سامی بنیامێن رێكانی
ئامێدیێ ئێك ژ كەڤنترین و دیارترین باژێركێن كوردستانێ و جیهانێ یە و خودان دیرۆكەكا كەڤنار و شارستانییە. ژلایێ جوگرافی ژیڤە، جهەكێ باڵكێش و جوانە و سالانە ب هزاراەهان گەشتیارێن ناڤخۆیی و بیانی سەرەدانا وی باژێری دكەن، ژبەر كو سەنتەر و پایتەختێ میرگەها بەهدینانە و هژمارەكا شوینەوارێن كەڤنار و جوان لێ هەنە. ژلایەكێ دیڤە هەر سێ ئۆلێن دونیایێ تێدا ژیاینە و تا نوكە ژی شوینەوارێن كنیشتە و دێرا ن لێ ماینە، هەروەسا هەر دوو دەرگەهێن وێ و مزگەفتا مەزن ژی رەوشەكا دی یا شارستانی دایە باژێری. سالانە راپۆرت و ڤەكولینێن دیرۆكی و شوینەواری ژلایێ قوتابیێن زانكۆ و پەیمانگەهان و دیرۆكنڤیسێن ناڤخویی و بیانی ژی لسەر دهێنە كرن و مفایەكێ باش ژێ دهێتە وەرگرتن. ئەڤە ژی وێ چەندێ دسەلمینیتن، كو ڤی باژێركی گرنگیەكا تایبەت یا هەی.
ئەگەر ئەم بەرێ خو بدەینە پاراستنا شوینەوارێن وێ، پترییا وان هاتینە پاراستن و هند ژوان ژی هاتینە نووژەنكرن و كار تێدا دهێتە كرن، ئەڤە ژی جهێ دلخوشیێ یە. لێ مخابن دەما مرۆڤ سەرەدانا گۆرستانا میرا دكەتن، ئەوا ل ناڤا سەنتەری دا یا د سەرۆبەرەكێ نەباشدا، وەكی چولەكی یا لێ هاتی و مایە بێ خودان و چاڤدان بۆ ناهێتەكرن. ئەڤێ گۆرستانێ گرنگیەكا مەزن یا هەی، ژبەركو گۆرێ ئێك ژ سوڵتانێن بناڤ و دەنگێن بەهدینان یێ لێ، ئەوژی گۆرێ (سۆلتان حوسێن وەلی)یە كو ل سەر دەستهەلاتا وی و ب رەنگەكێ راستەوخۆ گەلەك گرنگی ب شوینەواران ددا و چەندین پر و خواندنگەه و ئاڤاهیێن دی ئاڤاكرینە و نویژەنكرینە. دڤیابا نوكە جوانترین و پاقژترین جھـ ل ئامێدیێ ئەڤ گۆرستانە با، ژبەر كو هەر گەشتیارەكێ سەرەدانا ئامێدیێ دكەتن، دڤێتن گۆرێ وی ببینیتن پاشی ل ئامێدیێ دەربكەڤیتن. ئەڤجا داخوازێ ژ جهێن پەیوەندیدار دكەین، كو سەخبێریەكا باش بۆ ڤێ گورستانێ بكەن و هەر دەم یا پاقژ و جوان و رێك و پێك بیتن، دا ببیتە جهێ سەرنجا گەشتیاران.
