عزەت یوسف
بەریا دەهـ ساڵەكان، فیلمەكێ دوكیومێنتەری لسەر كەنالێ تەلەڤزیۆنەكا كوردی هاتە نیشاندان، سێ كەسێن پسپورێن بایولوجی یێن بیانی لگەل دەلیلەكێ دانعەمرێ خەلكێ دەڤەرێ، ب مەرەما زانستی هلباسكی چیایەكێ بلند بوون. گەلەك ژ دەڤەرا بنارێ چیای یا ب سیمەی پەرژان كری بوو. كەسێ دەلیل بۆ وان سێ كەسان گۆت: (من هەمی ژیانا خوە یا ل ڤێ دەڤەرا چیای بوراندی، لەوا هەتا نها ئەز یێ ساخلەم و یێ لسەر شیانا خوە... هەیهوو - ئاخینكەك راهێلا - ئەڤ دەڤەرە هەمیا بەردایی بوو، ئەڤ چیایە پشت و پەنا مە هەمیا بوو... رەنگە پاش دوو سالێن دیتر، ئەڤە چیایە هەمی ببیتە ملكێ دوو كەسان!).
چالاكڤانێ ئاشتیێ یێ ڤیەتنامی (تیك هانت) د پەرتووكا (ڤیانا ئەردی)دا دنڤێسیت: (مە پێدڤی ب شۆرەشەكێ هەیە، دەستپێكێ ب حەژێكرنا ئەردی دەستپێدكەت). د زنجیرەكا نامەیێن ب ئاوایەكێ جوان نڤێسین بۆ ڤیانا ئەردی، پراكتیكێن پێشنیار كری، گاڤێن چاكبوونێ، رێبەرێ پراكتیكی و مسۆگەركرنا ژیانێ ل دوور چەوانیا حەژێكرنا ئەردی پێشكەشی مە كرییە. دیسا راڤە دكەت (هیچ جوداتی دناڤبەرا چاككرنا خوە و چاككرنا هەسارێ دا نینە، بۆچی گرنگیدان ب ژینگەهێ ئەرك نینە! نێ بابەتێ مان و بەختەوەریا مە هەمیانە).
د حەژێكرنا كەوی دا كەوی نەگرە. د نامەكێ دا ب ناڤێ (ڤیان و حەژێ كرن) بۆ كەوێ ركەهكری هاتیە: (هەكە حەژ تە كربان تۆ نەدگرتی، تۆ پەڕ هلكێش نەدكری. ژینگەها تە تێكنەددا و لیس و تۆزگەڤزكا تە نە دگوهارت و تۆ د رەكەهێ دا زیندان نەدكری، یان تۆ ژ فڕینی زربار نەدكری. هەكە تۆ ڤیابای، داهێلن تۆ ل چیایێن بلند ب حەزا خوە ب قەبی و ژیانا خۆرستیا خوە ب ئازادیا خوە بهەلبژێری).
وەسا دبینم، ئەگەر تە راستی بڤێت ژینگەهێ بپارێزی، دڤێت تۆ ژ بچویكی دەست پێبكەی. ئەم بچویكین ب هەڤبەری بوویەرێن سروشتی یێن ژینگەهێ. وەك كەلتۆرەك، مە ب كوتەكی دەست ب تێگەهشتنا بارێ نائاسایی یێ ژینگەهێ كر، گەلەك كێمتر ژ قەبارێ پێتڤی یێن بەرسڤا مە. ئەگەر ئەم بخازین بژین، هەر كەسەك ل جهێ خوە دكاریت ژینگەهێ بپارێزیت؛ تەنێ ئەوێن مەیلا پاراستنێ نەبن.
