گرتنی ئیمام ئۆغڵۆ توركیا بەرەو كوێ دەبات؟

توركیا چەند رۆژێكە ناڕەزایی و خۆپیشاندانی گەورە بەخۆوە دەبینێت، دژ بە حكومەتی ئەو وڵاتە، دوای ئەوەی دادوەری گشتی بڕیاری دەستگیركردنی بۆ ئەكرەم ئیمام ئۆغڵۆی سەرۆكی شارەوانی ئیستەنبوڵ دەركردو هێزە ئەمنییەكانیش ئۆغڵۆیان لەپاڵ دەیان كەسی تر  دەستگیركرد، بەتۆمەتی گەندەڵی و پەیوەندی بە پەكەكەوە، ناڕەزاییەكانیش تا دێت بەرفراوانتر و توندوتیژتر دەبێت.
ئەوەی ئێستا لەشارە گەورەكانی توركیا روودەدات، هاوشێوەی بەهاری عەرەبییە، كە بووە هۆی روخاندنی چەندین رژێمی ناوچەكە، لە نموونەی یەمەن و میسر و تونس و لیبیا و دواجاریش سوریا، هاووڵاتیانی توركیاش هاوشێوەی هاووڵاتیانی وڵاتانی بەهاری عەرەبی، دروشمەكانی روخانی دەسەڵاتی وڵاتەكەیان دەكەن، هەرچەندیش رووی دەرەوەی ناڕەزاییەكان وای نیشان دەدات، خۆپیشاندەران دژ بە هەنگاوی حكومەتن بۆ دەستگیركردنی ئیمام ئۆغڵۆ، كە ركابەری سەرەكی رەجەب تەیب ئەردۆغانە بۆ هەڵبژاردنە سەرۆكایەتییەكەی ئەو وڵاتە كە بڕیارە لە ساڵی 2028دا ئەنجام بدرێت، نارەزاییان پێیانوایە، دەستگیركردنەكە پاڵنەری سیاسیی لەپشتەوەیە و مەبەست لێی دوورخستنەوەی ئەو كەسایەتییەیە لە ركابەری هەڵبژاردنی سەرۆكایەتی، بەڵام فراوانی نارەزاییەكان كە چەندین حزب و لایەنی تری ئۆپۆزسیۆنیش چوونە پاڵی بە كوردیشەوە، دەری دەخات، هاووڵاتیانی ئەو وڵاتە بێزارن لە بارودۆخی سیاسیی و هەروەها ئابووریی داتەپیو، هەروەها توڕەن لە مامەڵەی حكومەت بەرامبەر بە لایەنە سیاسییەكان بەتایبەتی ئۆپۆزسیۆن، دیارترین حاڵەتیش لەو روەوە رێزنەگرتنی دەسەڵاتی توركیایە، لە ئەنجامی هەڵبژاردنەكانی پێشوو و لابردنی سەرۆك شارەوانییەكانی باكووری كوردستان و دانانی قەیوم لە شوێنیان.
 ئەوەی گومانی تێدا نییە، ئەوەیە ئەم وڵاتەش بەرەو گۆڕانكاری گەورە هەنگاو دەنێت، بەڵام هێشتا قسە كردن لە بارەیەوە زووە.
وادیارە، رۆژانی داهاتوو، توركیا ئاڵۆزی زیاتر بەخۆوە دەبینێت، بەتایبەتی كە دادگای ئەستەنبوڵ بڕیاری دەستگیركردنی ئیمام ئۆغڵۆی پەسەند كرد، ئۆغڵۆش لەسەر پەڕەی خۆی لە (ئێكس) و دوای بڕیارەكە نامەیەكی ئاراستەی گەلی توركیا كردو تیایدا نووسیویەتی: گەلە ئازیزەكەم، خەفت مەخۆن، بێ هیواش مەبن، چونكە ئەوەی لە سستمی دیموكراسی وڵاتەكەمانی دا وخراپەی بەرامبەر كرد، پێكەوە لەرەگەوە هەڵیدەكێشین و ئەم پەڵە رەشە لە مێژوومان دەسڕینەوە. 
وەكو هەڕەشەیەكیش ئۆغڵۆ دەڵێت: رۆژی حساب و لێپرسینەوە بەڕێوەیەو ئەوەی یاری بە ئیرادەی خەڵكەوە كرد دەخرێتە بەردەم دادگا.
دواجار ئیمام ئۆغڵۆ دەڵێـت: دەبێت وڵاتمان بەزووترین كات لەم عەقڵیەتە رزگار بكەین، كە بڕوای وایە، مافی خۆیەتی هەموو شتێك بكات بۆ پاراستنی دەسەڵاتی خۆی..
توركیا لە ئێستادا كەوتۆتە نێوان بەرداشی دوو كەسایەتی سیاسیی، كە ركابەری یەكتر دەكەن لەسەر دەسەڵات،  ئەوانیش ئەردۆغان و ئیمام ئۆغڵۆن، بردنەوەی هەر لایەكیشیان دەسەڵات و حوكمڕانی و سستمی ئەو وڵاتە و سیاسەتی ناوخۆ و دەرەوەی دیاری دەكات.