ئا: هێدی گەڵاڵی
قەزای مەخموور ناوچەیەكی فراوانی زەوی كشتوكاڵی هەیە و زەمینەیەكی لەباری هەیە بۆ بەخێوكردنی ئاژەڵ بەتایبەتی مەڕ و بزن و مانگا و چەندین جۆر پەلەوەر، دوای ئەو گۆڕانكارییانەی بەهۆی تێكدانی گوندەكان و هەڕەشەی تیرۆر و كەمتەرخەمی هەردوو حكومەتی هەرێم و بەغدا لە ئاوەدانەكردنەوەی گوندەكانی دەوروبەری ئەو قەزایە، جووتیاران وەكو پێویست ناتوانن پەرە بە كاری كشتوكاڵی و مەڕداری بدەن و ئاستەنگی زۆریان بۆ دروستدەكرێت، بەتایبەتی لە چیای قەرەچووخ لەلایەن هێزە سەربازییەكانی ئەو سنوورە، ئاستەنگ بۆ ئاژەڵداران دروست دەكرێت.
غازی فەیسەڵ، كەسایەتییەكی ناسراو و جووتیاری سنوورەكە بە كوردستانی نوێی راگەیاند: ئەم سنوورە لە 300 گوند پێكهاتووە و هەردوو بەشی قەراج و كەندێناوە و شاخی قەرەچوغ بە یەكەوە بەستووەتەوە، هەرچەندە بەشی زۆریان ئاوەدان نەكراونەتەوە، بەڵام ئەوانەی لەوێ نیشتەجێن، بەدەست چەندین كێشە و گرفت دەناڵێنن.
وتیشی: دەسەڵاتی بەعسییەكان كاتی خۆی هەوڵی جۆرا و جۆری تەعریبیان داوە و زیاتر لە حەوت جار گوندەكانمان سوتێنراون و تاڵان كراون، بەڵام جارێكی تر دوای نەمانی رژێمی بەعس گەڕاوینەتەوە سەر زێدی باب و باپیرانمان، بەڵام ئەو هێزەی بە تاكڕەوی حوكمی ئەم سنوورەی كردووە، نەیانتوانیووە خزمەتێكی باشی ناوچەكانمان بكەن و لەڕووی خزمەتگوزارییەوە زۆر پشتگوێ خراوین، تەنانەت رێگریی لە دانیشتوانی گوندەكان دەكەن بڕۆنە ناو شاخی قەرەچوغ بۆ ئاژەڵداریی و گەشت و سەیران.
مەجید حەسەن، وەك یەكێك لە مەڕدارەكانی گوندی قەڵاتە سۆران بە كوردستانی نوێی راگەیاند: بەهۆی بوونی چەكدارانی سوپای عیراق لە بناری چیای قەرەچوغ و چەكدارانی داعش لە ناوەڕاست و پێشمەرگەكانیش لە لوتكەی شاخەكەدا، جووتیار و مەڕدارەكانی گوندەكان، ناتوانن بچنە شاخەكە و مەترسیی لەسەر دەڤەرەكە زۆرە.
وتیشی:چەندینجار داوامان لە حكومەتی هەرێم و ئیدارەی ناوچەكە كردووە، ئەو كێشەیەمان بۆ چارەسەر بكەن، بۆئەوەی بە ئازادیی و بێ ترس ئاژەڵ و مەڕوماڵاتەكانمان لە پاوان و لەوەڕگاكانی ئەو شاخە بلەوەڕێنین.
باسی لەوەشكرد: ئێمە وەك مەڕدارەكانی گوندەكانی قەڵاتە و سۆرانی مەرزان و عەلیەڕەش و بەردی سپی و چوارگۆمان، داواكاریین كێوماڵی قەرەچووغ بكەن و پاكی بكەنەوە لە پاشماوەی تیرۆریستان، بۆئەوەی بتوانین سوود لەو پاوان و لەوەڕگای ئەو شاخە وەربگرین.
مەجید حەسەن دەشڵێت: جووتیار و ئاژەڵدارەكانی گوندەكانی ئەو ناوچانە كێشەیەكی ترمان هەیە، ئەویش خراپی مامەڵەی بازگەكانی مەخموورە. لە بازگەكان رێگا نادەن ئاژەڵ بۆ مەخموور بهێنین و ببەین، بۆیە داواكاریین لە حكومەتی هەرێم و لایەنە پەیوەندییدارەكان، سنوورێك بۆ ئەو قۆرخكاریی و پاوانخوازییەی ئەو هێزە چەكدارانە دابنێن و چیتر چیای قەرەچووغمان لێ داگیر نەكرێت.
بەهۆی بوونی چەكدارانی سوپای عیراق لە بناری چیای قەرەچوخ و چەكدارانی داعش لە ناوەڕاست و پێشمەرگەكانیش لە لوتكەی شاخەكەدا، جووتیار و مەڕدارەكانی گوندەكان، ناتوانن بچنە شاخەكە و مەترسیی لەسەر دەڤەرەكە زۆرە
یوسف حسێن، یەكێكی ترە لە جووتیارانی سنوورەكە دەڵێت: جووتیارانی گوندەكانی بناری چیای قەرەچووغ كێشەی سەرەكییمان ئەوەیە، مەڕدارەكانمان ناتوانن ئاژەڵەكانیان بۆ پاوان و لەوەڕگاكانی شاخەكە ببەن، ئەویش بەهۆی بوونی چەكدارەكانی سوپای عیراق لە دامێنی شاخ و بوونی داعش لە ناوەڕاست و قەدپاڵەكان.
ئەو جووتیارە ئاماژەی بەوەشكرد، ماوەی هەشت ساڵە شاخی قەرەچووغ لە مەڕدار و خاوەن ئاژەڵەكانی ئەو سنوورە قەدەغەكراوە، كە نیگەرانی زۆری هاووڵاتیان و گوندنشیینەكانی ئەو دەڤەرەی لێكەوتۆتەوە.
