جێگر خدر
ئەو دیارییە داراییەی سەرۆكی یەكێتی كە لە یادی كیمیابارانكردنی دۆڵی بالیسان بە دانیشتووانی سنوورەكەی بەخشی، چەندین پرۆژەی گرنگی پێ جێبەجێكرا، ئێستا قیرتاوكردنی رێگەی بالیسان-شكارتە لە قۆناغی تەواوبووندایە.
مەهدی مستەفا بەڕێوەبەری ناحیەی بالیسان بە كوردستانی نوێ-ی راگەیاند: لەسەر راسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان و بە هەوڵی راستەوخۆی قوباد تاڵەبانی جێگری سەرۆكی حكومەت، پرۆژەكانی ناحیەی بالیسان كە ماوەیەكی زۆر بوو پەكیانكەوتبوو، كەوتوونەتەوە كار و كاركردنیش بەردەوامە، رێگەی بەستنەوەی بالیسان بە شكارتە، كە ماوەیەكی زۆر بوو بێكەڵك ببوو، ئێستا كاركردن لە قۆناغی كۆتاییدایە، وتیشی: رێگەكە، ستراتیژی و گرنگە، پارێزگاكانی سلێمانی بە هەولێر و دهۆك، هەروەها ئیدارەی راپەڕین بە ئیدارەی سۆران دەبەستێتەوە، 23 كیلۆمەتر و نیو درێژییەكەیەتی و بودجەی تەرخانكراویش بۆی حەوت ملیار و 698 ملیۆن دینارە.
ئەمساڵ لە یادی كیمیابارانكردنی دۆڵی بالیساندا، بە بڕیاری سەرۆك بافڵ، بڕی زیاتر لە یەك ملیار دینار بۆ تەواوكردنی چەند پرۆژەیەك، وەك دیارییەك پێشكەشی دانیشتووانی دۆڵی بالیسان كرا.