خێزان و ماڵبات و كەسوكارێن سەرفەرازێن شەهیدان
خەلكێ شەرەفمەندێ دهـوك و بادینان
ب هەلكەفتا (34)مین ساڵرۆژا سەرهەلدانا باژاڕێ دهـوك و دەڤەرا بادینان ڤێ رۆژێ كو روودانەكا وەرچەرخان و مێژوویی یە ب شانازی ساخ دكەین و ل هەموو خەلكێ نیشتمان پەروەر و نەتەوەپارێز پیرۆز دكەین.
زێدەباری ڕامالینا رژێما بەعس یا تاوانكار و هەڵوەشاندنا بناغەكێ سەرەكیێ دكتاتوریەتێ ل عیراقێ، سەرهەلدانا گەلێ باشوورێ كوردستانێ ئەوا چریسكا وێ ل راپەرین گەشبوویی روودانەكا گرنگ و سەنگین بوو، هەڤكێشەیێن سیاسی لسەر ئاستێ رۆژهەلاتا ناڤین گوهارتن و پشتی بدەهان ساڵێن تێكۆشانێ و بەخشینا بهزاران شەهید و قوربانییان و دەربازكرنا قۆناغێن سەختێن خەباتێ، دەلیڤەكا نووی بۆ گەلێ كورد ل باشوورێ كوردستانێ رەخسا پێخەمەت سەلماندنا هەبوونا خۆ و بدەستڤەئینانا مافێن رەوا.
وەكو دهێتە زانین و جەماوەرێ دهوك و مێژوو دیدەڤانن، ئێكەتی نیشتمانی كوردستان رۆڵەكێ سەرەكی و كاریگەر د سەرهەلدانا خەلكێ بادینان بگشتی و باژاڕێ دهوك بتایبەتی دا هەبوو، رێكخستنێن ئێكەتی نیشتمانی هاندەر و دەستپێشخەر و سەركێشێن سەرهەلدانێ بوون، پێشمەرگێ ئێكەتیێ ئێكەم هێز بوو دەربازی باژارێن دەڤەرا بادینان بووی، ئێكەم شەهیدێ سەرهەلدانێ ل دهوك (جومعە ئەحمەد محەمەد) ئەندامێ ئێكەتی نیشتمانی كوردستان بوو، هەر وەسا ئێكەم شەهیدا ژن (خەمێ حاجی عومەر شەرنەخی) ل زاخۆ پشتەڤان و لایەنگرا هەڤالێن ئێكەتی نیشتمانی كوردستان بوو.
جەماوەرێ ب روومەتێ دهوك..
ئەڤرۆ و هەڤدەم دگەل ساخكرنا (34)مین یادا سەرهەلدانێ، كوردستان بگشتی یا د قۆناغەكا هەستیار و چارەنڤیساز دا دەرباز دبیت و بادینان پەیوەندیەكا راستەوخۆ یا جوگرافی و سیاسی ب وان روودان و پێشهاتان ڤە هەیە. ل باكوورێ كوردستانێ پرۆسەكا ئاشتیێ بەرپابووییە و ئەگەر بسەركەفتیانە سەربگریت و شەڕێ (41) ساڵیێ پارتییا كاركەرێن كوردستانێ و دەولەتا توركیا بدووماهی بهێت، رەوشا سیاسی و ئەمنی یا بادینان ژی دێ بەرەڤ باشتر هێتە گوهارتن و ئارامی ل دەڤەرێ پەیدا بیت.
ل رۆژئاڤایێ كوردستانێ ژی پێنگاڤێن چارەسەركرنا دۆزا كوردی ب دیالۆك و رێكێن یاسایی دهێنە هاڤێتن، ئەو پێشهاتە ژی دێ بنە هۆكارێ بەرجەستەبوونا ئارامیێ و دەڤەرا بادینان كو هەڤسنوورە دگەل هەردوو پارچێن كوردستانێ دێ ژ روویێن تەناهی و ئاڤەدانی و گەشەپێدانا دەڤەرێن هاتینە چولكرن مفادار بیت. وەكو ئێكەتی نیشتمانی كوردستان پشتەڤانیەكا ئاشكرا و بهێز ل سەر بنەمایێ نەتەوایەتی ل وان پرۆسا دكەین و ئومێدەوارین هەموو لایەنێن سیاسیێن هەرێما كوردستانێ ڤەدەر ژ بەڕژەوەندیێن بەرتەنگێن حزبایەتی و ئەجێندایێن ئەقلیمی پاڵپشت و پشتەڤانێن چارەسەركرنا دۆزا كوردی بن ل باكوور و رۆژئاڤا.
ئەڤرۆ هەرێما كوردستانێ لهەمبەر زنجیرەكا گوهرینكاریێن ئیداری و سیاسی و یاسایی یە، چاڤەرێینە ل دەمەكێ نێزیك پەرلەمانێ كوردستانێ بكەڤیتە كاری و حكومەتەكا خزمەتگوزار و شەراكەتا راستەقینە بهێتە پێكئینان، دەستوورێ هەمیشەیێ هەرێمێ بهێتە دارشتن و سەمتا حوكمرانی و دەستهەڵاتێ ل گورەی بەرژەوەندیێن گشتی بهێتە راستڤەكرن، باندورا حزبی لسەر حكومەت و جومگەهێن ئیداری نە مینیت و وەڵاتیبوون پیڤەرێ سەرەدەریێ بیت دگەل تاكە كەسێن هەرێما كوردستانێ و یادا سەرهەلدانێ ژی ببیتە دەستپێك و هاندەر بۆ ئایندەكێ گەشتر.
دووبارە پیرۆز بیت (34)مین یادا سەرهەلدانێ ل كۆمەڵێن خەلكێ كوردستانێ
سەروەری بۆ شەهیدێن سەرهەلدانێ و سەرجەم شەهیدێن ئازادیێ
ئێكەتی نیشتمانی كوردستان
مەڵبەندێ چوارێ دهـوك
