هەولێر، پایتەختی كوردستان و یەكێك لە كۆنترین شارە زیندووەكانی دونیا، رەمزی رەسەنایەتی، رەوشت بەرزی و پارێزەری تایبەتمەندییە مرۆڤییەكانە، خەڵكی هەولێر بە سەنگینی و بەخشندەیی ناو و ناوبانگی دەركردبوو، مەردایەتی و مرۆڤدۆستی هەموو جیهان، لە هەولێرەوە سەرچاوەی دەگرت.
بەڵام ئێستا، مەخابن هەولێر بووە بە دوو جەمسەری جیاوازی پارچە پارچەكراو. لەلایەك كۆشك و تەلاری بەرز و بێ گیان و بێ ناسنامە بەبێ وەستان بەرز دەكرێنەوە، لەلایەكەیترش داڕماو و وێرانە و لەژێر گازی ژەهراوی كێڵگە و كارگە نایاساییەكانی ئەهلی كۆشكەكانەوە خنكاوە.
هەولێر لە شاری پێكەوە ژیان و میهرەبانییەوە، گۆڕاوە بۆ شارێكی پارچە پارچەكراوی بە دەیان دیوار لەیەكتری جیاكراوەی داخراو، كە لەناو گەندەڵی و تێكدانی كەلتور و داب و نەریتی خۆیدا خەریكە بەتەواوی ناسنامە رەسەنەكەی لەدەست دەدات.
دیوارە بەرزەكان، پارچە پارچەكردێنك بەبێ شەڕ و بەرگری
لە جیاتی گەڕەكی نوێ، پرۆژەكانی نیشتەجێبوون، هەریەكەیان بووە بە زیندانێكی پۆلایینی دەورە دراو بە دیواری بەرز، كە هەر سوچێكی بە كامێرایەكی پێشكەوتوو كۆنتڕۆڵ كراوە، ئەم زیندانانە دەروازەی رازاوەیان هەیە كە بە كامێرا و گروپێك چەكدار دەپارێزرێن. ئەمانە بۆ پارێزگاری و ئاساییشی هاووڵاتیان نین، بەڵكو هەر دیوارێك كە بەرز كراوەتەوە بۆ جیاكردنەوەی تاكەكانە لەیەكتری، بۆ دروستكردن و تۆخ كردنەوەی چینایەتییە، ئیتر شار نەماوە و بووە بە كۆمەڵێك بەندیخانەی گەورە كە تیایاندا كەس كەسیتر ناناسێت! بەمەش سیمای راستەقینەی شار شێوێنراوە و دووركەوتنەوە و دابڕانی تەواو لەنێوان تاكەكان دروستكراوە، لەهەمان كاتدا دەرفەتی تەواویشی بە بەرپرسان داوە جۆرەها بازرگانیی ناشەرعی لە پشت دیوارەكانەوە برەو پێ بدەن، لەژێر جۆرەها ناونیشانیش پارە لە خەڵك بستێنن و داگیركاریی زەویوزاریش بەردەوامیی پێ بدەن.
دیوارەكان بوون بە بەربەست لەبەردەم گەنجانمان كە وەك جاران یەكتری بناسن و هاورێیەتییان هەبێت، تا لە رێگای پێشبڕكێی توانستی، ئەقڵی، رۆشتنبیری و وەرزشییەوە برەو بەتواناكانیان بدەن.
ئیتر خەڵكی شار بەشداریی لە خۆشی و ناخۆشی یەكتری ناكەن، دابڕاندن بە رادەیەكە كە خەباتی پێكەوەیی لەپێناوی شار و وڵات بەتەواوی كۆتایی پێهێناوە.
هەمووان دەزانین گەندەڵی لە دابڕانی خەڵكەوە چەكەرە دەكات و پاشان دەبێتەوە ژەهرێكی كوشندە بۆ گیانی خەڵك و وڵات. كاتێك دابڕانی كۆمەڵایەتی و رۆشنبیری دروست دەبێت، گفتوگۆ و كاری پێكەوەیی لە نێوان خەڵكدا نامێنێت.
هەر ئەمەشە وادەكات چاودێریی كۆمەڵایەتی نەمێنێت و سیاسییە بازرگانەكان بەتەواوی برەو بە بازرگانییە قەدەغەكراوەكانیان بدەن و شوێنی خراپەكاری و بەلارێدابردنی گەنجان گەشە پێبدەن، لەجیاتی گرنگیدان بە توانا و لێهاتوویی و پەروەردەی پیشەیی گەنجان، دەسەڵاتی شار و هەندێک جار خەریكی سەرقاڵكردنیانە بە بابەتی لاوەكی و ململانێی بێ بەها و چاندنی رق و كینە لەنێوان چین و توێژەكان.
بێدەنگیی تاك بە تاكی خەڵك بەهۆی دابڕان لەیەكترییەوە، دەرفەتی تەواوی گەشەی خۆسەپێنیی گروپێكی خۆپەرستی دروستكردووە و شاری خامۆش و دەستەمۆ كردووە.
قوربانیدانی خەڵكی ئەم شارە لەم پێناوە نەبوو!
كاتێك ئەو راستییانە دەبینین زیاتر و زیاتر درك بە گرنگیی هەڵوێستی مەردانە دەكەین، ئایا قەرەمانانی ئەم شارە لەپێناوی باڵەخانەی فرۆشراو بە عەرەب و تورك خۆیان بەخت كرد؟ یان لەپێناوی برەودان بە بازرگانی كردن و هێنانی ژنانی جەستەفرۆش لە وڵاتانەوە بۆ سەرقاڵكردن و رووتاندنەوەی گەنجانی شار بوو؟
ئەم شارە بەسەركردایەتی یەكێتیی نیشتمانیی كوردستان و بوێریی كەسانی مەردی وەك كاك كۆسرەت و خوێنی سەدان پێشمەرگەی قارەمان ئازاد كراوە و رۆڵەكانی شار خوێن و رۆحیان بۆی بەخشی، بەڵام ئێستا هەولێری هۆلاكۆ بەزێن زەوییەكانی بەتاڵان داگیر دەكرێن و هەرزان فرۆشی بێگانە دەكرێن! لەم شارەدا بێگانە سەردەست و خانەخوێ خزمەتكارە!
بەڵێ تا ئەم شارە جارێكیتر رزگار بكەینەوەو سیما و رۆحی هەولێر بگێڕینەوە، جگە لە بڕیاری بوێرانە و سیاسەتێكی دروست، پێویستمان بە ئازایەتی و دڵسۆزی و قوربانیدان هەیە.
سیاسەتی بەڕێوەبردن، دەبێت لەپێناوی شار و خەڵكی شار بێت، ئەوكاتە رزگاركردنی هەولێر لە روخاندنی سەرجەم دیوارەكانەوە دەست پێ دەكات. ئەم دیوارانە جۆرەها گەندەڵی و ترس و تۆقاندنیان گەشە پێداوە. خەڵكی شاریان لەیەك دابڕاندوە و چینایەتییان برەو پێداوە.
دیوارەكان رقیان بەرهەم هێناوە، بێ ئومێدی لەلایەك و چاوچنۆكیان لەلایەكەیترەوە گەشە پێداوە.
دیوارەكان شاریان بەتەواوی خنكاندوە. تۆ بڵێی لە پشت دیوارەكانەوە هاوارمان بەكوێ بگات؟
