وەزارەتی دارایی هەرێمی کوردستان رایگەیاند، وەزارەتی دارایی عیراق پابەند نەبووە بە بڕیارەکانی دادگای فیدراڵی سەبارەت بە خەرجکردنی مووچەی فەرمانبەرانی هەرێمی کوردستان و ئێستا بڕی زیاتر لە 822 ملیار دینار بۆ مووچەی مووچەخۆرانی هەرێمی کوردستان لای حکومەتى عیراق ماوە.
ئاماژەی بەوەشکردووە، بەگوێرەی حساباتمان لە بانکی ناوەندیی عیراق لقی هەولێر، وەزارەتی دارایی عیراق بڕی زیاتر لە 10 ترلیۆن و 26 ملیار دیناری وەک شایستەی مووچەخۆرانی هەرێمی کوردستان بۆ ساڵی 2024 ناردووە.
ئاشکراشیکردووە، وەزارەتی دارایی عیراق بڕی زیاتر لە 726 ملیار و 995 ملیۆن دیناری وەک لێبڕینی خانەنشینی و باجی داهات لە کۆی تەرخانکراوی هەرێمی کوردستان بڕیوە.
وەزارەتی دارایی هەرێمی کوردستان دەشڵێت، ئەو برە پارەیەی لە یاسای بودجەی گشتیی عیراق بۆ ساڵی 2024ـدا بۆ هەرێمی کوردستان تەرخانکراوە بریتییە لە زیاتر لە 11 ترلیۆن و 576 ملیار و 521 ملیۆن دینار، بەوەش بڕی زیاتر لە 822 ملیار و 642 ملیۆن دیناری پشکی هەرێمی کوردستان بۆ مووچەی فەرمانبەران و خانەنشینان لای حکومەتی عیراق ماوە کە خەرجبکرێت.
