ئەمەل جەلال سەرۆكی دەستەی گەشتوگوزار داوا لە شوێنە گەشتیارییەكان دەكات، میوزیك و گۆرانی كوردی پەخش بكەن و تابلۆی هونەرمەندانی كوردستان بەكاربهێنن.
ئەمەل جەلال دەڵێت، دوای بەدواداچوونەكانیان بۆیان دەركەوتووە زۆربەی بنكە گەشتیارییەكانی هەرێمی كوردستان زیاتر میوزیكی بیانی پەخش دەكەن و دیوارەكانیان بە تابلۆی هونەرمەندانی بیانی و وێنەی وڵاتانی دیكە ڕازاندووەتەوە، كە ئەوەش لەگەڵ پاراستنی شوناس و فەرهەنگی نەتەوەیی یەكناگرێتەوە.
داواش لەسەرجەم بنكە گەشتیارییەكان دەكات، بە چێشتخانە و هۆتێل و مۆتێل و شوێنەكانی دیكەوە، بە ئەركی نیشتمانی و مۆراڵی خۆیان هەڵبستن و فەرهەنگی وڵات بپارێزن و زیاتر پشت بە میوزیك و گۆرانی كوردی و بەكارهێنانی تابلۆی هونەرمەندانی كوردستان ببەستن و گەشتیاران ئاشنا بكەن بە سروشتی ناوازە و مێژووی شوێنەوارە دێرینەكان.
وتیشی، بەو جۆرە نەك تەنها ئەزموونی گەشتیاری دەوڵەمەند دەبێت، بەڵكو شوناسی نەتەوەیی بەهێز دەبێت و دەبێتە پاڵپشتی بۆ هونەرمەندانی ناوخۆیی و بەرهەمەكانیان.
