بە بڕیاری پارێزگاری نەینەوا، بەرپرسی یەکە ئیدارییەکان لە پۆستەکانیان بەخشران و جێگری مەڵبەندی 20ی رێکخستنی قەرەچوغ-یش دەڵێت، یەکێتی پۆستی قائیمقامی قەزای مەخمور وەردەگرێت.
رەشاد گەڵاڵی، جێگری مەڵبەندی 20ی رێکخستنی قەرەچوغ بە PUKMEDIAی راگەیاند، ئێستا هەر 14 بەرپرسە ئیدارییەکە بە بڕیاری پارێزگار لە پۆستەکانیان بەخشراون و لادراون، بە بڕیارێکی دیکەش کەسانی دیکە لە جێگەیان دەستبەکار دەبن.
وتیشی، فەرمانەکە زۆر گرنگە، چونکە دوای رەتکردنەوەی ئەو سکاڵایانەیە کە دژ بە پۆستەکانی موسڵ لە دادگا تۆمار کرابوون، دوای رەتکردنەوەشیان پارێزگاری نەینەوا بڕیاری دەکرد کە هەر 14 بەرپرسی یەکە ئیدارییەکان لە پۆستەکانیان ببەخشرێن.
راشیگەیاند، ئەوەی دەمێنێتەوە ئەوەیە کە فەرمانی دەستبەکاربوون بۆ بەرپرسانی یەکە ئیدارییەکان دەربکرێت، بەپێی رێکەوتنی پێکهێنانی ئەنجومەنی پارێزگای نەینەواش، قائیمقامیەتی مەخمور پشکی یەکێتیی نیشتیمانیی کوردستانە و سەردار سیامەند ئەو پۆستە وەردەگرێت، کە ئێستا بەرپرسی مەڵبەندی قەرەچوغە.
