حاجی ئۆمەران.. شارێكی دەوڵەمەندی بێ خزمەتگوزاریی

ئا: كوردستانی نوێ/ هەولێر

بەهۆی سیاسەتێكی دارێژراوەوە، شارەكە كەمترین خەڵكی رەسەنی حاجی ئۆمەرانی تێدا دەژی

ناحیەی حاجی ئۆمەران دوا یەكەی ئیداریی پارێزگای هەولێرە، دەكەوێتە سەر سنووری نێوان هەرێمی كوردستان و كۆماری ئیسلامی ئیران، جگە لەوەی ناوچەیەكی گەشتیارییە و لە زۆربەی وەرزكاندا پلەكانی گەرما لە ئاستێكی نزمدایە، هاوكات ناوچەیەكی سنوورییە و مەرزێكی  نێودەوڵەتیی گەورەی تێدایە، بۆیە بە یەكێک لەناحیە پڕداهات و دەوڵەمەندەكان دادەنرێت، كەچی ناوەندیی ناحیەكە لە چەندین خزمەتگوزاریی بێبەشە و بەگوێرەی وتەی بەشێك لە دانیشتووانەكەی، شارەكە وەكو پێویست خزمەت نەكراوە.
جەلال حاجی قادر، وەك كەسایەتییەكی ناحیەی حاجی ئۆمەران بە كوردستانی نوێی راگەیاند: ئەگەر هەموو جێگایەك كێشەی خزمەتگوزاریی هەبوایە، نەدەبوو حاجی ئۆمەران گرفتی رێگاوبان و نەخۆشخانە و گرفتە كارگێڕییەكانی هەبوایە، بەداخەوە بەهۆی دەستێوەردانی حزبی، هەوڵدەدرێت دەست بەسەر زۆربەی شوێنە ستراتیجییەكاندا بگیرێت و لە بەرژەوەندیی تایبەتی بەكاریبهێنن.
وتیشی: لەماوەی رابردوودا زیاتر لە 1500 دۆنم زەوی كشتوكاڵی خەڵکی ناوچەکە، لەلایەن بەرپرسێكی باڵای دەستڕیشتوو دەستی بەسەردا گیراوە، ئەمەش بووە هۆی ناڕەزایی خەڵکیی و لەمبارەیەشەوە کۆنگرەی رۆژنامەنووسی بەستراو تێیدا باسی کێشەکە کرا.
 ئاماژەی بەوەشكرد: جگە لەو غەدرەی لە خاوەن زەوییەكان كراوە، لەرووی رێگاوبانەوە چەندینجارە پارەی بۆ تەرخاندەكرێت، كەچی پڕۆژەكانی  چاككردنەوە و دروستكردنی رێگاكان تەواو ناكرێت، بۆیە لەكاتی ئێستادا حاجی ئۆمەران رێگاوبانێكی خراپی هەیە، ئەمەش لەكاتێكدا مانگانە لەرێی گومرگەوە، چەندین ملیار دینار داهاتی هەیە.
ئەكرەم محەمەد، كەسێكی ترە وەك خەڵكی ناحیەی حاجی ئۆمەران بۆ كوردستانی نوێ وتی: ناحیەیەكی گەورەی وەك حاجی ئۆمەران كە زیاتر لە 1500 خێزانی تێدا دەژی، نەخۆشخانەیەكی لێ نییە، خەڵكی بتوانن لەكاتی پێویستدا چارەسەری خۆیان تێدا بكەن، هاوكات شارەكە هەر لەسەردەمی پاشایەتی لە عیراق، شوێنێكی گەشتیاریی بووە و ساڵانە چالاكی خلیسكانی بەفری تێدا ئەنجامدەدرا، كەچی ئەمڕۆ چەندین كێشەی خزمەتگوزاریی هەیە.
ئاماژەی بەوەشكرد: بەهۆی سیاسەتێكی دارێژراوەوە، گۆڕانكاریی دیمۆگرافی لەشارەكە كراوە، بەجۆرێك كەمترین خەڵكی رەسەنی حاجی ئۆمەرانی تێدا دەژی.
روونیشیكرەوە: تەنانەت لە دوا هەڵبژاردنی پەرلەمانی كوردستان بەهۆی مەرجەكانی  كۆمسیۆن لە بەكارهێنانی كارتی نیشتمانی بۆ دەنگدان، بەشێكی زۆر لە دەنگدەران حاجی ئۆمەران نەیانتوانی دەنگ بدەن، ئەمەش دەرخەری ئەوەیە كە ئەوان خەڵكی رەسەنی ئەم شارە نین، یان ناویان تۆمار نەكراوە.
سوارە قادر سەعید ئاغا، وەك كەسایەتییەك لە حاجی ئۆمەران پێیڕاگەیاندین: بەگوێرەی یاسا و دەستوور پێویستە هەر شارێك  دەروازەی نێودەوڵەتیی لێ بێت، دەبێت بەشێك لەداهاتەكەی بۆ ئەو سنوورە خەرج بكرێت، بەڵام ئەوەی لە حاجی ئۆمەران بەدیدەكرێت، هیچ  پارەیەك بەپلان و بەشێوەیەكی بەرنامە بۆدارێژراو خەرج ناكرێت، بەڵكو  بە میزاجی تایبەتی بەرپرسانی سنوورەكەیە.
ئاماژەی بەوەشكرد: وەرگرتنی باج و رسومات بەدەر لە رێنماییەكان وەردەگیرێت و پارەكەی بۆ سنوورەكە ناگەڕێتەوە و خەرج ناكرێت، لەبەرئەوەی لەلایەن یەك حزبەوە ئیدارە دەدرێت، بڕیاڕیارەكانی حزب لە حكومەت زیاتر جێبەجێدەكرێت، یان حزب بەناوی حكومەتەوە بڕیار دەدات.