ئا: كوردەوان محەمەد سەعید
تێڕوانینی بەریتانییەكان بۆ سۆرپەرماركێت، وەكو سیستمی چینایەتییە دێرینەكەیان ئاڵۆزە، تۆ ئەگەر لەوێ بژی، ئەو سۆپەرماركێتەی هەڵی دەبژێریت بۆ كڕینی پێداویستییەكانت، ئاستی چینایەتی و پێگەی كۆمەڵایەتیت دەستنیشان دەكات، وەك چۆن ماركە و مۆدێلی ئۆتۆمبێلەكەت، یان ماركەی جلوبەرگەكانت گوزارشتە لە ئاستی چینایەتیت، ئەمانە یاسایەك نین بە رەسمی تۆمار كرابن، بەڵام بە روونی جیادەكرێنەوە و جێگەی سەرنجن.
دیاردەی چینایەتی و دەستنیشانكردنی پێگەی كۆمەڵایەتی، ئەوە لای خودی هاووڵاتییە، بەڵام لە دیوی سۆپەرماركێتەكانەوە باتەكە لەوە ئاڵۆزترە و پەیوەندیی بە كێبڕكێی نێوانیان و هەڵكشان و داكشانی ئابووری و هێزی كڕینی هاووڵاتیانەوە هەیە، بۆ نموونە سۆپەرماركێتی (ویتروز) تایبەتە بە چینە كۆمەڵایەتییە بەرزەكان، بەڵام (ماركس ئاند سپێنسەر) تایبەتە بە چێنێكی جیاواز و ئێستا كڕیاری ئەم ماركێتەیان لە زیادبووندایە، بە گوێرەی كۆمپانیای زانیاریی تایبەت بە بەكاربەران (NIQ) ئەم ساڵ كڕیارەكانی (ماركس ئاند سپێنسەر) 800 هەزار كەس زیادیكردووە، هەر بۆیە ئەم ماركێتە بەراورد بە ساڵانی پێشوو هەنگاوی باشی ناوە، هەرچەندە هێشتا زۆر دوورە لە ئاستی ماركێتی (تیسكۆ)وە كە %27ی بازاڕی بەریتانیای بۆ خۆی مسۆگر كردووە.
ئەو سۆپەرماركێتەی هەڵی دەبژێریت بۆ كڕینی پێداویستییەكانت، ئاستی چینایەتی و پێگەی كۆمەڵایەتیت دەستنیشان دەكات، وەك چۆن ماركە و مۆدێلی ئۆتۆمبێلەكەت، یان ماركەی جلوبەرگەكانت گوزارشتە لە ئاستی چینایەتیت
گۆڕینی پلان
هۆكاری زیادبوونی كڕیارەكانی ماركێتی (ماركس ئاند سپێنسەر) دەگەڕێتەوە بۆ گۆڕینی پلانی فرۆشی ماركێتەكە، پێشتر ئەو ماركێتە زیاتر كاری بۆ راكێشانی كڕیارانی دەستەبژێر و ئاستبەرز دەكرد، بەڵام ئێستا كار دەكات بۆ راكێشانی زۆرینەی كڕیارەكانی بەریتانیا، هۆكاری سەرەكی گۆڕینی پلانەكەشی بارودۆخی ئابووریی بەریتانیایە، بە تایبەتیش قەیرانی هەڵاوسانی نرخ، كە لە ساڵی 2022دا گەیشتە %11.1 و بەرزترین ئاست بوو لە ماوەی 40 ساڵی رابردووی مێژووی بەریتانیادا.
ئێندیپێندنت
