یەكێتی لەبەردەم پێكهێنانی حكومەتدایە، پێویستیی بە قسەو سەرنجی كادر و ئەندامەكانیەتی
كارەكانی كۆنفرانسی دووەمین دیداری یەكێتی كەوتۆتە رێ و بەرەو دیداری گشتی هەنگاو دەنێت، دیدار و خودی پرۆسەكەش بۆ قۆناغی ئێستای یەكێتی و یەكێتییەكان گرنگی و بایەخی خۆی هەیەو وێستگەیەكی گرنگە بۆ كۆكردنەوەی هەموو ئەو سەرنجانەی كە تا پێش دیدار بواری وتنیان نەبێت.
دیدار زۆر قسەوباسی لێوە دەكرێت، بە باش و بە خراپ و بە راست و چەپ، هەروەها زۆر پرسیاریش بە دوای خۆیدا دەهێنێت، گومانی تێدا نییە هەموو ئەو قسە و باسانە بۆ خۆی دەلالەتە لەسەر گرنگی دیدار بە هەموو سەرنجەكانیشەوە، كە رەنگە كەسانێك گەر یەكێتیش نەبن، لەسەر دیداری یەكێتی دەیخەنەڕوو، چونكە لە بنەچەدا دیدار هەر بۆ ئەوەیە.
وێستگەیەكی تری كاری حزبایەتی
دیدار داهێنانی وێستگەیەكی تری كاری حزبایەتییە كە یەكێتی دەستی داوەتێ، لە كاتێكدایە یەكێتی وەك هەر حزبێكی دیكە، كۆنگرەی خۆی هەیەو سەرلەبەری پەیكەری حزبەكەو سیاسەت و ستراتیژی دەگۆڕێت و بڕیاری گرنگی تێدا دەدرێت، بەڵام لەهەمان كاتدا دیداری ساڵانەشی هەیەو وەك پرۆسەیەك بۆ بەخۆداچوونەوەی ئەم حزبە تەماشا دەكرێت، لە سەرجەم كایەكانی كاری حزبایەتی چ لەسەر ئاستی ئۆرگانەكانی بێت وەك حزب، یان لەسەر ئاستی كارە ئیدارییەكانی بێت لەناو حكومەتدا، ئەمەش بۆ خۆی هەنگاوێكی بوێرانەی ئەم حزبەیە كە بەردەوام هەوڵی ئەوە دەدات گوێی لەهەموو كادرو ئەندامەكانی خۆی بێت، لەهەمووشی گرنگتر دیدار كۆنگرەیەكی دیكەی یەكێتییە بۆ ئەو كادر و ئەندامانەی كە دەرفەتی چوونە كۆنگرەیان نییە، دڵ و مێشكیان پڕە پڕە لە قسەو سەرنج لەسەر كاری حزبایەتی و حوكمڕانییەكەشی.
بۆیە دیدار وەك سەكۆیەكی دیكەی كۆنگرە، بۆتە هەنگاوێكی گرنگ بۆ سەركردایەتیی یەكێتی، تا لە رێگەیەوە باری سەرنجی تەنانەت لایەنگرەكانیشی بزانێت و سەرنجەكانیان بكاتە هەوێنی زۆر لەكاروبارەكانی خۆی، خۆ ئەگەر سەرجەمی راو سەرنجەكانیش جێگەیان نەبێتەوە لەكاتی خۆیدا، بەڵام دەگاتە شوێن و جێگەی خۆی و لانیكەم دەتوانین بڵێین دیداری یەكێتی، گوێیەكی دیكەی یەكێتییە بۆ بیستنی ئەو دەنگانەی نە لە كۆنگرەو نە لە پلاتفۆرمەكانی تری كاری حزبایەتیدا گوێ بۆ بیستنیان ناگیرێت.
یەكێتی لە نێوانی دوو دیداردا...
یەكەمین دیداری یەكێتی تا ماوەی بەستنی دووەمین دیدار، گەر بە وردی تەماشای بكەین، ئەم حزبە بە كۆمەڵێك قۆناغی خێرادا گوزەری كرد و دیدار بووە هەوێنی تێپەڕاندنی بەشێكی زۆر لەو ئاڵەنگارییانەی كە لەبەردەم ئەم حزبەدا بووە، لەهەمووشی گرنگتر، ئێستا بە هۆی دیدارەوە، یەكێتی زیاتر لە خەڵكەكەی خۆی نزیك بۆتەوەو خەڵكەكەشی قسەی زۆری بۆ دەكەن، چاویان لەوەیە لە بەرنامەو پلان و كاری خۆیدا هەنگاو بە هەنگاو جێیان بكاتەوەو بیانكاتە كاری خۆی.
دوای هەڵبژاردنی پەرلەمانی كوردستان و زیادبوونی دەنگەكانی ئەم حزبە، قۆناغێكی گرنگ بوو، بەتایبەتی كە رێژەی دەنگەكانی بەراورد بە دەنگی هەڵبژاردنەكانی دیكە زۆرێك بەرزبوویەوە كە لە چاوەڕوانی دۆست و نەیارەكانیشیدا نەبوو، ئەگەرچی یەكێتی چاوەڕێی زیاتری دەكرد، بۆ ئەوەی دەنگی خەڵك بیكاتە دەنگ و حزبی یەكەم و پێگەو مەقامی بە بەهێزی بهێڵێتەوە.
لە سەروبەندی بەستن و سازدانی دووەمین دیداردا یەكێتی لەبەردەم پێكهێنانی حكومەتدایە، پێویستیی بە قسەو سەرنجی كادر و ئەندامەكانیەتی، لەبەردەم هەڵبژاردنی پەرلەمانی عێراقیشدایە و لەمەشدا پێویستی بە دەنگ و دەست و پەنجەی كادر و ئەندام و لایەنگرەكانیەتی، هەر لەبەر ئەمانەشە دووەمین دیدار دەبێتە وێستگەیەكی گرنگی كاری حزبایەتی یەكێتی، بەڵام بە مەرجی ئەوەی دیداری دووەم لە دیداری یەكەم، زیاتر قسەو باری سەرنجی ئەندامەكانی لە هەنگاوی كاری حزبایەتی و حوكمڕانیدا جێگە بكاتەوە.
بۆیە گرنگە لیژنەی باڵای دیدار، لیژنەكانی دیكەی دیدار بە گرنگییەوە لە راوسەرنجەكانی بەشدارانی دیدارەوە بڕوانن، بە باشتر كاری لەسەر بكەن و سەركردایەتیی یەكێتیش لە جاران زیاتر كار لەسەر پوختەی كۆكراوەی سەرجەم راوسەرنجەكانی كادرو ئەندامەكانی حزبەكەی خۆیان بكەن، دڵنیاشم هەر ئەوە چاوەڕوانی هەمووانە لەو حزبەی كە هەمیشە خۆی بە پێشەنگی داهێنانی كاری نوێیە لە كاری حزبایەتیدا، دڵنیاییەكەشم لەوەوە سەرچاوە دەگرێت، هەمووان جۆش و خرۆشی یەكێتییەكان و بەشدارانی دیدار دەبینن، بۆ ئەوەی هیچ بۆشاییەك نەهێڵنەوە كە قسەی تێدا نەكەن و پەرۆشن بۆ ئەوەی حزبەكەیان بە باشترین شێوە لەناو خەڵكدا لەسەرجەم كایەكاندا ببێتە سەرنجی، لانیكەمی ئەو كەسانەی كە لە دوا هەڵبژاردندا دەنگیان پێنەداو ئەمجارە دەنگی پێ بدەن، خۆ ئەگەر ئەمەكرا ئەوا گومانی تێدا نییە، دیدار دەبێتە ئەرك و پێویستییەكی گرنگی ژیانی حزبایەتی یەكێتی و هەوێنی بەخۆداچوونەوە و چارەسەركردنی كەموكوڕییەكان و بەمەش دیداری یەكێتی دەبێتە هەنگاوێكی زەروریی قۆناغە جیاوازەكان، نەك تەنها پرۆسەیەكی شكڵی.
