (یەکێتی ــ پارتی) لەگەڵ (بەغدا)، لەلایەکی تریشەوە (هەسەدە ــ ئەنەکەسە) لەگەڵ دیمەشق، ناتوانن مافەکانی کورد بەدەستبهێنن ئەگەر بەو رێککەوتنە و بە بەهێزییەوە نەچنە پایتەخت و هەڵگری یەک گوتاری بەهێز نەبن بۆ کارکردن لە چوارچێوەی ئەو دوو وڵاتەدا.
