كوردستانی نوێ/ هەولێر
ئازاد رەشید ناسراو بە ئازاد تەنیا، ماوەیەكە لەقەدپاڵی قەڵای هەولێر كاری وێنەكێشان دەكات و رۆژانە خەڵكێكی زۆر بەلایدا تێدەپەڕن و بەشێكیان داوای كێشانی وێنەی خۆیان یان وێنەی كەسێكی ناودار و سروشتی كوردستانی لێدەكەن. لەبارەی کارەکەیەوە بە كوردستانی نوێی راگەیاند: لەئێستادا وێنەكێشان لە هەولێردا لە پاشەكشێ دایە، بەجۆرێك لەم شارە گەورەیە تەنیا خۆم دەبینم وێنە بكێشم، ئەوە لەكاتێكدا پێشتر چەندین وێنەكێشی بەناوبانگ و ناودارمان هەبوون، بەڵام بەڕۆیشتنیان، كەسی تر شوێنی ئەوانی نەگرتەوە، بەداخەوە تەنانەت زانكۆ و پەیمانگاكانیش وەكو پێویست نەیانتوانیوە بەهرەی ئەوانە دەربخات كە حەز بە وێنەكێشان دەكەن.
لەبارەی ئاستی تێگەیشتنی كۆمەڵگا بۆ هونەری وێنەكێشان وتی: ئەگەرچی پێشتر كۆمەڵگا بەجۆرێكی تر لەوێنەكێشانی دەڕوانی، بەتایبەتی وێنەی مرۆڤ، بەڵام ئێستا ئەو بۆچوونە گۆڕانكاریی بەسەردا هاتووە، بەتایبەتی لەرووی ئایینییەوە، روونكردنەوەی پێویست دراوە، وێنەكێشانی سەر كاغەز هیچ بەركەوتەیەكی لەگەڵ مرۆڤدا نییە، تاببێتە هۆی ورژاندنی و جووڵانی هەستی كەسەكەكان.
هەروەها وتیشی: بۆئەوەی بتوانیت وێنەیەكی سەرنجڕاكێش بكێشیت، پێویستیت بەشوێنێكی تایبەت هەیە، بەڵام لەبەرئەوەی من لەسەر شۆستەی قەڵای هەولێر كاری وێنەكێشان دەكەم و سەرما و گەرما لێمدەدا، نەمتوانیوە ئەو وێنانەی دەیانكێشم رەنگیان بكەم، بۆیە هەموو ئەو وێنانەی دەیكێشم هەمووی رەش و سپین.
ئەو وێنەكێشە نیگەرانی خۆشی دەبڕی لەوەی لەناوشاری هەولێردا، شوێنە مێژووییەكان وەكو خۆیان نەماون و دوور لە كەلتوری شارەكە نۆژەنكراونەتەوە، هاوكات سروشتی كوردستان و دیمەنی گوندەكانیش گۆڕاوە، بۆیە پێیوایە هەموو ئەوانە وایكردووە نەتوانرێت وێنەیەكی سەرنجڕاكێش بكێشێت.
