پەرلەمانتارانی فراکسیۆنی یەکێتی لەئەنجومەنی نوێنەرانی عیراق بەدواداچوون بۆ دابەشکردنی نەوت لەهەرێمی کوردستان دەکەن و داوایانکردووە هەوڵی تەواو بدرێت بۆ زیادکردنی بەشە نەوتی سنوری پارێزگای هەڵەبجە و پێنجوێن.
چرۆ حەمەشەریف، ئەندامی ئەنجومەنی نوێنەرانی عیراق بە PUKMEDIA ی راگەیاند: ئەمڕۆ لەگەڵ هاوپیشەم سروە محەمەد رەشید، سەردانی وەزارەتی نەوتی عیراقمان کرد و لەلایەن د.عزەت سابیر، بریکاری وەزارەتی نەوتەوە پێشوازیمان لێکرا.
وتیشی، مەبەستی سەردانەکەمان بەدواداچوون بوو بۆ گەیشتنی بڕی 50 ملیۆن لیتر نەوت بۆ هەرێمی کوردستان و داواشمان کرد هەوڵی تەواو بدرێت بەشە نەوتی سنووری پارێزگای هەڵەبجە و پێنجوێن زیاد بکرێت، بە هۆکاری ئەوەی ناوچەیەکی سارد و شاخاوییە، لەبەرامبەردا د.عزەت سابیر، بریکاری وەزارەتی نەوتی عیراق رایگەیاند لە ماوەیەکی نزیکدا بڕی 50 ملیۆن لیترە دەگاتە هەرێمی کوردستان و لە پارێزگای هەڵەبجەوە دەست بە دابەشکردنی دەکرێت کە بۆ هەر لیترێک بڕی 250 دینار وەردەگیرێت.
