مێژووی مام جەلال، میراتێکی دەوڵەمەند، کێ هەڵگری دەبێت؟

سەرۆکی ی.ن.ک باوەڕی بە پێکەوەژیان لەناو عیراقی فیدراڵدا هەیە و پێیوایە تاکە چارەسەری سەردەمییانەی کێشەکان، هەر ئەم یەکتر قبووڵکردنەیە کە خەڵکی هەرێم بەرەو کەناری ئارامی دەبات، ئەگەر بهێڵن پیادە بکرێت

مام جەلال لە تەمەنی زۆر لاوێتییەوە چۆتە ناو کاری سیاسییەوە، هەرزوو چۆتە ناو ناوەندی بڕیار، ژیانی ئەو قوتابخانەیەک بووە بۆ نەتەوەیەک کە ئێستا سوود لە ئەزموونەکانی وەردەگیرێت، جا ئیتر چۆن ئەندامانی خێزانەکەی کە لەگەڵیدا ژیاون و زۆرترین بەرکەوتەیان لەگەڵیدا بووە، نابنە خوێندکاری بەردەستی ئەو و شایەنی ئەوە نابن ئەمڕۆ لەدوای چەند دەیەیەک تێکەڵبوون بەکاری سیاسی، لەگەڵ ئەو سەرکردە بە ئەزموونە، ببنە روویەکی دیاری حزبەکەی ئەو؟ 
من کاتێک باسی مێژووی سیاسیی خۆم دەکەم، ناچارم باسێک لە باوکم بکەم، چونکە من بەهۆی ئەوەوە بە جیهانی سیاسی و حزبایەتی ئاشنا بووم، ئەو بووە رێنیشاندەر و رووناکبیرکردنی هزری من.

دەستاودەستکردنی دەسەڵات
هەموومان وەک یەک ئەو هەلە زێڕینەمان بۆ نەڕەخسا تا لە نزیکەوە تێکەڵی مام جەلال ببینین و لێیەوە ببیستین و فێر ببین، بەڵام کوڕەکانی هەمیشە لێیەوە نزیک بوون، ئەمەش وایکردووە سەدان وتە و پەند و فەرمایشتی لێ ببیستن و بیکەنە ئەزموونی سیاسی خۆیان.
باشترین شێوازی کارکردنی حزبی لە کەشی دیموکراسیدا، ئەوەیە کە کەسێک دەڕوات یەکێکی تر دێتە جێگەی و مەرج نییە ئەو کەسە تا لە ژیاندا بێت هەر لەو پلەیەدا بێت ئەگەر لەو بە هەژموونتر و بەتوانا تر و بە گوڕ تر هەبێت، بێگومان کەسانێک کە لە دەوری رابەرێک کار دەکەن، هێندەی ئەزموون لێ وەردەگرن تا رۆژێک ببنە جێنشینی ئەو.
ئەمڕۆ یەکێتی تیمێکی بەهێز و چالاک و دڵسۆزی دەوێت کە درێژەپێدەری خەباتی یەکێتی بێت لە گۆڕەپانەکە و نەهێڵێت پاشەکشە بکات، بۆ سەربەرشتیاری ئەم تیمەش کەسایەتیی وەک هەڤاڵ بافڵ تاڵەبانی، شیاوە و لە زۆر کەسی تر زیاتر هەڵگری ئەزموونی باوکییەتی، بەتایبەتی لە شێوازی هەڵسوکەوت و مامەڵەی لەگەڵ کێشە سیاسییەکاندا.

دەڵێن سەرکردە گەنجەکە!
زۆرێک لە سەرکردە جیهانییەکان لە تەمەنی لاوێتیدا بوون بە سەرۆک و رابەر، مام جەلال لە تەمەنی 25 ساڵیدا لە سەرکردە دیار و چالاکەکانی کورد بوو، لینین لە تەمەنی 47 ساڵیدا رابەرێتی گەورەترین شۆڕشی لە روسیادا کردووە، ستالین لە تەمەنی 44 ساڵیدا سکرتێری گشتی حزبی شیوعی سۆڤیەت بوو، موعەممەر قەزافی لە تەمەنی 27 ساڵیدا رابەری لیبیا بوو، جەمال عەبدولناسڕ لە 38 ساڵیدا سەرۆکی میسر بوو، فیدڵ کاسترۆ لە 33 ساڵیدا، 
سەرۆکی یەکێتی ئێستا، زۆر نییە پێنجەمین دەیەی تەمەنی تێپەڕاندووە، ئەو گەنجە نییە تازە هاتبێتە ناو جیهانی سیاسەتەوە، ئەو چونکە نزیک بە 30 ساڵ یاوەری مام جەلال بووە زۆرێک لەو ئەزموونانەی وەرگرتووە و لە پاڵیشیدا بە ئاگا بووە لە دۆخە سیاسییە ناوخۆیی و ئیقلیمی و جیهانییەکان، ئێستاش کاتێک دەچێتە بەغدا زۆرێک لە  سیاسییەکانی عیراق لە نزیکەوە دەیناسن و دەزانن شێوازی مامەڵەکردنی سیاسیی ئەو چۆنە و زۆریان هیوای ئەوەی بۆ دەخوازن کە جێگای مام جەلال بگرێتەوە. دەکرێت فێر بوون و ئەزموونی لە باوکییەوە بۆ مابێتەوە، بەڵام پلەی سەرۆکی بە رۆڵی خۆی و دڵسۆزیی خۆی بەدەستهێناوە.
ئەمڕۆ یادی 50 ساڵەی دامەزراندنی ئەو حزبەیە کە سەرۆکەکەی بافڵ تاڵەبانی-یە، زۆرێک لە جەماوەری یەکێتی و کادر و ئەندامانی، چاوەڕوانی هەنگاوی باشی بنیاتنەرانەی لێ دەکەن، بەهەمان دڵسۆزیی مام جەلال بۆ کورد و یەکێتی هەنگاو بنێت. 
دەبینین هەست و سۆزی ئەو رەنگدانەوەی لەسەر سیاسەتی یەکێتی هەیە سەبارەت بە نەتەوەی کورد و کێشە جۆراوجۆرەکانی، ئەو لە گەرمەی دژایەتیکردنی یەکێتیدا هاواری دەکرد و سڵاوی بۆ کورد لەهەر جێیەک دەنارد، ئەو لەدوای ناردنی درۆنەکان بۆ سەر ئەم دەڤەرە سڵاوی بۆ کوردی رۆژئاوا دەنارد. 
ئەوەی لە هەمووی گرنگترە، سەرۆکی ی.ن.ک باوەڕی بە پێکەوەژیان لەناو عیراقی فیدراڵدا هەیە و پێیوایە تاکە چارەسەری سەردەمییانەی کێشەکان، هەر ئەم یەکتر قبووڵکردنەیە کە خەڵکی هەرێم بەرەو کەناری ئارامی دەبات، ئەگەر بهێڵن پیادە بکرێت.

خەڵک چی لە یەکێتی دەوێت؟
 خەڵک، مووچە، خزمەتگوزاری، تەندروستی، سەقامگیری و چەسپاندنی یاسای دەوێت، ئەمیش لە رێگەی ئەو سیاسەتەوە دەکرێت کە یەکێتی و سەرۆکەکەی هەوڵی بۆ دەدەن و دەیانەوێت لە رێگەی بەشداریی کاراوە لە حکومەتی نوێی هەرێم، هەنگاوی پراکتیکی بۆ بنێن، تا چیدی هاتنی مووچە نەبێتە موژدە، دەیانەوێت سامانی وڵات بەیاسایی بفرۆشرێت و داهاتەکەی شەفاف بێت و پەیوەندییەکانی هەرێم و بەغدا نەبێتە هەوێنی تێکدانی ناوچەکە لەلایەن هیچ دەستێکی دەرەکییەوە، متمانە بگەڕێتەوە بۆ گەلانی عیراق و پێکەوە ژیانیان. 
بۆ بەدیهاتنی ئەمانەش، یەکێتی پێویستی بە یەک هەڵوێستی و پتەویی ئەو تیمەیە کە سەرکردایەتی دەکات، دەبێت ئەوان بە رۆحی هاوکارییکردنی یەکەوە و بە دڵسۆزییەوە بۆ یەکێتی و جەماوەرەکەی و هەرێمی کوردستان هەوڵ بدەن، نەک پۆست و بەرژەوەندی و مانەوەی خۆیان لە لووتکەدا بە هەند وەربگرن، چونکە مانەوەی ئەوان و هەموو یەکێتییش، پەیوەستە بە ئاستی پێشکەشکردنی خزمەتەوە بە میللەت، نەک پشت تێکردنی.