كوردستانی نوێ/ هەولێر
رووداوی كوشتنی چوار ئەندامی خێزانێک لەلایەن كەسێكەوە لە شاری هەولێر، كاردانەوەی زۆری بەدوای خۆیدا هێنا و خوێندنەوەی هەمەلایەنە و جیاواز بۆ تاوانەكە كرا. لەوبارەیەوە توێژەرانی كۆمەڵایەتی و چالاكوانانی رێكخراوەكانی كۆمەڵی مەدەنی، كاریگەریی ئەو رووداوە لەسەر كۆمەڵگا رووندەكەنەوە و رەخنەش لە شێوازی بڵاوكردنەوەی ئەو رووداوە لە بەشێك لە دەزگاكانی راگەیاندن دەگرن.
فێنک حاجی مەلا:
هەركاتێك رووداوی لەو جۆرە روو دەدات، پێویستە دەزگاكانی راگەیاندن زۆر بە بەرپرسیارانەوە مامەڵە لەگەڵ رووداوەكەدا بكەن
فێنك حاجی مەلا لێپرسراوی لقی هەولێری یەكێتی ژنانی كوردستان بۆ كوردستانی نوێ وتی: بەدڵنیاییەوە ئێمە وەكو یەكێتیی ژنانی كوردستان، ئیدانەی هەموو تاوانێکی كوشتن دەكەین، بەتایبەتی كوشتنی ژنان. بەداخەوە ئەو رووداوەی ئەمجارە لە هەولێر روویدا، بووە هۆی گیان لەدەستدانی سێ ژن و پیاوێك، ئەمەش جێگای هەڵوەستە لەسەر كردنە، كە كەسێك ئەو تاوانەی ئەنجامداوە، پیشەی پزیشكە بێت.
وتیشی: لە بری ئەنجامدانی تاوانی كوشتن، جا لەلایەن دكتۆرێك بێت یان هەر توێژێكی دیكەی كۆمەڵگا، دەكرێت لە رێگای دادگا و گفتوگۆوە، ئەو گرفتانە چارەسەر بكرێت، پێش ئەوەی كارەساتی لەو جۆرەی لێ بكەوێتەوە، بەتایبەتی ئێمە بەڕێوەبەرایەتیی تایبەت بە توندیژییەكانمان هەیە، دەكرێ لەوێ سكاڵا تۆمار بكرێت، بەرلەوەی كارەساتی لێ بكەوێتەوە.
پێشیوابوو: هەركاتێك رووداوی لەو جۆرە روو دەدات، پێویستە دەزگاكانی راگەیاندن زۆر بە بەرپرسیارانەوە مامەڵە لەگەڵ رووداوەكەدا بكەن، هەروەك لەو رووداوە بینمان، هۆكاری تاوانی لەو جۆرەیان بۆ چەندین یاسا گەڕانەوە، لەكاتێكدا هێشتا دۆسیەكە لە دادگایە و پێویستە لەوێ بڕیاری لەسەر بدرێت.
هۆشەنگ عەبدوڵڵا:
هۆكاری ئەنجامدانی تاوانی لەو جۆرە، بۆ كێشە و گرفتە كۆمەڵایەتی و ئابووریی و دەروونییەكان دەگەڕێتەوە
هەرلەو بارەیەوە هۆشەنگ عەبدوڵڵا توێژەری دەروونی بۆ كوردستانی نوێ وتی: بەداخەوە دیاردەی تاوان لە كۆمەڵگای ئێمە لە زیادبووندایە، بەوپێیەی ئێمە وەك توێژەرانی دەروونی لە چاكسازییەكان بەركەوتەمان لەگەڵ دۆسیەكان هەیە، ئەوەشی پەیوەندیی بە رووداوی ئەمجارەی شاری هەولێرەوە هەیە، تاوانێكی گەورە بوو، كاتێك كەسێك كە پیشەی پزیشكە، كۆتایی بە ژیانی چوار كەس دەهێنێت.
وتیشی: ئەنجامدانی تاوانی لەو جۆرە جگە لە كوژرانی ئەو كەسانە، حاڵەتێكی دەروونی خراپ لەسەر كەسوكار و دەوروبەرەكەی دروستدەكات، بەجۆرێك كاریگەریی لەسەریان دەبێت، ئەگەر چارەسەری دەروونی نەكرێن، رەنگە تووشی چەندین نەخۆشی وەك خەمۆكی و قەلەقی ببنەوە. جگە لە كەسوكاری قوربانییەكان، ئەنجامدانی تاوانی لەو جۆرە، هەموو كۆمەڵگای كوردستانی شۆك كرد، بەتایبەتی شاری هەولێر، زۆر بەخێرایی لە تۆڕە كۆمەڵایەتییەكان بڵاوكرایەوە.
ئاماژەی بەوەشكرد: هۆكاری ئەنجامدانی تاوانی لەو جۆرە، بۆ كێشە و گرفتە كۆمەڵایەتی و ئابووریی و دەروونییەكان دەگەڕێتەوە، بۆ رێگاگرتن لەو جۆرە تاوانانەش، سەرەتا پێویستە دیاردەی چەكداری بنبڕ بكرێت، چونكە ناكرێت هەموو كەس بە ئاسانی دەستی بەچەك بگات.
پێشیوابوو: مرۆڤ بەردەوام گۆڕانكاریی بەسەر هەست و بیركردنەوەكانیدا دێت، لە هەندێك حاڵەتدا، تووڕە دەبێت و كۆنتڕۆڵی خۆی لەدەست دەدا، كاتێكیش چەكی دەست دەكەوێت تاوان ئەنجامدەدات، بەڵام راستەوخۆ هەر دوای ئەو تاوانە، بەشی زۆری تاوانباران پەشیمان دەبنەوە، چونكە حاڵەتەكە لەكاتی تووڕەبووندا بووە.
ئەو توێژەرە دەروونییە، باسی لەوەش كرد: بۆئەوەی رێگا لە تاوانی لەو جۆرە بگرین، پێویستە لەرێگای راگەیاندنەكان و مینبەری مزگەوتەكان و زانكۆ و خوێندگاكانەوە، هاووڵاتیان هۆشیار بكرێنەوە، لە چۆنیەتی چارەسەركردنی كێشەكان و سزای ئەو كەسانەی تاوان ئەنجامدەدەن.
