جەمال غەمبار -ی شاعیر سەبارەت بە فێستیڤاڵی نێودەوڵەتێی گەلاوێژ و شیعری شاعیر گەنجەكان بە دوالاپەڕەی وت: یەكێ لە سەروەرییەكانی ئەم فێستیڤاڵە و خولەكانی پێشووتریش دۆزینەوەی وزەی نوێی ئەو گەنجانەیە كە بە تایبەتی ئەوانەی لە دەرەوەی شارەكان دەژین.
وتی: گوێم لە كۆمەڵێك دەقی شاعیرانی گەنج بوو، گوێم لە كۆمەڵێك هەناسەی تازە و بە ئەدایەكی جوانەوە بوو كە دەقەكانیان خوێندەوە، دڵنیاشم لە پێشبڕكێی گەلاوێژدا خەڵات دەبنەوە.
جەمال غەمبار وتیشی: ئەم فێستیڤاڵەم پێخۆش بوو لە راستیدا جووڵەی ئەدەبی بە تایبەتی شیعر لە پێشكەوتن دایە و پیرۆزبایی لە هەموو ئەو گەنجانە دەكەم بەو دەنگە نوێیەوە و بەو ئەدا جوانە هاتوونەتە پێشەوە، هاوكاتیش پیرۆزبایی لە رێكخەرانی فێستیڤاڵی گەلاوێژ دەكەم و هەمیشە هەر بەردەوام بێ.
خاتوو سیمین چایچی شاعیر و نووسەر كە لە سنەی رۆژهەڵاتی كوردستانەوە میوانی فێستیڤاڵە بە دوالاپەڕەی وت: ئەم جۆرە فێستیڤاڵانە كاریگەری خۆیان هەیە لە هەموو بوارە ئەدەبییەكان بە تایبەتی زمان و كەلتور و گەشەسەندنی زمانی و هاوكاتیش كاریگەری لەسەر نەوەی نوێ دەبێت و هاندەرێكی باشە بۆ گەنجان بۆ ئەوەی پەرە بدەن بە توانا ئەدەبییەكانی خۆیان.
خاتوو سیمین وتی: ئەم فێستیڤاڵە كاریگەری ئەرێنی هەیە لەسەر ئاڵوگۆڕی هزری و فیكری و ئاشنابوونە لەگەڵ ئەدەبی گەلان و ئەزموونی ئەوان لەو بوارەدا و هاوكاتیش ئاگاداربوونە لە رەوتی ئەدەبیی وڵاتانی ناوچەكە.
لە كۆتاییدا وتی: هیوای سەركەوتن بۆ فێستیڤاڵی گەلاوێژ دەخوازم و هیوادارم بەردەوام بێت.
شاعیر و نووسەر دڵزار حەسەن یەكێكی ترە لە میوانانی فێستیڤاڵی نێودەوڵەتیی گەلاوێژ بە دوالاپەڕەی وت: بە رای من دەبێت فێستیڤاڵ لە هەر سێ بواری شیعر و چیرۆك و لێكۆڵینەوەدا ژنان دەبێت رۆڵی بەرچاویان هەبێت و ئەمساڵ رێژەكە بە رای من لەهەر سێ بوارەكە كەمە، فێستیڤاڵ دەرگایەكی هەیە بۆ ئەوەی خەڵك بابەتیان بۆ بنێرێت، بەڵام فێستیڤاڵ دەبێت دەروازەیەكی گەورەتر بكاتەوە و لیژنەكان خۆیان داوا بكەن كە بابەت بنێرن و نابێت چاوەڕوانی ئیمەیل و بابەت بن با خۆیان دەستپێشخەریی بكەن.
وتی: هەرچەندە ئاستی فێستیڤاڵ بەرزە، بەڵام بۆ ساڵانی تر دەبێت ئاستی بابەتەكان و بەشداربووان بەرزتر بكات، بە تایبەتی لە رەگەزی مێ، ئێمە لەوبارەیەوە كێشەمان هەیە، دەبێت گوێ لە رەگەزی مێ بگرین بۆ ئەوەی بزانین چی دەڵێن، ئێمە تا ئێستا تەنها گوێمان لە رەگەزی نێر بووە، مێ كەمترین قسەی كردووە لە مێژووی ئەدەبی كوردیدا، كەمترین قسەی كردووە لە ناوەندی ئەكادیمیدا. دەبێت رەگەزی مێ بدوێنین بۆ ئەوەی ئەوان قسە بكەن.
جەواد حەیدەری
