سیامەند هاریکی
هەلبژاردن ل هەمی جیهانێ، ژبۆ پێشڤەبرن و سەرڕاستكرنا رێڕەوێ حوكمرانیێیە بەرەڤ دیموكراسیێ. ل هەرێما مە ژی، كو سیستم تێدا دقالبەكێ کەڤنار و دوور ژ پرنسیپێن یاسایی و دیموکراسیێ خوە سەپاندی، هەلبژاردن هیڤیا مەزنا هەر دەنگدەرەكییە، ژبوونا كو حوكمڕانییەكا باشتر و ل سەر بنەمایێن یاسایی و دیموكراسی بهێنە دامەزراندن. ئەڤ پرۆسەیە نە بتنێ ل هەرێما كوردستانێ، بەلكو ل هەمی وەلاتان، دناڤ هەمی جڤاكاندا پێڤەژوویەك گرنگە، لێ بمەرجەكی بهایێ وێ یێ دروست بهێتەدان و کەسێن پێ رادبن باوەری پێهەبیت، وەكو پێدڤییەكا گرنگ ژبۆ پێشڤەبرنا جڤاكی و بەردەستكرنا خزمەگوزارییان و مسوگەركرنا ژیانەكا خۆش و سەقامگیر بۆ خەلكی بهێت پێڕەوكرن و د ژیانا رۆژانەدا رەنگڤەدەت.
بەلێ دەما دبینین، نا بەرامبەری و نا دادپەروەریەک زەق و مەزن د پڕۆسەیێدا یا هەی، هندەک هێز و لایەن، هەموو سەروەت و سامانێ وەڵاتی، هێزێن لەشکەری، شیانێن و دامودەزگایێن دەولەتێ بۆ بەرژەوەندییا حزبا خوە بکار دئینن، هندەک ژی نکارن د بانگەشەییا هەلبژاردناندا چار وێنەیان لسەر جادان بخوە دانن، بێگۆمان ئەوێ پڕۆسێ دێ کاریگەرییەکا گەلەکا نەرێنی لسەر ئەنجامان ژی هەبیتن.
دڕەوشەکا وەها ژیدا، ئەو پڕوسە رێڕەو خۆلکێ خوە ژ دەستددەت، بتنێ گەرەک وەکو شانۆگەرییەک بهێت دیتن، کو خاپاندن و خوەسەپاندن وەکو پرەنسیپ تێدا یا سەردەستە و د ئەنجامیدا پڕۆسە لسەر عەردی وەها ژی دهێتن پێڕەوکرن.
مخابن، پڕۆسا هەلبژاردنان ل وەڵاتێ مە، هێشتا یا لەقە، نەبوویە کەلتور و خوە لسەر لنگان نەگرتییە و نوكە ئەم یێ بەرەڤ قوناغا دامەزراندنا حكومەتێ دچین و تاكە ئومێدا خەلكی ئەوە، ژ هەموو وان قەیرانێن هەتا نوکە ژیانکرین رزگارببن.
ل ئیرۆ وێڤە، مووچە نەمینیت سەر نووچە، هەیڤانە ب رێکوپێکی و د دەمێ خوەدا هەر کەس حەقدەستێن خوە بستینیت، خەلکێ مە ژی د وەڵاتێ خوەدا، پتر هەست ب هەبوونا خوە بکەت، ئەڕکێن خوە یێن نیشتمانی وەکو پێویست بجهبینیت.
