کاک دکتۆر، من (س.ح) تەمەنم (18) ساڵە، لە خێزاێكی ئایینپەروەرم. دوو ساڵ پێش ئێستا سەردانی ماڵی خاڵۆیەكم كرد و ماوەیەك لەوێ مامەوە، لەو ماوەیەدا لەگەڵ كوڕێكی هاوسێیاندا پەیوەندیی خۆشەویستی لە نێوانماندا دروست بوو. هەر ئەو كاتیش بەڵێنی هاوسەرێتیمان بە یەكتردا. پار كوڕێك لە خزمانی باوكم هاتە خوازبێنیم، باوكم لە سەرەتاوە رازی نەبوو، بەڵام لە ژێر كاریگەریی قسەی خزمەكانماندا، پاشان قایل بوو كە من بدرێم بەو كوڕە و سەرئەنجام بێ ئەوەی رام وەربگرن مارە كرام، بەڵام دوای سێ مانگ ناكۆكی لە نێوان ماڵی هەردوو لاماندا دروست بوو، زیاتر لەبەر ئەوەی باوكم ئەو كوڕە خزمەی بە دڵ نەبوو. ئیتر بە یەكجاری مەسەلەكە بڕێندرایەوە و دەستمان لێك بەردا.
ئێستا دووچاری بارێكی دەروونی زۆر خراپ هاتووم. هەست و هۆشم هەر لای ئەو كوڕەی هاوسێی ماڵی خاڵەكەمە، بەڕادەیەك كە ناتوانم لەبیری خۆمی دەربكەم. ئەم بابەتەم لەگەڵ دایكمدا باس كردووە، بەڵام ئەو رازی نییە و دەڵێ بە بێگانەت نادەم، ئێستا كەوتوومەتە ئەم گێژاوەوە، تكایە ئامۆژگاریی بەڕێزتانم پێویستە تا بتوانم باشترین و راستترین بڕیاری خۆم بدەم. لەگەڵ ئەو پەڕی رێز و سوپاسدا.
پ.د. كەریم شەریف قەرەچەتانی
22
مرۆڤ زۆر لەوە گەورەترە كە ئاوا بە ئاسانی (لە ئەنجامی پەیوەندییەكی سۆزداری و عاتیفی كە لە ماوەیەكی كەمدا دروست بووبێت) هەرەس بهێنێ و ژیانی خۆی
بكات بە دۆزەخ
خوشكی زێدە خۆشەویستم:
مرۆڤ زۆر لەوە گەورەترە كە ئاوا بە ئاسانی (لە ئەنجامی پەیوەندییەكی سۆزداری و عاتیفی كە لە ماوەیەكی كەمدا دروست بووبێت) هەرەس بهێنێ و ژیانی خۆی بكات بە دۆزەخ، ژیان زۆر لەوە پیرۆزتر و بەرفراوانترە و ناكرێت كۆسپ و قۆرتەكانی سەر رێگای ژیانمان بە ئاسانی هەرەسمان پێبێنێ و لەبەردەمیدا بە چۆكدابێین. راستە (دەردی دڵ گرانە) بەتایبەتیش بۆ كچێكی تەمەن گچكە و كەم ئەزموونی وەك بەڕێزتان كە تازە لە سەرەتای ژیان دان و عاتیفە و سۆز و خۆشەویستی و قسەی خۆش زوو كارتان تێدەكات و تووشی بارێكی دەروونی ئاڵۆزتان دەكات. خوشكی بەڕێزمان گوێ بۆ برای خۆت راگرە:
1
یەکەم: وەك لە سەرەوە باسم كرد تۆ تەمەنت گچكەیە و نابێت پەلە بكەیت و بڕیاری خێرا بدەیت. بەتایبەتیش دەربارەی گرنگترین و ناسكترین پڕۆژە، كە ئەویش پێكەوەنانی هاوسەری ژیان و خێزان دروست كردنە. لەبەر ئەوەی پێویستت بە ئامۆژگاری و رێنمایی دایك و باوك و كەسانی دڵسۆزت هەیە، بۆ ئەوەی تووشی هەڵە نەبیت و لەو تەمەنە ناسك و خونچە گوڵەتدا تووشی كارەسات و دەردەسەری نەبیت و دەبێت بڕیار، بڕیاری دڵ و عەقڵ بێت نەك تەنها (دڵ).
2
دووەم: خوشكی بەڕێزم تۆ لەو تەمەنە بچووكەتدا جارێك مارە كراوی و مارە كردنەكەشت هەڵوەشاوەتەوە، كەواتە دەبێت لەگەڵ دایكت دابنیشی و گفتوگۆی لەگەڵ بكەیت و بزانە بۆچی ناڕازییە، ئەگەر هەنجەت و بیانووی هەر ئەوە بێت كە ئەو كوڕە بێگانەیە، ئەوا ئەو هەنجەت و بیانووەی زۆر لاوازە و ئەمڕۆ باوی نەماوە و (95 %)ی خەڵك ژن و ژنخوازیی لەگەڵ بێگانە و دەرەوەی سنووری خێزان و هۆز و عەشیرەت دەكەن، ئەوەشی بۆ روون بكەرەوە كە بەختی خۆت لەگەڵ ئەو خزمەی خۆت تاقیكردەوە، بەڵام سەری نەگرت و ئامانجی هەر پەشیمانی و دڵئێشان و ناخۆشی بوو.
لەلایەكی تریشەوە ئەو داوایەی دایكت هیچ بنەمایەكی زانستی و ئاینی نییە، چونكە لەلایەنی زانستییەوە ژن و ژنخوازیی بەردەوام لە نێوان خزم و كەسدا مەترسی زۆرترە، بەتایبەتیش لە نێوان ئەو خێزان و بەرەبابانەی كە كێشەیان لەجینات و بۆماوەدا هەیە و ئەگەری تووشبووونی منداڵەكانیان بە نەخۆشی بۆماوەیی زۆر زیاترە، لەبەرئەوەی ئامۆزا و پورزا و خزم و كەسی یەكترین و زۆر لە جیناتەكانیان هاوبەشە و وەك یەك وان، هەروەها لەلایەنی ئاینیشەوە خودای گەورە هانمان دەدات كە لەگەڵ تیر و هۆز و نەتەوەكانی تر هاوسەرگیری بكەین و یەكتر بناسین، خۆ تۆ دەڵێیت لە خێزانێكی ئاینپەروەرم ، ئەگەر وایە بۆچی دایكت ئەو مەرجەی هەیە كە نابێت شوو بە بێگانە بكەیت .
3
سێیەم: باشتر وایە كوڕەكە بێتە خوازبێنیت. با كەس و كاری بێن قسە لەگەڵ دایك و باوكت بكەن، لەوانەیە ئەو كاتە دایكت رای بگۆڕێ و كوڕەكە و كەس وكاری بە دڵ بێت و لەو بڕیارەی پەشیمان ببێتەوە. چونكە جیاوازییەكی زۆر لە نێوان قسەكردن و كردەوەدا هەیە، بە دایكت بڵێ دایكە گیان من تەنها یەك داواكاریم لە تۆ هەیە، رازی ببە با كەس و كاری ئەو كوڕە بێنە داخوازیم، ئەگەر یەك كەم و كورتی هەبوو رازی مەبە، تۆ نە ئەو كوڕە و نە ماڵی ئەو كوڕە دەناسیت، ئەی بۆچی رەتی دەكەیتەوە، بچۆ پرسیار لە ماڵی خاڵم بكە و پرسیاریان لێبكە خۆ ئەوە ماڵی برای خۆتە بزانە هیچ شتێكی خراپیان هەیە ئەوە زیاتر لە (30) سی ساڵە دراوسێی ماڵی خاڵمن هێشتا ئەو كوڕە لە دایك نەبووە كە دایك و باوكی دراوسێی ماڵی خاڵمن.
4
چوارەم: دوای خوازبێنی ئەگەر دایكت هەر رازی نەبوو ئەوا دەتوانیت بە هاوكاری باوكت و خوشك و برا و خزمەكانی ترت هەوڵی رازی كردنی دایكت بدەن و بزانن هۆی سەرەكیی رازی نەبوونی چییە؟ دوور نییە لە دڵی خۆیدا بۆ خزمێكی خۆی تۆی دانابێ. ئەو كاتە دەتوانیت قسە لەگەڵ ئەو كەسە بكەیت و داوای ئەوەی لێ بكەیت كە بە دایكت بڵێ من بەم جۆرە ژنهێنانە رازی نابم. لەوانەیە لەوێدا گرفتەكە كۆتایی بێت، هەروەها قسە لەگەڵ دایكت بكە و پێی بڵێ بۆ دەتەوێت ژیانم لێبكەیت بە دۆزەخ، جارێك باوكم چارەنووسی منی خستە مەترسییەوە و بە بێ ئەوەی من رازی بم، منی بەو خزمەی خۆی دا و لە كۆتایشدا سەركەوتوو نەبوو، دڵی خزمەكانیش زویر و عاجز بوون، ئەی تۆش دایكە دەتەوێت جارێكی تر چارەنووسم بخەیتە مەترسییەوە؟ تۆ بۆ بە بێ هیچ هۆیەك ئەو كوڕەی بە نیازە بێتە داوام رەتی دەكەیتەوە، لەلایەك باوكم بە زۆر منی لە قوتابخانە دەرهێنا و نەیهێشت خوێندن تەواو بكەم بە بیانووی ئەوەی تووشی كێشەتان دەكەم، من نازانم چ كێشەیەكم بۆ ئێوە دروست كردووە؟ ئەی ئەوە نییە كچە خزمەكانی ترمان هەموویان دەخوێنن و كەسیشیان توووشی كێشە نەكردووە، ئێوە بۆ وا لە من دەكەن؟ من چ خراپەیەكم بۆ ئێوە بووە؟ بۆ ئەوەندە دەست دەخەنە ژیانی منەوە؟ راستە ئێوە دایك و باوكی منن و شانازیتان پێوە دەكەم و گەورەتان كردووم، بەڵام ئەمەش ئەوە ناگەیەنێ كە لە گەورە و بچووكی ژیانمدا ئێوە بڕیار بدەن، خۆت دەزانی شووكردن چارەنووسسازە و ئەگەر بنەماكانی سەركەوتنی تێدا نەبێت ئەوا هەر پەشیمانی لە دوایە .
5
پێنجەم: ئەگەر دەركەوت كە دایكت لەسەر هەقە و تێبینی لەسەر ئەو كوڕەی كە تۆ خۆشت دەوێت هەیە، ئەوا ئەو كاتە دەتوانیت كەسێكی تر بۆ خۆت هەڵبژێری كە لەوانەیە لەو كوڕە زۆر باشتر و دڵسۆزتر بێت، ئەمەش كارێكی گران نییە و وەك دەڵێن (سەری دونیا بە پووش نەگیراوە). وەك چۆن بەڕێكەوت ئەو كوڕەت ناسی و ئەو پەیوەندییە دروست بوو، ئەوا هەر بەو شێوەیەش كەسانی تر دەناسی و دوور نییە ئەو پەیوەندییە دروست بێت، بەڵام تۆ لەسەر هەوڵەكانی خۆت بەردەوام بە با ئەو كوڕەش لەگەڵ كەس و كاری لەلای خۆیانەوە بجوڵێن، پشتیوان بە خودا سەركەوتوو دەبن و بە ئاواتی خۆت دەگەیت. ئەگەر سەریش نەكەوتی ئەوە كۆتایی ژیان نییە و بەڵكو دەبێت بە پەند و ئەزموون بۆ تۆ، هیوادارم هەنگاوی دووهەمی ژیانت بهاویت و تەمەنەكەشت زۆر گونجاو و لەبارە بۆ هەنگاوەكانی داهاتووت.
