عەبدولڕەحمان فەرهادی*
لقی هەولێری یەكێتیی نووسەرانی كورد سیانزە ساڵە بێ بڕانەوە، هەفتانە و هەموو پێنجشەممەیەك، بەردەوام هەفتە كۆڕی لە هۆڵەكەی خۆی و هۆڵ و شوێنی دیكەیش بەڕێوەبردووە و زۆرجاری وایش بووە، لە هەفتەیەكدا زیاتر لە كۆڕ و سیمینارێكمان بەڕێوە بردووە
لە ژمارە 9364ی رۆژی چوارشەممە 26/2/2025ی دووتوێی (كوردستانی نوێ هەولێر)، برای بەڕێزم مەریوان مەسعود ستوونێكی بەناوی (رەسەنایەتیی هەولێر و قسەیەكی جیاواز) بڵاوكردۆتەوە، لەم ستوونەدا هەڵەیەك سەرنجی راكێشام و بە پێویستم زانی هەر لەم ستوونەدا ئەم راستكردنەوەیە بڵاوبكەمەوە.
لە بڕگەیەكی ستوونەكەدا، كاك مەریوان باسی لەوە كردووە كە(ناوەندی هەولێری مەكتەبی ڕاگەیاندن و هۆشیاریی یەكێتیی نیشتمانیی كوردستان، توانیویانە ببنە خاوەن بڕاندێكی ساڵۆن كە نەریتێكی لە هەولێر زیندوو كردەوە كە دەمێك ساڵە بوونی نەمابوو، ئەویش نەریتی هەفتە كۆڕە).
لێرەدا بەپێویستی دەزانم زۆر سوپاسی كاك مەریوان بكەم كە لە ساڵانی رابردوودا، بەردەوام وەك هاوكارێك، كۆڕ و چالاكییەكانی لقی هەولێری یەكێتیی نووسەرانی كوردی لەم رۆژنامە ئازیزەدا بۆ بڵاوكردووینەتەوە، بۆیە دەبووایە ئەو برایەمان بەر لە هەر كەس بزانێت، كە لقی هەولێری یەكێتیی نووسەرانی كورد سیانزە ساڵە بێ بڕانەوە، هەفتانە و هەموو پێنجشەممەیەك، بەردەوام هەفتە كۆڕی لە هۆڵەكەی خۆی و هۆڵ و شوێنی دیكەیش بەڕێوەبردووە و زۆرجاری وایش بووە، لە هەفتەیەكدا زیاتر لە كۆڕ و سیمینارێكمان بەڕێوە بردووە، هەندێكجاریش پشوو بەدەر، تەواوی هەفتەكەمان كردووە بە هەفتەی ڕۆشنبیری.
لە ماوەی ئەم سیانزە ساڵەدا، تا ئێستا زیاتر لە 800 كۆڕ و سیمیناری جۆراوجۆری بوارەكانی ئەدەب و كەلتور و جۆرە بابەتەكانی رۆشنبیریی گشتییمان سەركەوتووانە بە بێ لایەنی و دوور لە هەرجۆرە دەستتێوەردان و سانسۆرێك بەڕێوەبردووە، واتە لە ماوەی ئەو سیانزە ساڵەدا، مانگانە جگە لە رەمەزانان دەكاتە، 5.6 كۆڕ و سیمینار، ئەمانەمان هەمووی بە بەڵگەوە هەن.
كەواتە ئەوە ئێمەین پێشەنگ و راگری ئەو نەریتە و یەكەم لەم بوارەدا نەك ساڵۆنە ئازیزەكەی لاپەڕە 9 لە هەولێر. من دەستخۆشی لەو ساڵۆنە دەكەم، خۆم زۆرجار ئامادەی سبەینە شەمووە كۆڕەكانیان بووم و ئەوانیش ناوەندێكی چالاكن و لە ماوەی رابردوودا زۆر كۆڕ و كاری جوانیان بەڕێوە بردووە.
لقی هەولێری یەكێتیی نووسەرانی كورد، كە نووسەرانی كوردستان ناویان ناوە(ماڵی نووسەران)، لە بەڕێوەبردنی كۆڕ و سیمیناری ئەدەبی و رۆشنبیری، پڕ چالاكترین دەزگای كەلتورییە لە تەواوی كوردستان و سەرتاسەری عیراقیش، ئەمە پەسن و وەسفێكی راستگۆیانەیە كە بەبەریدا بڕاوە، هەمیشە وایش هاتووەتە بەرچاو كە دەزگایەكی دەوڵەمەندی پڕ لە پووڵ و كارمەندە!. لێرەدا دوور لەو وەڵام و روونكردنەوەیەی بڕگەی پێشووم، بە هەلی دەزانم بڵێم: سەرباری ئەو كەم دەرامەتی و ئاڵنگارییانەی بوونەتە لەمپەر لەبەردەم ویست و خولیا و خوازیاریی زیاترمان، هەروەها سەرباری هەڵبەستنی قسەڵۆكی بێ بنەمای چەند خەستە كەسێك، كەچی راستڕۆیی و خواست و دڵسۆزیی ئێمە، هەرگیز لەو خزمەت و بەردەوامییەمان ناخات.
*سەرۆكی لقی هەولێری یەكێتیی نووسەرانی كورد.
