ئا: بامەڕنی
ھیچ كارەك یێ سەركەفتی نابیت، ئەگەر ئەو كارێ هەنێ نەھێتە هەلسەنگاندن و تایبەتی ژی كارێن داھێنانێ و كارسازیێ. شانۆگەریا بارانا درەوان كو ل رۆژێن (2 – 3- 4)ێ ڤێ هەیڤێ ل ھولا (محەمەد عارفێ جزیری) ھاتیە نمایشكرن، ئێك ژوان كارێن ھونەری بوو، كو ژ چەند لایەنانڤە سەرنجا من راكێشایی، ئێك وەك لەیستنا ئەكتەران ل سەر دەپێ شانۆیێ و دو ئەو بابەتێ شانۆیێ بخوەڤەگرتی و سێ ئەو كەسێن ھاتینە پێش شانۆگەریێ. ئەگەر ل سەر لەیستنا ئەكتەران راوەستین ل سەر دەپێ شانۆیێ، كونترولكرنا دەپێ شانۆیێ و كا چەند شیایین بینەری بخوەڤە گرێدەن؟ كو ئەڤە ئێك ژوان خالان بوو ژبۆ من وەك بینەرەك، من دڤییا ئاستێ شانۆڤانێن مە بزانم و راستی بیت، لەیستنەكا جوان بوو خوە ئەگەر بەرزی و نزمی تێدا هەبیت ژی، ژلایێ بابەتی و ناڤەرۆكێ و پەیامێ، راستی بیت ئەوا ئەز شییاییم ژێ وەربگرم، بابەت ل سەر ئوپوزسیونێ و دەستهەلاتێ و ھشیارییا خەلكی د راوەستییا، خاپاندنا خەلكی ژلایێ كەسێن ئێكێ و مەلاقی و خۆش باوەری و ئەڤ بابەتە ژی بێ جوداھی دھاتە بەحسكرنێ، كو بابەت رەنگڤەدانا حوكمرانیێ بوو ل هەرێمێ و چ لایەنێن ئوپوزسیون یان یێن دەستهەلاتدار و پەیاما من ژ شانۆیێ وەرگرتی، ھشیاركرنا خەلكی بوو و ئەز دڤی بواریدا گەلەك ئارام بووم، كو ھونەر دشێت دویری هەر ئینتیمائەكا حزبی و لایەنگیرییا بەرتەنگ پەیاما خوە بگەھینیت و خالا سیێ ژ بینەرییا من بۆ ڤێ شانۆگەریێ و رێژا ئامادەبوویان دناڤ ھولێدا، ھول یا ب نیڤی بوو و ئەوا من حەزدكر، ھول یا تژی با، لێ مخابن ئەڤێ پەیوەندی ب پەیمانگەھـ و زانكویێن مەڤەهەیە، ئەڤێ پەیوەندی ب سازیێن مە یێن رەوشەنبیری و ھونەری ڤەهەیە و لدووماھیێ ئەڤێ پەیوەندی ب ھشیارییا خەلكی بخوەڤە هەیە و رەنگە ئەڤ پەیوەندییە راستەوخو ب پەیاما شانوگەریێ بخوەڤە هەبیت، دەما مە بینەرەك نەبیت قەستا نمایشەكا شانۆیێ بكەت یان سمینارەكا ئەدەبی بكەت، پێنەڤێت دێ گلە و گازندێن مە ژ بەردەوامییا نەهشییارییا خەلكی بخوە ژی هەبن و بارانا درەوان دێ یا بەردەوام بیت، چ خەلك سیهوانێ دانە سەر سەرێ خوە یان نە، دێ هەر تەر بن.
