رۆژی پێنجشەممە، هەڤاڵ شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی(ی.ن.ک) لەڕێوڕەسمێکدا لە شاری سەیدسادق پێشوازی لە گەڕانەوەی جەبار جەلال، ئەندامی پێشووتری جڤاتی نیشتمانی بزووتنەوەی گۆڕان کرد کە خۆی و سەدان هەڵسوڕاو و لایەنگری بزووتنەوەی گۆڕان گەڕاونەتەوە نێو ریزەکانی یەکێتیی نیشتمانیی کوردستان، لەنێویشیاندا لێپرسراوی بازنەکانی ناڵپارێز و گەرمک و جێگری لێپرسروی بازنەی ناڵپارێز و لێپرسراوی رایەڵەی پێشمەرگە.
لەو رێوڕەسمەدا کە هەریەک لە هەڤاڵان جەمیل هەورامی و حامید حاجی غالی و عومەر حاجی ئەحمەد و هەڵۆ پێنجوێنی ئامادەیبوون، هەڤاڵ شێخ جەعفەر، باسی لە رۆڵی بەرچاوی جەبار جەلال کرد لە شۆڕشی نوێ و وێستگەکانی تری ژیانی سیاسی یەکێتیدا کە جێدەستی دیارە، هەروەک بەناوی سەرۆک و سەرکردایەتی یەکێتییەوە بەگەرمیی بەخێرهاتنەوەی کردن بۆ ناو ریزەکانی حزبی خۆیان و پێیڕاگەیاندن، ئێوە کۆمەڵێک تێکۆشەری ماندوونەناسن و حزب بەچاوی رێزو پێزاینەوە لە تێکۆشانتان دەڕوانێت و جێگای هەموو تێکۆشەرانی کوردستانی تێدا دەبێتەوە.
لەبەرانبەردا، جەبار جەلال بەناوی خۆی و هاوڕێکانییەوە، پشتیوانی تەواوی خۆیان بۆ بەرنامە و ئەجیندای نیشتمانی و نەتەوەییانەی یەکێتی دووپاتکردەوە و رایانگەیاند، لەئێستادا یەکێتی کاریگەرترین هێزی سەر گۆڕەپانی سیاسی هەرێمە بۆ گۆڕانکاری و بووەتەوە بە تاکە ئومێدمان، هەر بۆیە بەتەواوی هێزمانەوە پشتیوانی دەکەین و هەموو وزەو توانایەکمان بۆ سەرخستنی بەرنامەکەی دەخەینەگەڕ.
هەر لەو رێوڕەسمەدا، هەریەک لە هەڤاڵان جەمیل هەورامی و حامیدی حاجی خالید، لە دوو وتەی جیادا بەخێرهاتنەوەی جەبار جەلال و هاوڕێکانیان کرد بۆ نێو ریزەکانی یەکیتیی نیشتمانیی کوردستان.
