ئا: رەوەست نەوزاد
یاریی بۆكسێن یان(ملاكمة)یەكێكە لە وەرزشە دێرین و ناسراوەكانی جیهان و جەماوەرێكی فراوانی هەیە، ئەو وەرزشە لە ساڵانی سەدەی پێشوودا، لە شاری هەولێر تاڕادەیەك بوونی هەبووەو چەندین یارییزانی بەتوانا بەشداریی پاڵەوانێتی عیراقیان دەكرد، بەڵام ماوەی چەند ساڵێكە بەهۆی فەرامۆشكردنی ئەو یاریییە لەلایەن یانە وەرزشییەكانەوە، خەریكە بەرەو نەمان دەچێت.
لەوبارەیەوە زەید مەحمود یارییزانی دێرینی بۆكسێنی شاری هەولێر بە كوردستانی نوێی راگەیاند: هۆكاری فەرامۆشكردنی و پێشنەکەوتنی یاریی بۆكسێن لە شاری هەولێر بۆ پاڵپشتی نەكردنی لەلایەن فیدراسیۆنی بۆكسێنی كوردستان و لیژنەی ئۆڵۆمپی كوردستان دەگەڕێتەوە.
وتیشی: ئێمە چەند كەسێك بووین لە ساڵی 2004 دوای رووخانی رژێمی بەعس، فیدراسیۆنی بۆكسێنی هەرێمی كوردستانمان دامەزراند، بۆ ماوەی 10 ساڵ لەوێ كارم كرد و چەند ساڵێكیش سەرۆكی فیدراسۆنەكە بووم، هەرچەندە ئێستا فیدراسیۆنەكە ماوە، بەڵام هیچ چالاكییەكی نییە، رێگاشیان بە من نەدا بەردەوام بم، بەوپێیەی لەلایەن حزبی دەسەڵاتەوە پشتگیریی نەكرام.راشیگەیاند: بۆ زیندووكردنەوەی كارەكانی فیدراسیۆنەكە، چەندین پێشنیازم ئاڕاستەی لایەنی پەیوەندار كردووە، بەڵام سوودی نەبووە و دەڵێن بودجەمان نییە، من دەڵێم راستە پارە كاریگەریی هەیە، بەڵام پێشتر کە پارەشمان لەبەردەست نەبوو، كەچی زۆرترین چالاكییمان ئەنجام دەدا.
هۆكاری فەرامۆشكردنی و پێشنەخستنی یاریی بۆكسێن لە شاری هەولێر بۆ پاڵپشتی نەكردنی لەلایەن فیدراسیۆنی بۆكسێنی كوردستان ولیژنەی ئۆڵۆمپی كوردستان دەگەڕێتەوە
زەید مەحمود باسی لەوەشكرد: ئێستا تەنیا لەیەك هۆڵی كەرتی تایبەت لە شاری هەولێر یاریی بۆكسێن ئەنجام دەدرێت، ئەمەش لەكاتێكدا لەناوچەكانی تری عیراق، چالاكی زیاتریان هەیە بە بەراورد بە شاری هەولێر، بەو پێیەی ئەوان یانە و بنەمای ئەو یارییەیان هەیە، هەروەك ژمارەی یارییزانانیشیان زۆرە و بەشداریی پاڵەوانێتیەكانیش دەكەن.
هەر لەوبارەیەوە زاگرۆس نانەكەلی میدیاكاریی وەرزشی بەكوردستانی نوێی رایگەیاند: یاریی بۆكسێن ئەگەر كەسی شارەزای لە هەرێمی كوردستان مابێت، ئەوا تەنیا(زەید مەحمود)ە، پێشتر لە سەردەمی رژێمی بەعس، ژمارەیەك یارییزانی بۆكسێنی ترمان هەبوو، لەوانە: مەزۆ لەشكری و سەعدون ئەحمەد و چەند یارییزانێكی تر، لە ساڵی 1974 ئەو یارییزانانە ویستبوویان بەشداریی لە یارییەكانی كیشوەری ئاسیا بكەن، بەڵام حكومەتی ئەوكاتەی عیراق رێگربوو لەوەی بەشداریی بكەن.
وتیشی: دوای راپەرین و تائێستاش بەداخەوە ئەو یارییە بوونی نەماوە، هۆكارەكان یەكەمیان، بۆ گرنگیدان تەنها بە یاریی تۆپی پێ دەگەڕێتەوە، دووەمیان، بۆ نەمانی بنكەكانی وەرزشی لاوان دەگەڕێتەوە. پاساوەكەشیان ئەوەیە، یاریی بۆكسێن جەماوەری نییە، هەرچەندە لە ساڵانی 1998 و 1999هەوڵێك هەبوو یاریی بۆكسێن لە هەولێر زیندوو بكەنەوە، بەڵام دواتر ئەوەش نەماو ئێستا لە بڕی بۆكسێن، یاریی كیك بۆكسێن و یاریی سەیروسەمەرە هاتوون بۆ كوردستان.
هەر تایبەت بەو باتە (د. ئالان قادر) شارەزا لە بواری وەرزشی و مامۆستای زانكۆ، ئەوەی بە كوردستانی نوێ رایگەیاند: ئەوەی پەیوەندیی بەلیژنەی ئۆڵۆمپی هەیە، جگە لە یاریی بۆكسێن، زۆربەی یەكێتییە وەرزشییەكان، بەهۆی نەبوونی هاوكاریی و هەماهەنگی و دارایی ناتوانن كارێكی وابكەن كە لە خزمەت وەرزشكارانی
كوردستان بن.
