یەكێتیی نیشتمانیی كوردستان لە چركەساتی شكستی شۆڕشێکدا، بەهێزی بەرەنگارییەوە، یەكەم هەنگاوی هەڵسانەوەی دەستپێکرد.
ئەوەش هەنگاوێکی سادە نەبوو بەدوای خەونێكدا، بەڵكو بەرۆحی بەرەنگاربوونەوە، رەتكردنەوەی تەسلیم بوون بوو. باوەڕێكی قووڵ بوو بە رەوایی دۆزی نەتەوەیەك، پشت بەستن بوو بە هێزی راستەقینە كە لە ئیرادەی گەلەوە سەرچاوەی دەگرت.
كاتێك نەتەوەیەك تەنیا جێمابوو، لە تاریكی بێ ئومێدیدا بەتەواوی سەرگەردان ببوو و خەریك بوو پاشەكشە بكات و دەستبەرداری ئامانجی شەهیدانی بێت. تەواو لەو كاتەدا مامی گەورە و هاوەڵانی بەرگی بێ ئومێدیان دڕاند، نەك تەنها تەسلیم بوونیان رەتكردەوە، بەڵكو بانگی بەرەنگاربوونەوەیاندا. پشت ئەستوور بە هێزی گەل، داری ئازادییان چەقاند و مافی چارەی خۆنووسینیان كردە ئامانج، بۆیە ناكرێت یەكێتی لەم زەرورەتی هەبوونە جیابكەینەوە كە لە دروستبوونییەوە تا ئێستا مەرجی مانەوە و بەرەو
پێشەوەچوونیەتی. هەر بۆیەش پێچەوانەی دیاردە باوەكان، یەكێتی لە ئاڵۆزی و بێ ئومێدیدا بەهێز و بەهێزتر دەبێت، یەكێتی لە هەنگاوە سەختەكاندا سەركەوتووتر و درەوشاوەترە. بوێریی لە دروستبوونییەوە سەرچاوەی گرتووە.
هەر ئەمەشە وادەكات هەمیشە خوێندەوار و كەسانی واقعبینی نیشتمانپەروەر لە دەوری یەكێتیی نیشتمانیی كوردستاندا كۆببنەوە. ئەو كەسانەی هەستی بەرپەرسیارێتی و دڵسۆزی لە كەسایەتیاندایە، ئەگەر یەكێتیش نەبن، دڵیان لەلای یەكێتییە، دەزانن تاكە ئومێد و مەرجی واقعی بۆ دۆزی نەتەوەیی و ژیانی ئازاد و مافی ژنان و كۆمەڵگەی مەدەنی تەنها یەكێتیی نیشتمانیی كوردستانە.
لەلایەكیترەوە ی.ن.ک بەوە جیادەكرێتەوە كە لەسەرەتای دروستبوونییەوە تا ئێستا پشتیوانییەكانی بۆ دۆزی کورد لە سەرتاسەری کوردستان بوونەتە مەرجی سەركەوتنی خەباتی نەتەوەییمان.
لەم پێناوەشدا باجی گەورەی ناوخۆیی و دەرەكیشی داوە و دەدات و گیانفیدایانە شەهیدی بەخشیوە. بۆیەش دەبینین سنووری دەسەڵاتی یەكێتی بۆتە لانكەی شۆڕشی كورد و بەرخۆدان و رەمزی ئازادی و خەباتی نەتەوەیی.
لەئاستی عیراقیشدا هەمیشە یەكێتیی نیشتمانیی كوردستان هەوڵی واقعیانەی داوە و بە دونیابینی سیاسیانەی هاوچەرخەوە لەپێناوی پاراستنی كوردستان و بەرژەوەندییەكانی كورد خەبات دەكات.
بۆیە هەر كەسێك هەستی بەرپرسیارێتی نیشتمانی و نەتەوەیی هەبێت، دەبێت بێ دوودڵی هەوڵی مانەوە و بەهێزكردنی ئەم حزبە بدات و كاریگەریی ئەرێنی لەسەر دروست بكات، بەرپرسیارێتی نیشتمانی زۆرجار قورسایی لە بڕیارداندا دروست دەكات، ناكرێت هۆشیار و خاوەن قەڵەمەكان چیدی لە دوورەوە رەخنە لە كەم و كورتییەكان بگرن، بەڵكو دەبێت هەموو پێكەوە و لەخۆبووردوانە لەپێناوی ئازادی و دۆزی رەوا و مافەكانمان دەست بە باڵای یەكێتییەوە بگرین و هەڵەكانیشی راست بكەینەوە، ترسان لە بەرپرسیارێتی بۆڵەبۆڵی دوورەدەست دروست دەكات.
یەكێتیی نیشتمانیی كوردستان هەوڵی واقعیانەی داوە و بە دونیابینیی سیاسییانەی هاوچەرخەوە لەپێناوی پاراستنی كوردستان و بەرژەوەندییەكانی كورد خەبات دەكات
هیوادارم سیاسی و رۆشنبیرانمان خۆیان لەمە بەدوور بگرن، بەڵكو وەك مام جەلال دەیفەرموو «با بە سیاسەتی چەپكە گوڵەكەوە، بەرپرسیارێتی هەڵگرین» با پێكەوە هەڵەكان راستكەینەوە و دۆزی رەوای گەل كە یەكێتیی نیشتمانیی كوردستان بە دەریایەك خوێنەوە نوێنەرایەتی راستەقینەی دەكات، سەربخەین.
دەرفەت لەوەوە وەرگرین كە یەكێتی هەر لەسەرەتای دروستبوونییەوە تەنها حزبێكی نەتەوەیی و شۆڕشگێڕی نەبووە، بەڵكو بزووتنەوەیەكی رۆشنبیری و فكریی خاوەن گوتاری هۆشیارانەی سیاسی پێشكەوتووخوازیش بووە. ئێستا دەتوانێت پاڵپشت بە توێژی رۆشنبیر و خەمخۆر، خەباتێكی گشتگیری سەرتاسەری ئازایانە برەو پێ بدات.
لەپێناوی ئەم ناسنامە پیرۆزەدا، یەكێتی باجی یەكجار گەورەی داوە و جیا لەهەموو حزبەكانی تر لە هەموو شوێنێکی کوردستان بەبێ مەرجی پێشوەختە و لەبەرچاوگرتنی هیچ بەرژەوەندییەك، لەجیاتی دەستوەردان لە كاروباری ئەوانیتر و ئاستەنگ بۆ دروستكردن، پشتیوانی دۆزی رەوای گەلەكەیەتی.
بە پێچەوانەی هەندێک لە حزبەكانی تر كە لەسەر جەستەی یەكێتی هەوڵدەدەن خۆیان گەورە بكەن و لەكانیاوەكانی مێژووی پڕ لە سەروەریی یەكێتی، قۆڕگی وشكی بەرژەوەندیخوازانەیان شێدار بكەنەوە.
