سبەینێ دووشەممە، 25/11/2024، بە دروشمی (لەپێناو چەترێكی یاسایی بۆ سۆسیالمیدیا) و بەچاودێریی حەمەی حەمەسەعید، وەزارەتی رۆشنبیری و لاوان دیداری (سۆسیالمیدیا پانتاییەك لە روانگەی یاساییەوە) لە شاری هەولێر رێكدەخات.
دیدارەكە، دوو رۆژ دەخایەنێت لە رۆژی یەكەمدا وێڕای وتاری وەزیری رۆشنبیری و لاوان و چەند پرۆگرامێكی تر، پانێلی یەكەم بەناونیشانی (روانگەی لایەنە پەیوەندارەكان سەبارەت بە پێشێلكارییەكانی سۆسیالمیدیا لە هەرێمی كوردستان) پێشكەشدەكرێت، دواتر پانێلی دووەمیش هەمان ناونیشانی دەبێت، بەڵام نوێنەری چەند لایەنێكی تری حكومیی و پەرلەمانی كوردستان بەشداری تێدا دەكەن. پانێلی سێیەم-یش بەناونیشانی (دیدی چارەسەر بۆ پرسەكانی سۆسیالمیدیا لە روانگەی میدیاییەوە) بۆ نوێنەری كۆمەڵێك رێكخراوی ناحكومیی پەیوەندار پێشكەشدەكرێت.
رۆژی دووەمی دیدارەكەش كە دەكاتە 26/11/2024، پانێلی چوارەم بەناونیشانی (لێكەوتەكانی نەبوونی یاسای تایبەت بە سۆسیالمیدیا و نەخشەڕێگەی چارەسەر) بۆ كۆمەڵێك پسپۆڕ و شارەزا پێشكەش دەكرێت.
لە كۆتایی دیدارەكەشدا، راسپاردەی دیدارەكە ئامادە دەكرێت و رێزلێنان پێشكەش بەبەشداربووان دەكرێت.
كۆمار مەسعود
