ئا: كوردەوان محەمەد سەعید
خۆرهەڵاتی ناوەڕاست لە دۆخێكی نائارامدا دەژی، هەر پەرەسەندنێكی ململانێكانیش كاریگەریی گەورەی دەبێت بۆ سەر ئابووریی وڵاتانی ناوچەكە و جیهان بە گشتی، لەو نێوانەشدا مەترسیی گەورە لەسەر بازاڕی نەوتە، چونكە دوای هێرشە موشەكییەكەی ئێران بۆ سەر ئیسرائیل، ئەگەری وەڵامدانەوەی ئیسرائیل لە ئارادایە و هەر هێرشێكی ئیسرائیلیش بۆ سەر دامەزراوە نەوتییەكانی ئێران راستەوخۆ كاریگەریی لەسەر بازاڕی نەوت دادەنێت.
دۆخی ئێستای ئابووریی جیهان، تەنیا چاوەڕوانی و نیگەرانییە، چونكە ئاراستەی رووداوەكان نەزانراوە، ئابووریش بە سروشتی خۆی، هەر جۆرە نیگەرانییەك كاری تێدەكات و لە ئەگەری قەیران نزیكی دەخاتەوە، بازاڕی نەوت تا ئێستاش ئارامە و چاودێرانی بواری نەوت و پسپۆڕانی بواری ئەمنیش بە دووری نازانن ئیسرائیل هێرش بكاتە سەر دامەزراوە نەوتییەكانی ئێران، بە تایبەتیش بەندەری هەناردەی نەوتی دوورگەی خارك، كە %90ی نەوتی ئێران لەوێوە هەناردەی دەرەوە دەكرێت، ئەگەر هێرشێكی لەو جۆرەش روو بدات، گومانی تێدا نییە كە نرخی نەوت بەرز دەبێتەوە.
بەشێك لە چاودێرانی بازاڕی نەوت پێیان وایە كاریگەریی ململانێكانی خۆرهەڵاتی ناوەڕاست لەسەر بازاڕی نەوت زۆر قورس نابێت، لەبەر ئەوەی ئەمریكا نەوتێكی زۆری عەمباركراوی هەیە
هێشتا زووە
جۆلی كۆزاك وتەبێژی سندوقی نەختینەی نێودەوڵەتی لەو بارەیەوە دەڵێ: ئەگەری پەرەسەندنی بارودۆخەكە مەترسییەكان زیاتر دەكات و نیگەرانی و نادڵنیاییش كار دەكاتە سەر ئابووریی ناوچەكە و جیهانیش. وتیشی: هێشتا زووە بۆ پێشبینی كاریگەرییەكانی دۆخی خۆرهەڵاتی ناوەڕاست لەسەر ئابووریی جیهان، بەڵام لە ئێستاوە كاریگەرییەكانی لەسەر خودی ئابووریی ناوچەكە دەركەوتووە.
بۆچوونی جیاواز هەیە لەبارەی ئەگەری بەرزبوونەوەی نرخی نەوت لە كاتی پەرەسەندنی رووداوەكانی خۆرهەڵاتی ناوەڕاستدا، بەشێك لە چاودێرانی بازاڕی نەوت پێیان وایە كاریگەریی ململانێكانی خۆرهەڵاتی ناوەڕاست لەسەر بازاڕی نەوت زۆر قورس نابێت، لەبەر ئەوەی ئەمریكا نەوتێكی زۆری عەمباركراوی هەیە و وڵاتانی ئەندامی رێكخراوی ئۆپێك پڵەسیش لە توانایاندا هەیە هەر جۆرە كورتهێنانێك لە خستنەڕووی نەوتدا لانیكەم بۆ مەودای نزیك پڕ بكەنەوە.
وەبەرهێنەران و پەناگەی ئارام
وەبەرهێنەران لەسەر ئاستی جیهان، لە دۆخێكی وادا بە دوای پەناگەی ئارامدا دەگەڕێن بۆ سەرمایەكانیان، وەك پەنابردن بۆ كڕینی قەواڵە و هەندێك جاریش زێڕ دەكڕن، بۆ ئەوەی بە كەمترین زیان لە دۆخەكە دەربچن.
ئەندرۆ بێلی سەرۆكی بانكی ئینگلتەرا بە رۆژنامەی گاردیانی راگەیاند، بانكەكەیان رەنگە زووتر نرخی سوود دابەزێنێت، ئەگەر گوشاری هەڵاوسان بەردەوام لە كەمبوونەوەدا بوو، ئەمەش بەو مانایە دێت كە سەرۆكی بانكە ناوەندییەكان تا ئێستاش ململانێی خۆرهەڵاتی ناوەڕاست بە هەڕەشەیەكی جددی نابینن. ئەندرۆ بێلی جەختی لەسەر ئەوە كردەوە، كە تا ئێستا سەرجەم لایەنەكان پابەندن بە پاراستنی سەقامگیریی بازاڕی نەوتەوە، ئەوەش جێی دڵخۆشییە.
سەرچاوە: پرۆجێكت سەندیكەیت
