شوان شەفیق
دەستێك توند بە گەردنی
ئێوارەیەكی نارنجییەوە
دەگرم
دەستەكەی تریشم دەكەمە ملی شەوگار
گۆرانی وەرە یاری نازدار دەڵێم
ئاوازی كەوتنی قەترە قەترەی
ئارەقی سنگی مانگ دەژەنم
ختووكەی ئەستێرەكان دەدەم
بۆ كشان نوكتە دەكەم
قژی تەنیایی شانە دەكەم
بەیانییەكەی لە سوچێكی ئەم زەوییە پڕ ژاوەژاوە
قاپێك ئارەقی مەستەكی
دەخۆمەوە
نامەوێ گوێ لە چرپەچرپی ئێوە بگرم
نامەوێ دیمەنی روخسارتان ببینم
نامەوێ و نامەوێ نامەوێ
بتاندوێنم
دەزانن ئیرەیی بە بەئاگاییتان دەبەم
ئەی بێ ئاگاكان لە من!
كە مەست دەبم
ئەندێشەكانم تووڕ دەدەم.
لەسەر مێزی دانپێدانان
بەرانبەر كورسی هەقیقەت دا دەنیشم،
رابردوو دەدەمە دادگا
خواستی من نییە زیندانی هەستەكانم بم
بێزار بێزار بووم
لە مرۆڤە بێ سەرەكان
لە بێ هەستەكان
لەوانەی نابیستی دەنگی گریان
نابینای فرمێسكەكان
لێدانەكانی دڵن!
كە مەست دەبم
سست نابم
نابمە ئەوان
ئەوان هەزاران سیگاریان پێ فڕێدامە
ناو زبڵدان
سییەكانیان یەك پارچە كردمە قەتران
بە شەونمی گەڵایەك هەناسە دەدەم
بە لاواندنەوەی گوڵێك خۆم تێر دەكەم
تووڕە تووڕە
یەخەی ناسكی پەروانە دەگرم
كراسی شەهوەتی دەدڕێنم
باڵی پەپوولەیی گڕ دەدەم
مۆمی تەمەن دەسووتێ
بە فیڕۆ دەچێ ژیان
بەو قەهرەوە
گوێی پێ نادەم
شەلال!
كۆت!
بەند!
نابم
كە مەست دەبم
لەسەر مێزی كەیف و سەفا
وەك قومارچییەكانی خاك!
گەمە بە دواڕۆژی گەلێكەوە ناكەم
نیشتمان بە شوودان
بۆ بوودەڵە پیاوانی وڵات
ئەركی من نییە
ئەو كارە بۆ قەڵەم فرۆشانە
هەر ئەوە بەشیانە لە ژیانا
كە مەست دەبم
جڵەوی ئازارەكانم باشتر دەگرم
پیاسەكانم زیاتر دەكەم
زیاتر دەنووسم
بە مەستی راستگۆیانە تر دێر بە دێر
لە نەخۆشخانەی چاكسازیدا
تەقڵ لە دوای تەقڵ لەبرینەكانی كۆمەڵگا دەدەم
لە گلان دەترسم
لە گلۆر بوونەوە
دەزانم گرەو لەسەر هەڵنەستانەوەم كراوە
هەڵدەستمەوە!
سەردەمێكە گەر كۆیلەی پارە و ناو ناوبانگ نەبیت
وەك ئەو ژنانەی دوور لە جوانكارین
دەخرێیتە مۆزەخانەی مێژووەوە
چ بەختەوەرییەكە خودبوون؟
چەند ناشیرینە لەوان چوون؟
دەپرسم بۆ ئەوەندە گەورەیە مرۆڤبوون.