ئا: هێمن عەبدوڵڵا
سەرژمێریی گشتی دانیشتوان، كە لە كۆتایی مانگی رابردوو لە عیراق بە هەرێمی كوردستانەوە ئەنجامدرا، جگە لەوەی گرنگی و بایەخی خۆی هەبوو، لەهەمانكاتدا راستییەكی تری ئاشكرا كرد، ئەویش خواستی گەڕانەوەی خەڵكی دێهاتەكانی كوردستانە بۆ زێدی خۆیان، بەتایبەتی لە سنوری ناوچە دابڕاوەكانی قەزای مەخموور، كاتێك بینیمان بەشێكی زۆری خەڵكی ئەو ناوچانە بۆ ئەنجامدانی سەرژمێری بەخۆیان و خێزانەكانیانەوە گەڕانەوە ناوچەكانی خۆیان، تاكو لەوێ تۆماربكرێن.
ئێستا زەمینە لەبارە بۆ گەڕانەوەی دانیشتوانی گوندەكانی دەشتی قەراج و ناحیەی سەرگەڕان و ناحیەی گوێڕ و بناری قەرەچوغ
لەوبارەیەوە ژمارەیەك لە خەڵكی گوندەكانی سنوری قەزای مەخموور كە دەكەوێتە باشووری خۆرئاوای شاری هەولێر، باس لە خواستی گەڕانەوەیان بۆ زێدی خۆیان دەكەن، ئەگەر لەلایەن حكومەتەوە هاوكاری بكرێن و ئاسانكاریان بۆ بكرێت.
ئەبوزێد عەلی، وەك یەكێك لە گوندنشینەكانی ئەو سنوورە بە كوردستانی نوێی راگەیاند: ئەگەرچی ئێمە لە شار دەژین، كەچی هەمیشە دڵمان لە گوندەكەی خۆمانە و حەزدەكەین رۆژێك لە رۆژانە بگەڕێینەوە، بەڵام لەبەرئەوەی دەرفەت نەبووە نەمانتوانیوە، گەڕانەوەشمان لەكاتی ئەنجامدانی سەرژمێری بە ماڵ و منداڵەوە دەرخەری ئەو راستیەیە.
وتیشی: لەكاتی گەڕانەوەمان بۆ گوندەكەمان دەركەوت كە هیچ هۆكارێكی ژیانی تێدا نییە، وەك رێگاوبان و نەخۆشخانە و قوتابخانە و ئاو و كارەبا و چەند خزمەتگوزاری تر، بۆیە بەبێ هاوكاری حكومەت خەڵكی ناتوانن بگەڕێنەوە زێدی خۆی، هەرچەندە لە سەرژمێری سەلماندمان كە ئەو ناوچانە هی باب و باپیرانمانە، لەگەڵ ئەوەش ئەگەر بەو جۆرە بەچۆڵی بمێنێتەوە، هیوای ئاوەدانكردنەوەیان زەحمەت تر دەبێت.
ئەمیر یاسین كاكۆ، وەك خەڵكی گوندی (جوكوژ) لە ناحیەی قەراج سەر بە قەزای مەخموور یەكێكی تر بوو لەو گوندنشینانەی لەكاتی سەرژمێری گەڕاوەتەوە زێدی خۆی وتی: ئێمە لێرە زەوی كشتوكاڵیمان هەیە و ساڵانە لەوەرزی چاندن و دروێنە دەگەڕێینەوە، بەڵام ناكاتە ئەوەی بەیەكجاری بگەڕێینەوە، چونكە بە بێ گەڕانەوەی خێزانەكان گوندەكان ئاوەدان ناكرێنەوە.
وتیشی: لە گوندەكەی ئێمە چەند ماڵێك هەن، ئەوانی تر لەكاتی پێویست هاتوچۆ دەكەن، چونكە تائێستا مەترسی ئەمنی لەو ناوچانە هەیە، بەو پێیەی گۆڕەپانی شەڕی داعش بووە، بەڵام لەكاتی ئەنجامدانی سەرژمێری دانیشتوان، بۆمان دەركەوت مەترسی ئەمنی لەو ناوچانە نەماوە و خەڵك خواستی گەڕانەوەی بۆ گوندەكان زیاتری بۆ دروست بووە.
ئاماژەی بەوەشكرد: جگە لە نەمانی مەترسی ئەمنی هیچ رێگەرییەك نییە لەوەی خەڵكی بگەڕێنەوە سەر زێدی خۆیان، بەتایبەتی ناوچەكەی ئێمە سەر بە پارێزگای نەینەوایە و لە ژێر كۆنتڕۆڵی سوپای عیراقدایە، بۆیە ئەوەی پێویستە هاوكاری ماددی و گەیاندنی خزمەتگوزارییە بۆ ئەو ناوچانە، تاكو خەڵكە بگەڕێنەوە گوندەكانیان.
لای خۆیەوە غازی فەیسەڵ كارگێری مەڵبەندی قەرەچوخی یەكێتیی نیشمانیی كوردستان و كەسایەتی دەڤەری مەخموور، لەسەر هەمان بابەت بە كوردستانی نوێی راگەیاند: لەكاتی ئێستادا زەمینە لەبارە بۆ گەڕانەوەی دانیشتوانی گوندەكانی دەشتی قەراج و ناحیەی سەرگەڕان و ناحیەی گوێڕ و بناری قەرەچوغ، چونكە هێزەكانی ناوچەكە جگە لەوەی رێگرنین، بەڵكو پێشوازیان لێدەكەن، نموونەش سەرژمێری گشتی دانیشتوان بوو، كە هەزاران ئاوارەی گوندەكان گەڕانەوە سەر زێدی خۆیان .
پێشیوابوو: ئەو هەڵویستەی خەڵكی گوندنشینان نیشانەی ئەوەیە زەمینەی سیاسی و ئەمنی لەبارە بۆ ئاوەدانكردنەوەی گوندەكان، بەڵام پێویستیان بە پشتیوانی دارایی هەیە و دابینكردنی خزمەتگوزارییەكان هەیە، بەو هەنگاوە هەرێمی كوردستان و عیراق سوودمەند دەبن، هەروەها لەرووی ئابوورییەوە گوندنشینان دەتوانن بەرهەمی ناوخۆ زیادبكەن و فشار لە سەر شارەكان كەمتر بێتەوە، لەگەڵ چەندان سوودی تر.
